Jehova Diosqa manam saqinqachu sumaq huertata mana allin runakuna qachachanankutaqa. Chay sumaq huertapiqa Diosta kuyaqkunallam kawsanqaku. ¿Imataq mana allin runakunata pasanqa? Chaymanta yachananchikpaq Noey sutiyuq runapa vidanmanta yachasun. Waranqantin watakuna ñawpaqtaraqmi Noeyqa kawsakurqa. Allin ruwaq runam karqa hinaspam Diospa munayninta tukuy sunqunwan ruwananpaq kallpanchakurqa. Wakin runakunañataqmi mana allinkunallata ruwarqaku. Chaymi Jehova Diosqa Noeyta nirqa lliw mana allin ruwaq runakuna llumpa-llumpay parawan chinkachisqa kanankumanta. Chaymantapas nirqam hatu-hatun buqueta Noey ruwananpaq, chaynapi sinchi para chayamuptin ayllunwan mana wañunankupaq (Genesis 6:9-18).

Noeywan ayllunmi hatu-hatun buqueta ruwarqaku. Noeymi runakunaman willarqa llumpa-llumpay para chayamunanmanta, ichaqa manam pipas uyarirqachu. Hinallam mana allinkunata ruwarqaku. Buque ruwayta Noey tukuruspanmi animalkunata chayman yaykuchirqa hinaspañam ayllunwan kuska yaykurqaku. Hinaptinmi Jehova Diosqa kachaykamurqa llumpa-llumpay parata. Tawa chunka punchaw hinaspa tawa chunka  tutam pararqa hinaptinmi yakuñataq kay pachata taparurqa (Genesis 7:7-12).

Mana allin runakunam wañurqaku, Noeywan ayllunmi ichaqa mana wañurqakuchu. Jehova Diosmi Noeytaqa yanaparqa hinaspam allin allpapiña kawsachirqa (Genesis 7:22, 23). Kunanpas bibliaqa niwanchikmi mana allin ruwaq runakunata Jehova Dios huktawan chinkachinanmanta. Allin ruwaq runakunaqa manam wañunqakuchu. Paykunaqa kay allpa pacha kuyayllapaq huerta kaptinmi wiñaypaq chaypi kawsakunqaku (2 Pedro 2:5, 6, 9).

Kunan tiempopi runakunaqa mana allinkunatam ruwachkanku. Kay pachapi runakunaqa llumpay sasachakuykunapim tarikunku. Jehova Diosqa yupaychaqninkunawanmi piñakuynin punchawmanta lliw runakunaman willachichkan, ichaqa manam llapankuchu uyarinku Diospa palabrantaqa. Manam munankuchu mana allin ruwasqanku saqiytaqa nitaq imam allin utaq imam mana allin kasqanmanta yachaytapas. ¿Imataq pasanqa chayna runakunata? ¿Haykapipas wanakunqakuchu? Manam llapankuqa wanakunqakuchu. Mana allin ruwaq runakuna wiñaypaq chinkachisqa kanankupaq punchawmi chayaykamuchkanña (Salmo 92:7).

Kay allpaqa manam chinkachisqachu kanqa, aswanqa kuyayllapaqtam huertayanqa. Dioswan kuyachikuqkunam kay allpa pacha sumaq huertaña kaptin wiñaypaq kawsakunqaku (Salmo 37:29).