Ancha allinmi Dioswan kuyachikuyqa. Diosmi yanapasunki kusisqa kawsakunaykipaq. Librasunkim pantay yachachikuykunamanta hinaspa mana allin ruwaykunamanta. Uyarisunkitaqmi mañakusqaykitapas. Qusunkitaqmi hawkayayta (Salmo 71:5; 73:28). Diosqa yanapasunkitaqmi sasachakuynikipi (Salmo 18:18). Wiñay kawsayta haypanaykipaqpas yanapasunkim (Romanos 6:23).

Diosman asuykuspanchikqa kuyaqninkunamanpas asuykunchikmi. Diosta kuyaqkunaqa qamtapas kuyasunkim. Chiqaptapunim aylluykikuna hina kanqaku. Kusikunqakum Diosmanta yachachisuspayki, yanapasunkim hinaspapas kallpanchasunkim.

Manam Dios hinachu kanchik. Dioswan kuyachikuyta munaspaqa kaytam allinta yachananchik: Diosqa wiña-wiñaypaq kawsakuqmi, manam ñuqanchik hinachu. Chaymantapas ancha yachayniyuqmi hinaspa ancha atiyniyuqmi. Payllam kamachiwaqninchikqa kanan. Chaymi paywan kuyachikuyta munaspaqa, kasukuspa munasqanta ruwananchik. Diosta kasukuyninchikqa allinninchikpaqmi (Isaias 48:18).