Bibliata ñawinchaspam Jehova Diostaqa riqsichwan. Ñawpa tiempokunapim Diosqa wakin runakunata akllarqa paypa piensasqanta qillqanankupaq. Chay qillqakunatam riqsinchik “biblia” nispa. Kunanqa bibliata ñawinchaspam Diostaqa riqsichwan. Chaypim Diospa yachachikuynin kachkan, chayraykum ninchik: “Bibliaqa Diospa palabranmi”, nispa. Bibliapa yachachisqanmantaqa manam iskayrayanachu Jehova Dios haykapipas imam kaqta willakusqanrayku. Payqa ‘mana llullakuq Diosmi’ (Hebreos 6:18). Diospa palabranqa imam kaqtam imamantapas willakun (Juan 17:17).

Bibliaqa Diosmanta chaskisqanchik suma-sumaq regalom. Bibliaqa kuyakuq taytapa churinkunaman cartasqan hinam. Willawanchikmi allpa pacha sumaqta huertayananmanta hinaspa chayna huertapi kawsakunanchikta Dios munasqanmantapas, willawanchiktaqmi ñawpa tiempopi hinaspa kunan tiempopi Diospa imam ruwasqanmanta chaynataq hamuq tiempopi imakunata ruwananmantapas. Yanapawanchiktaqmi sasachakuyninchikkunata atipanapaq hinaspa kusisqa kawsakunapaqpas (2 Timoteo 3:16, 17).

 Jehova Diospa testigonkunaqa Dioswanmi kuyachikunku, paykunaqa bibliamanta allinta yachanaykipaqmi yanapasunki. Paykunamanmi willakunayki bibliamanta yachay munasqaykita. Manam qullqitaqa mañasunkichu (Mateo 10:8). Chaymantapas, huñunakuyninkunamanmi riwaq. Chay huñunakuykunaqa huñunakunanku wasipim apakun, chaytam sutichanku, “Jehova Diospa testigonkunapa huñunakunanku wasi” nispa. Huñunakuykunaman rispaykiqa astawanmi Diosmanta yachanki.

Diostaqa riqsichwantaqmi tukuy unanchasqankunapi yuyaymanaspapas. Bibliam willakun ‘cielokunata hinaspa kay pachata Dios unanchasqanmanta’ (Genesis 1:1). Jehova Diosqa “cielokunata” unanchaspanmi intitapas ruwarqa. Chaynaqa, ¿imatam unanchasqankunaqa Diosmanta yachachiwanchik? Ancha atiyniyuq kasqantam. Payllam llumpa-llumpay kanchariq intita ruwananpaqqa atiyniyuq. Unanchasqankunaqa yachachiwanchiktaqmi Jehova Diosqa ancha yachayniyuq kasqantapas, intita ruwanapaqqa llumpay yachayniyuqmi kana, intiqa quñiwanchikmi hinaspapas tukuy tiempom kancharin.

Jehova Diospa tukuy unanchasqanmi kuyawasqanchikta qawachiwanchik. Kay allpapi imaymana frutakuna kasqanpi yuyaymanay. Diosqa manamá huk rikchaq frutallatachu unancharqa, aswanmi tukuy rikchaqta, hatuntaraq taksataraq, pukataraq qillutaraq, muskiptinchikpas manam chaynallachu kanku. Kaymi qawachiwanchik Jehova Dios kuyawasqanchikta, chaynataq imapas qukuykuq kasqanta hinaspa llakipayawasqanchiktapas (Salmo 104:24).