Kuyawaqninchikwanqa hinallam rimanchik. Paytam uyarinchik hinaspam paypas uyariwanchik. Paymantam hukkunamanpas allinta rimanchik. Chaynatam ruwananchik Diospa kuyasqan kanapaqpas. Qawariy imatam biblia kaymanta niwanchik.

Jehova Diostam sapa kuti mañakunanchik. “Tukuy tiempoyá Diosta mañakuychik” (Romanos 12:12).

Diospa palabrantam ñawinchananchik. ‘Bibliapi llapallan qillqasqa kaqkunaqa Diospa espiritunpa qusqanmi, allinmi yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq’ (2 Timoteo 3:16).

Diosmantam hukkunaman yachachinanchik. “Chaynaqa llapallan nacionpi runakunaman rispayá willamuychik qatiqniykunaña kanankupaq [...]. Yachachimuychikyá qamkunaman  tukuy ima kamachisqayta kasukunankupaq” (Mateo 28:19, 20.)

Dioswan kuyachikuq runakunamanmi asuykunanchik. ‘Yachayniyuq runakunawan juntanakuspaykiqa yachayniyuqmi kanki’ (Proverbios 13:20).

Jehova Diospa testigonkunapa huñunakuyninmanmi rinanchik. ‘Ama qunqaruspayá kuyanakunapaq hinaspa allin ruwanapaq [...] kallpanchanakusunchik’ (Hebreos 10:24, 25).

Diospa munaynin ruwakunanpaqmi qullqichanchikwanpas yanapakuchwan. ‘Sapakamayá quchun sunqunpi tanteasqanman hina, ama llakikuspachu nitaq obligasqachu, Diosqa kuyan kusikuywan quqtam’ (2 Corintios 9:7).