Satanaswan demonionkunaqa manam munankuchu Jehova Diosta yupaychananchiktaqa. Tukuy imatam ruwanku runakunata Diosmanta karunchananpaq. Karunchanmi pantay religionkunawan (2 Corintios 11:13-15). Huk religion bibliapa nisqanman hina mana yachachispanqa pantay religionmi. Pantasqa religionkunaqa ismu papa hinam. Ismu papaqa allin papamanmi riqchakunman, ichaqa mana imapaq valeqñam. Servichikuyta munaspaqa sasachakuypim tarikuchwan, chayna kaqllam pantay religionkunapa yachachisqankunata uyarispapas sasachakuykunapi tarikuchwan.

Pantasqa religionkunaqa manam Jehova Diostaqa kusichinkuchu. Kay pachapi Jesus kachkaptinmi religionpi punta apaqkunaqa Jesusta wañuchiyta munarqaku. Paykunaqa piensarqakum Diosta allinta yupaychasqankuta. Chaymi nirqaku: ‘Ñuqaykupa taytaykuqa Diosllam’, nispa. Ichaqa, ¿Jesusqa “allinmi” nirqachu? Manam. Payqa nirqam: “Qamkunapa taytaykichikqa diablom”, nispa (Juan 8:41, 44). Kunan tiempopas achka runakunam ninku Diosta yupaychasqankuta, ichaqa satanastawan demonionkunatam yupaychachkanku (1 Corintios 10:20).

 Ismu sachaqa manam allintaqa rurunchu, chaynam pantay religionkunapas runakunataqa allintaqa mana yanapanchu. Kay pachapi runakunaqa llumpay sasachakuypim kachkanku runamasinku mana allinkunata ruwaptinku. Kachkanmi huchapakuykuna, maqanakuykuna, suwakuykuna, ñakariykuna, wañuchinakuykuna hinaspa tukuy rikchaq mana allinpas. Chayna ruwaq runakunaqa achkam religionniyuq kanku, ichaqa religionninkuqa manam yachachinchu allinkunata ruwanankupaqqa. Manam chayna mana allin ruwaq runakunaqa Dioswanqa kuyachikunmankuchu (Mateo 7:17, 18).

Pantasqa religionkunaqa runakunatam yachachinku taytacha-mamachakunata mañakunankupaq. Diosqa manam munanchu taytacha-mamachakunata mañakunanchiktaqa. ¿Ima niwaqtaq sichu pipas ñuqanchikwan rimayta mana munaspan fotollanchikwan rimayta munaptin? ¿Allinchu chay kanman? ¿Kuyasunkichu chayna ruwaq runaqa? Manam. Jehova Diosqa munanmi payta mañakunanchikta, manam munanchu fotokunata nitaq runapa ruwasqan kaqkunata mañakunanchiktaqa (Exodo 20:4, 5).

Pantay religionkunaqa yachachinkum guerra kaptinqa runakunata wañuchinankupaq. Jesusmi nirqa Diosta kuyaqkunaqa kuyanakunankumanta. Chaymi kuyasqanchik runakunataqa mana wañuchinchikchu (Juan 13:35). Manataqmi allinchu mana allin runakunata wañuchiypas. Jesusqa chiqniqninkuna presochaptinmi mana munarqachu qatiqninkuna peleaspa payta harkakunankutaqa (Mateo 26:51, 52).

Pantasqa religionkunam yachachinku mana allin runakuna ninapi rupananmanta. Bibliaqa yachachinmi hucharayku runakuna wañusqanchikta (Romanos 6:23). Jehova Diosqa kuyakuq Diosmi. ¿Kuyakuq Diosqa yaqachu runakunata ninapi ñakarichinman? Manam. Musuq pachapiqa Jehova Diospa chaskisqan chiqap religionllañam kanqa (Apocalipsis 15:4). Satanaspa munasqanman hina yachachiq religionkunaqa chinkachisqam kanqa.