Chay sumaq allpapi kawsakuyqa manam kunan tiempopi kawsakusqanchik hinachu kanqa. Diosqa manam haykapipas munarqachu kay pachapi sasachakuy, nanay nitaq ñakariy kanantapas. Payqa hamuq punchawkunapim kay pachata sumaqta huertayachinqa. ¿Imaynam chaypi runakuna kawsakunqaku? Bibliapa nisqanta qawarisun.

Allin runakunam kanqa. Chay sumaq allpaqa Diosta kuyaqkunapa yachananmi kanqa. Kikinkupuram allinta ruwaspanku yanapanakunqaku hinaspam Jehova Diospa munasqanman hina kawsakunqaku (Proverbios 2:21).

Achkallañam mikuypas kanqa. Chay sumaq allpapiqa manam pipas yarqaymantaqa kanqachu. Bibliam niwanchik: ‘Kay pachapim achka-achka kawsaykuna qispinqa’, nispa (Salmo 72:16).

Sumaq wasikunam kanqa, kusisqataqmi llamkanqakupas. Chay sumaq allpapiqa lliw ayllukunam wasiyuq kanqaku, hinaspapas llapankum sumaq llamkayniyuq kanqaku (Isaias 65:21-23).

 Enteron pachapim hawkayay kanqa. Manañam haykapipas runakunaqa peleanqakuñachu nitaqmi guerrapas kanqañachu. Diospa palabranmi nin: ‘Guerrakunatam Diosqa tanirachin’, nispa (Salmo 46:8, 9).

Manam unquypas kanqañachu. Bibliapa nisqanman hinaqa ‘manañam mayqanninchikpas nisunñachu: “Unquchkanim” nispaqa’ (Isaias 33:24). Manañataqmi kanqachu wistukunapas, ñawsakunapas, mana uyariqkunapas nitaq upakunapas (Isaias 35:5, 6).

Manam llakikuypas nanaypas nitaq wañuypas kanqañachu. Bibliam nin: “Manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 21:4).

Mana allin runakunaqa manam kanqañachu. Jehova Diosmi niwanchik: “Mana allin ruwaqkunam ichaqa kay pachamanta chinkachisqa kanqaku. Traicionaqkunam ichaqa qura pilarusqa hina kay pachamanta qichusqa kanqaku”, nispa (Proverbios 2:22).

Runakunam hawkallaña kawsakunqaku. Manañam kanqachu ñakariypas, qullqilla kuyaypas nitaq chiqninakuypas. Runakunam huk sunqulla kanqaku, hinaspapas Diospa yachachisqanman hinam kawsakunqaku (Isaias 26:9).