Tayta-mamakunaqa kusikunkum piwi warmachanku naceptinqa. Ichaqa admirakunqakupaschá warmachankuta uywanankupaq tiemponkuta hinaspa kallpankuta servichikusqankumanta. Mana ancha samaspa pisipasqa tarikusqankuqa sasachanmanpaschá. Chaymi iskayninku tanteananku warmankuta hinaspa casado vidankuta imayna cuidanankupaq. ¿Imaynatam Bibliapa yachachikuyninkuna kaykunapi yanapasunkiman?

BIBLIAM NIN: “Pipas kuyakuyniyoqqa pacienciakuqmi, imapas qokuykuqmi, [. . .] manam kikillanpaq munaqchu, manam piñakuqchu” (1 Corintios 13:4, 5). Mamakunaqa piwi wawankuta astawan atiendenankupaqmi kallpanchakunku. Chayraykum qosanqa saqesqa hina sientekunman, chaymi mana qonqanaykichu pay atiendeytapas. Pacienciawan hinaspa kuyakuywanmi qawachiwaq necesitasqaykita hinaspa warmaykichikta cuidasqanmanta agradecekusqaykitapas.

“Qosakuna, [. . .] warmikichikwanyá allinta kawsaychik, yachaywanyá paykunawanqa kawsaychik” (1 Pedro 3:7, Chuya Qellqa, revisión 2012). Chayllaraq tayta kaspaykiqa entiendenaykim señorayki astawan warmaykichikta uywananpaq tiempochakusqanmanta, ichapas wakinpiqa llumpay pisipasqa otaq hukmanyasqapas tarikunman. Wakinpiqa ichapas qanwan piñakunman, ichaqa pacienciakunaykim. “Kallpasapa soldadomanta aswan allinqa anaq piñakuq runam” (Proverbios 16:32). Yanapakuyta necesitaptinqa yanapanaykim (Proverbios 14:29).

¿IMATAM RUWAWAQ?

• Tayta kaqkunapaq: Tutaña kaptinpas warma uywaypi señoraykita yanapay. Tiempochakuytaq imapas ruwaynikikunamanta señoraykiwan hinaspa churikiwan kanaykipaq

• Mama kaqkunapaq: Wawa uywaypi qosayki yanapakuyta munaptinqa, ama harkakuychu. Qam hina mana ruwaptinqa, ama qaqchaspayki kuyakuyllawan yachachiy

BIBLIAM NIN: “Iskayninku[m] huk runa hinallaña kanqaku” (Genesis 2:24). Wawa-churikichik naceruptinpas ama qonqaychikchu “huk runa hinallaña” señoraykiwan otaq qosaykiwan kasqaykitaqa. Anchata kallpanchakuychik casado vidaykichik mana hukmanyananpaq.

Señorakuna, qosaykichikta agradecekuychik yanapasusqaykichikmanta. Chay ruwasqaykichikqa ‘hampi hinam’ (Proverbios 12:18). Qosakuna, señoraykichikta niychik ancha kuyasqaykichikta hinaspa familiaykichikta yanapasqanrayku chaninchasqaykichiktapas (Proverbios 31:10, 28).

“Wakinkunapa allinnintam maskananchik, manam kikillanchikpa allinninchiktachu” (1 Corintios 10:24). Señoraykipa otaq qosaykipa allinninta maskay hinaspa kallpanchakusqantapas chaninchay. Tiempochakuychiktaq rimanaykichikpaq hinaspa uyarinakunaykichikpaqpas. Warmi-qari puñuynikichikpipas ama kikillaykipaq munaqqa kaychu. Yuyariy Bibliapa kayna nisqanta: “Warmikichikwan otaq qosaykichikwan kaytaqa amayá neganakuychikchu, negaspaqa-neganakuychik iskaynikichik” (1 Corintios 7:3-5). Ama iskayrayaspa chaymanta rimaychik. Pacienciakusqayki hinaspa entiendeq kasqaykim casado vidaykita allinta takyachinqa.

¿IMATAM RUWAWAQ?

• Iskayllaykichik kuska kanaykichikpaq tiempochakuyta ama qonqaychikchu

• Kuyanakusqaykichikta qawachiychik imachallatapas qonakuspaykichik

BIBLIAM NIN: “Qamqa warma kasqaykimantaraqmi Bibliapi yachachikuykunataqa yacharqanki, kay yachasqaykikunam [. . .] salvakunaykipaq servisunki” (2 Timoteo 3:15). Warmaykita imaynata yachachinaykipaq tanteay. Paykunaqa manaraq nacechkaspankupas reqsinkuñam ecoykita hinaspa imayna sientekusqaykitapas. Nacesqanmantapacha manaraq entiendeptinpas leepuy, chaynapim paypas wiñasqanman hina leeyta munanqa.

Ama piensaychu warmayki llumpay wawachallaraq kasqanrayku Diosmanta mana yachay atisqantaqa. Paywan kuska Diosta mañakuy (Deuteronomio 11:19). Kuska pukllaspaykipas Jehova Diospa unanchasqankunamanta willay (Salmo 78:3, 4). Wiñasqanman hinam Jehova Dios kuyasqaykimanta musyakunqa hinaspa paypas kuyanqa.

¿IMATAM RUWAWAQ?

• Warmaykita yachachinaykipaq Diospa yanapakuyninta mañakuy

• Warmaykipa umanpi takyananpaq kaq palabrakunata sapa kuti yuyarichiy