Kay pachapi mana allinkuna rikusqanchikmi qawachiwanchik sumaq allpapi kawsakuy hichpaykamusqantaña. Ñawpaqmantaraqmi bibliaqa nirqaña sumaq allpapi kawsakuy hichpaykamuptin sasallaña tiempokuna kananmanta. Kunanmi chay sasallaña tiempokunapi kawsachkanchik. Kaykuna pasakunanmantam bibliaqa nirqaña:

Hatun guerrakuna. ‘Huk nacionmi peleanqa huk law nacionwan chaynataq huk gobiernopas huk law gobiernowan’ (Mateo 24:7). Bibliapa Chayna willakusqanman hinam pasakurqa. 1914 watamantapacham iskay hatun guerrakuna enteron pachapi karqa chaynataq taksa guerrakunapas. Wara-waranqantin runakunam chay guerrakunapi wañurqaku.

Tukuy hinastinpi unquykuna. ‘Tukuy hinastinpim kanqa [...] unquykuna’ (Lucas 21:11). ¿Bibliapa chayna nisqan sutillachu qawakuchkan? Arí. Wara-waranqa runakunam wañurqaku cancerwan, tuberculosiswan, paludismowan, sidawan hinaspa tukuy rikchaq unquykunawanpas.

Muchuykuna. Bibliaqa niwanchikmi: ‘Kanqam [...] muchuykuna’, nispapas (Marcos 13:8). Enteron pachapim runakunaqa yarqaymanta kachkanku. Wara-waranqantin runakunam watan-watan yarqaymanta wañunku. Bibliapa willakusqanman hina chayna pasakusqanqa sutillatam qawachiwanchik sumaq allpapi kawsakuy hichpaykamusqantaña.

 Terremotokuna. “Kanqam [...] kaypi-chaypi terremotokunapas” (Mateo 24:7). Kayna nisqantaqa sutillatam kunanpas qawachkanchik. Wara-waranqantin achkallaña runakunam 1914 watamantapacha terremotokunawan wañurqaku.

Mana allin runakuna. ‘Runakunam kanqaku kikillanpaq munaqkuna, qullqilla kuyaqkuna’. ‘Dios yupaychayta qipaman churaspanku kikinkupa munasqallanpi purikuqkuna’. Churi-wawakunapas “mama-taytanku mana kasuqkuna” (2 Timoteo 3:1-5). ¿Manachu chayna kachkanku kunan tiempopi runakuna? Diostaqa manam respetankuchu hinaspapas Diosmanta yachay munaq runakunatam sasachanku.

Mana allin ruwaqkuna. ‘Tukuy mana allin ruwaqkunam llumpayta miranqa’ (Mateo 24:12). Ninkipaschá qayna watakunallamanta kay mana allinkuna llumpay mirarusqanmanta. Tukuy hinastinpim runakunaqa mancharisqallaña kachkanku suwarachikunankumanta, engañarachikunankumanta utaq imawan ñakarichisqa kanankumantapas.

Tukuy kaykunam qawachin Diospa munaychakusqan hichpaykamusqantaña. Bibliam nin: ‘[Kaykuna] sucedekuptinqa yachankichikmi Diospa munaychakusqan hichpaykamusqanta’, nispa (Lucas 21:31). Ichaqa, ¿imataq Diospa munaychakuyninqa? Hanaq pachamanta Diospa kamachimusqanmi, kamachimuspanmi kay allpa pachata kuyayllapaqta huertayachinqa. Payllañam kamachinqa manañam pi runapas kamachinqañachu (Daniel 2:44).