Dioswan kuyachikuyta munaspaqa, munasqanman hinam yupaychananchik. Jesusmi nirqa Diosta yupaychaqkunaqa “chiqap kaqman hina” yupaychanankumanta (Juan 4:23, 24, NM). Diostaqa munasqanman hinam yupaychananchik (Efesios 4:4-6). Chiqap religionqa wiñay kawsayman apaq ñanmi, pantay religionñataqmi wañuyman apaq ñan (Mateo 7:13, 14).

Chiqap yupaychaqkunataqa riqsichwanmi imayna kawsakusqankupi. Imaynam Diosqa sumaq sunquyuq, chaynam chiqap yupaychaqninkunapas sumaq sunquyuq kananku. Imaynam allin naranja plantapas allin naranjakunata rurun, chaynam chiqap religionpas ruruchkaq hina runakunata yanapan allin runakuna kanankupaq (Mateo 7:15-20).

Jehova Diosta kuyaqkunaqa bibliapa yachachisqantam kasukunku. Yachankum bibliaqa Diospa palabran kasqanta. Chaymi bibliapa yachachisqanwan yanapachikunku kawsakuyninkupi, ima sasachakuyninkutapas atipanankupaq hinaspa Diosta aswan allinta reqsinankupaqpas (2 Timoteo 3:16). Chaymantapas bibliapa yachachisqanman hina kawsanankupaqmi kallpanchakunku.

 Jehova Diosta kuyaqkunaqa kuyanakunkum. Jesusqa runakunata kuyasqantam qawachirqa Diosmanta yachachispan hinaspa unquqkunatapas sanoyachispan. Diosta chiqap yupaychaqkunapas runamasinkutam kuyanku. Jesus hinam wakchakunatapas yanapanku chaynataq huk castamanta kaqkunatapas. Jesusmi nirqa: ‘Kuyanakuptikichikmi llapallan runakuna yachanqaku discipuloykuna kasqaykichikta’, nispa (Juan 13:35).

Jehova Diospa sutintam kuyaqninkunaqa hatunchanku. Pipas sutinchikta mana rimayta munaptinqa, ¿hinallachu paypi hapipakuchwan? Manachá. Kuyasqanchik runataqa sutinmantam qayanchik hinaspam hukkunamanpas paymanta allinkunata willanchik. Chaymi, pipas Dioswan kuyachikuyta munaspanqa Diospa sutinta rimanan, hinaspam hukkunamanpas willanan. Kikin Jehova Diosmi munan chayna ruwananchikta (Mateo 6:9; Romanos 10:13, 14).

Jesus hinam, Dioswan kuyachikuqkunaqa paypa munaychakuyninmanta runakunaman yachachinku. Diospa munaychakuyninqa hanaq pachamanta kamachimusqanmi, kamachimuspanmi kay pachata kuyayllapaqta huertayachinqa. Dioswan kuyachikuqkunaqa kusikuypaq willakuytam Diospa munaychakuyninmanta runakunaman willakunku (Mateo 24:14).

Jehova Diospa testigonkunaqa Dioswan kuyachikuytam munanku. Paykunaqa Diospa palabrantam kasukunku hinaspam kuyanakunku. Chaymantapas Diospa sutintam rimanku hinaspam Diospa sutinta hatunchanku, chaymantapas Diospa munaychakuyninmantam hukkunaman yachachinku. Jehova Diospa testigonkunaqa Diostam munasqanman hina yupaychanku.