Dioswan kuyachikunapaqqa riqsinanchikmi. Kuyawaqninchik runakunaqa yachanmi sutinchikta hinaspam sutinchikmanta qayawanchik ¿aw? Diosninchikpas munanmi sutinta yachananchikta hinaspa rimananchikta. Sutinmi Jehova (Salmo 83:18, NM; Mateo 6:9). Chaymantapas yachananchikmi ima munasqanta hinaspa mana munasqantapas. Yachananchiktaqmi pikuna kuyaqninkuna hinaspa pikuna mana kuyaqninkuna kasqantapas. Manamá chayllachu pitapas allintaqa riqsiruchwan, chaymi bibliaqa niwanchik Jehova Diosta riqsinapaq tiempochakunamanta (Efesios 5:15, 16).

Diosta kuyaqkunaqa paypa munasqantam ruwanku. Kuyasuqniki runakunapi yuyaymanay. Kuyasuqniki runakunata mana allinta qawaptikiqa chaynataq mana munasqankunata ruwaptikiqa, ¿hinallachu paykunaqa kuyasunki? Manañam. Chaynallataqmi Dioswan kuyachikuyta munaspaqa paypa munasqanta ruwananchik (Juan 4:24).

Manam lliw religionkunachu yanapawasun Dioswan kuyachikunapaqqa. Jesusmi Diospa ancha kuyasqanqa. Paymi rimarqa hatun ñanmanta hinaspa kichki ñanmanta. Hatun ñannintam achka runakuna richkanku. Chay ñanqa wañuymanmi apakun. Kichki ñantañataqmi as runakunalla richkanku. Chay kichki ñanqa wiñay kawsaymanmi apakun. Chaymi Dioswan kuyachikuyta munaspaqa allintapuni yachananchik imaynata payta yupaychanapaq (Mateo 7:13, 14).