16 KAQ YACHACHIKUY
Diablopa contranpiyá churakuychik
“Diablopa contranpi churakuychik, hinaptinqa qamkunamantam diablo ayqikunqa” (SANTIAGO 4:7).
1, 2. ¿Imatam yachananchik satanasmantawan demoniokunamanta?
JEHOVA DIOSPA nisqanman hina kay pacha sumaq huertaña kaptinqa allinmi kawsakusunchik. Chaypiqa Diospa munasqanman hinam kawsakusunchik. Kunanmi ichaqa satanaswan demonionkuna kay pachataqa munaychakuchkanku (2 Corintios 4:4). Paykunaqa mana rikuy atina kaspankupas atiyniyuqmi kanku.
2 Kay yachachikuypim yachasunchik Jehova Dioswan kuyachikunapaq hinaspa satanaspa tuqllankunaman mana wichiykunapaq imata ruwananchikmanta. Jehova Diosqa niwanchikmi yanapawananchikmanta, ichaqa allintam yachananchik satanaspa hinaspa demoniokunapa tuqllankunamanta.
DIABLOQA LEON HINAM QAPARICHKAN
3. ¿Imatam satanasqa munachkan?
3 Satanasqa ninmi Jehova Dios imatapas quwaptillanchik kasukusqanchikmanta, nintaqmi imapas sasachakuykuna kaptinqa Diosmanta karunchakurunanchikta (qaway Job 2:4, 5). Jehova Diosta pipas riqsiyta qallaykuptinqa satanaswan demonionkunam tukuyta ruwanku Diosta amaña riqsinanpaq. Chaymantapas Jehova Diosllapaqña kawsananpaq tantiakuruptinqa hinaspa bautizakuruptinqa satanasqa llumpaytam piñakun. Chaymi biblia nin: “Diabloqa leon hinam muyuriqnikichikpi ñawrawyaspan [utaq qaparispan] purichkan pitapas mikurunanpaq”, nispa (1 Pedro 5:8). Satanasqa munachkanmi Jehova Diosmanta karunchakurunanchikta (Salmo 7:1, 2; 2 Timoteo 3:12).
Satanasqa piñasqam kachkan Jehova Diosllapaqña kawsananchikpaq tantiakusqanchikmanta.
4, 5. (1) ¿Ima ruwaytam satanasqa mana atinqachu? (2) ¿Imaynatam diablopa contranpi churakuchwan?
4 Satanastawan demonionkunataqa manam manchakunanchikchu, Jehova Diosqa manam saqinqachu satanas tukuy ima munasqanta ruwawananchiktaqa. Diosqa niwanchikmi “achkallay-achka” yupaychaqnin runakuna ‘llumpa-llumpay ñakariy’ punchawkunapi mana wañunankumanta (Apocalipsis 7:9, 14). Diospa nisqanman hinam imapas ruwakunqa, satanasqa manam harkakuyta atinqachu Diospa munasqan ruwakunantaqa.
5 Diospi allinta hapipakuptinchikqa satanasqa manam ima ruwaytapas atinqachu Diosmanta karunchawananchikpaqqa. Chaymi bibliaqa nin: “Dioswan kaptikichikqa paypas qamkunawanmi kanqa”, nispa (2 Cronicas 15:2; qaway 1 Corintios 10:13). Ñawpaq tiempopipas achka runakunam Diosmanta mana karunchakuspanku diablopa contranpi churakurqaku. Paykunam karqaku Abel, Enoc, Noey, Sara hinaspa Moises (Hebreos 11:4-40). Ñuqanchikpas Diosmanta mana karunchakuspanchikqa paykuna hinam diablopa contranpi churakuchkanchik. Diospa palabranpas niwanchikmi: ‘Diablopa contranpiyá churakuychik, hinaptinqa qamkunamantam diabloqa ayqikunqa’, nispa (Santiago 4:7).
¡AMAYÁ SATANASPA TUQLLANKUNAMANQA WICHIYKUSUNCHU!
6. ¿Imatam satanasqa ruwanqa, hinaspa imaynata?
6 Jehova Diosqa manam saqinqachu satanas tukuy ima munasqanta ruwaruwananchiktaqa, chayna kaptinpas satanasqa tukuytam ruwanqa Diosmanta karuncharuwananchikpaq. Chaypaqmi tuqllankunata servichikun, chay tuqllankunataqa waranqantin watakunañam servichikuchkan. Yachaykusunyá imakuna chay tuqllankuna kasqanmanta.
7. ¿Imanasqam satanasqa tukuyta ruwachkan Diosta mana kasukunanchikpaq?
7 Apostol Juanmi nirqa: ‘Diosta mana yupaychaq runakunaqa [...] llapallankum satanaspa munaychakusqan kachkanku’, nispa (1 Juan 5:19). Satanasmi Diosta mana kasukuq runakunataqa munaychakuchkan, munachkantaqmi Jehova Dios yupaychaqkunata munaychakuytapas (Miqueas 4:1; Juan 15:19; Apocalipsis 12:12, 17). Satanasqa yachanmi pisi tiempoyuqllaña kasqanta, chaymi tukuyta ruwachkan Diosta mana kasukunanchikpaq. Wakinpim satanaspa tuqllankunaqa sutilla, wakinpiñataq mana musyaylla.
8. Diosta yupaychaqkunaqa, ¿imatam mana qunqananchikchu?
8 Bibliam nin: ‘Peleachkanchiktaqmi hanaq pachapi kaq mana allin espiritukunapa contranpipas’, nispa (Efesios 6:12). Kaypi nisqanman hinam Jehova Diosllapaqña kawsakuyta tantiakusqanchikmantapacha satanaswan hinaspa demonionkunawan atipanakuchkanchik, chaytaqa manam qunqananchikchu. Chaymi apostol Pabloqa Efeso llaqtapi iñiqmasinkunaman qillqaspan kimsa kutikama nirqa allinta takyanankupaq (Efesios 6:11, 13, 14).
9. ¿Imatam satanaswan demoniokunaqa munachkanku?
9 Satanaswan demoniokunaqa munachkankum tuqllankunaman wichiykunanchikta. Huk kaqnin tuqllanman mana wichiykuspaqa, manam piensananchikchu wakin tuqllankunamanpas mana wichiykunanchiktaqa. Satanasqa qawamuchkanmi imapipas pantasqanchikta, chaynapi mayqan tuqllanmanpas wichiykachiwananchikpaq. Bibliam ichaqa willawanchik ima tuqllakunata servichikusqanmanta, chaynapi mayqin tuqllanmanpas mana wichiykunanchikpaq (2 Corintios 2:11; qaway 31 kaq willakuyta). Tuqllanmanqa wichiykuchwanmi layqakunaman utaq brujukunaman rispa.
DEMONIOKUNAMANTA KARUNCHAKUSUNCHIK
10. (1) ¿Imaynatam layqataqa ruwanku? (2) ¿Imatam Jehova Diosqa piensan layqa ruwaymanta?
10 Layqa ruwaqkunaqa utaq brujukunaqa demoniokunawanmi yanapachikunku, chaytam ruwanku qatipaqkunapas, suerte qawaqkunapas hinaspa wañuqkunawan rimaq tukuqkunapas. Jehova Diosqa millakunmi layqa ruwaykunataqa, manataqmi munanchu runankuna chaykunata ruwanankutaqa (Deuteronomio 18:10-12; Apocalipsis 21:8). Chaymi Diosta yupaychachkaspaqa demoniokunapa yanapakuynintaqa mana maskananchikchu (Romanos 12:9).
11. ¿Imam pasaruwachwan demoniokunamanta yachayta munaptinchikqa?
11 Runakunaqa yaqa llapallankum yachayta munanku hamuq tiempomanta utaq imapas mana yachasqanku kaqkunamanta, chaymi layqakunaman rinku hinaspa demoniokunamantapas yachayta munanku. Satanasqa munanmi ñuqanchikpas chaykunata ruwananchikta. Ichaqa chaykunata ruwaspanchikqa Diosmantam karunchakuruchwan.
SATANASQA PANTACHIYTAM MUNAWANCHIK
12. ¿Imata piensananchiktam satanasqa munan?
12 Satanasqa runakunatam pantachichkan. Pisi-pisimantam runakunata iskayrayachin ‘mana allin’ kaqkunata allinta hinaña qawanankupaq (Isaias 5:20). Satanasqa ninmi: “Bibliapa yachachikuyninkunaqa yanqapaqmi, Diosta mana kasukuspaqa aswan kusisqam runakunaqa kanqaku”, nispa. Satanasqa munanmi pay hina piensananchikta.
13. ¿Pikunatam Satanasqa iskayrayachirqa, hinaspa imaynata?
13 Satanasqa tuqllanman wichiykachiwananchikpaqmi imamantapas iskayrayananchikta munan. Eden huertapipas Diosmanta iskayrayananpaqmi Evata kaynata tapurqa: ‘¿Dioschu nisurqankichik huertapi llapa sachakunapa rurunta ama mikunaykichikpaq?’, nispa (Genesis 3:1). Jobpa tiemponpipas, satanasqa angelkunapa qayllanpim Jehova Diosta nirqa: ‘Jobqa manam tukuy sunqunmantachu servisunki, astawanqa imapasraykullam’, nispa (Job 1:9). Jesustapas iskayrayachinanpaqmi bautizakusqan qipata satanasqa kaynata nirqa: “Diospa churin kaspaykiqa kay rumikunatayá niy tantayarunanpaq”, nispa (Mateo 4:3).
14. ¿Layqa ruwaymanta runakuna imata piensanankutam satanasqa munan?
14 Kunanpas satanasqa hinallam runakunata iskayrayachispan pantachichkan. Munanmi runakuna “layqa ruwayqa manam imananchu” nispa piensanankuta. Wakin iñiqmasinchikkunapas chayna piensaytam qallaykurqaku (2 Corintios 11:3). Chaynaqa, ¿imatam ruwachwan chaynata mana piensananchikpaq? ¿Imatam ruwachwan satanas mana pantachiwananchikpaq? Qatiqninpim chaykunamanta yachasun, yachasuntaqmi satanasqa kusirikuykunawan hinaspa imawanpas hampichikuywan pantachiwasqanchikmanta.
SATANASQA IMAPAS MUNASQANCHIKTAM TUQLLATA HINA SERVICHIKUN
15. ¿Imakunam demoniokunapa ruwayninkunawan chaqrusqa kachkan?
15 Videokunapipas, pukllaykunapipas hinaspa internetpipas layqa ruwaykunamanta hinaspa demoniokunamantam willakunku. Achka runakunam chaykunawan kusikunku, ichaqa manam musyakunkuchu demoniokunamanta hamusqanta. Wakinkuqa demoniokunawanmi yanapachikuchkanku makinkuta utaq suertenkuta cocapi qawachikuspanku, pagaputa ruwaspanku hinaspa chayman rikchakuq kaqkunata ruwaspankupas. Satanasqa chay ruwaykunatam allinta hinaspa kusikunapaq hinata qawachin. Wakinkuqa piensanmankum “qawayllam-qawachkaniqa, manam chaykunataqa ruwachkanichu” nispanku. Ichaqa manam allinchu kanman chaynata piensayqa, ¿imanasqa? (1 Corintios 10:12). Chaymantayá yachaykusun.
16. ¿Imanasqam demoniokunamanta rimaq kusirikuykunawanqa mana kusirikunanchikchu?
16 Satanaswan demoniokunaqa manam ima piensasqanchiktaqa yachayta atinmankuchu. Ichaqa ñuqanchikpaq hinaspa ayllunchikpaq imakunapas akllasqanchikpim satanasqa musyanman ima piensasqanchikta hinaspa ima munasqanchikta. Layqa ruwaykunamanta hinaspa demoniokunamanta rimaq videokunawan, takikunawan utaq qillqakunawan kusirikuptinchikqa, satanaswan demoniokunaqa musyanqakum paykunamanta yachay munasqanchikta. Chayta musyaruspankuqa tanqawachwanmi layqata ruwananchikpaqpas (qaway Galatas 6:7).
17. ¿Imaynatam satanasqa unquptinchik tuqllanman wichiykachiwachwan?
17 Satanasqa unquyta mana munasqanchikta yachasqanraykum tuqllanman wichiykachiwachwan. Kunanpas achka runakunam unqunku, hinaspam wakinkuqa doctorkunaman rispankupas mana sanoyankuchu (Marcos 5:25, 26). Chayraykum manaña imatapas ruwayta atispanku layqa ruwaqkunamanña utaq curanderokunamanña rinku. Diosta yupaychaqkunam manam chaykunamanqa rinanchikchu (Levitico 19:31).
Unquspanchikqa Jehova Diospi hapipakusun.
18. Jehova Diosta yupaychaqkunaqa, ¿imakunawanmi mana hampichikunanchikchu?
18 Ñawpaq Israel nacionpim wakin runakunaqa suerte qawaqkunaman utaq qatipaqkunaman rirqaku, hinaptinmi Jehova Dios nirqa: ‘Makikichikta huqarispa mañakamuwaptikichikpas qamkunamantam ñawiyta asurichini. Maynataña mañakamuwaptikichikpas manam uyarisqaykichikchu’, nispa (Isaias 1:15). Kaypi nisqanman hinam, chay ruwasqankuqa Jehova Diospaqqa llumpay mana allin karqa, chaymi mañakusqankutapas mana uyarirqachu. Jehova Dioswan manaña kuyachikunapaq hinaspa manaña yanapawananchikpaq hinaqa manam imatapas ruwananchikchu, astawanraqmi unquspanchikqa (Salmo 41:3). Chaymi unquspanchikqa, imayna hampichikunanchikmanta sumaqtaraq yachaykunanchik chaynapi layqa ruwaykunawan mana hampichikunapaq (Mateo 6:13). Layqa ruwaykunawan hampiwananchikmanta yacharuspanchikqa, manam chaykunawanqa hampichikunanchikchu (qaway 32 kaq willakuyta).
¡AMAYÁ DEMONIOKUNAMANTAQA WILLAKACHAKUSUNCHU!
19. ¿Imanasqam achka runakuna satanasta manchakunku?
19 Wakin runakunaqa ninkum: “Satanaswan demoniokunaqa manam kanchu, chayqa yanqam”, nispanku. Wakinkum ichaqa imapas pasarusqanrayku ninku satanaswan demoniokunaqa kasqanmanta. Achka runakunam manchakunku demoniokunata. Wakinkuqa imapas kaptinmi ninku “kayqa chikim” nispa, hinaspam manchakunku imapas pasarunanta. Wakinkuñataqmi demoniokuna runakunata ñakarichisqanmanta willakachakuspanku hukkunata manchachinku. Wakinkuqa munankum chay willakuykunamanta uyariyta, hinaspam hukkunamanpas willakachakunku. Chaykunaraykum runakunaqa satanasta manchakunku.
20. ¿Imaynatam satanasmanta llullakunata willakachakuyta qallaykuchwan?
20 Satanasqa munanmi payta manchakunanchikta (2 Tesalonicenses 2:9, 10). Chaymi demoniokunamanta yachay munaq runakunataqa pantachin, chayraykum runakunaqa ninku “almatam rikuramuni” utaq “wañukuqpa econtam uyariramuni” nispa. Chaykunamantam hukkunamanpas willakachakunku. Willakusqankuman hinam wakinkuqa yapa-yaparispaña willakunku. Ñuqanchikpas chaykunamanta willakachakuspanchikqa runakuna satanasta manchakunankupaqmi yanapakuchkachwan (Juan 8:44; 2 Timoteo 2:16).
21. ¿Imamantam willakuchwan demoniokunamanta willakachakunamantaqa?
21 Demoniokuna mancharichiwaptinchikqa manam hukkunamanqa willakachakunanchikchu. Diosta yupaychaqkunaqa manam satanastawan demoniokunataqa manchakunanchikchu. Paykunata manchakunamantaqa, Jesuspi yuyaymanasun, hinaspa paymanta chaynataq Jehova Dios atiy qusqanmanta willakusun (Hebreos 12:2). Jesuspas manam qatiqninkunamanqa demoniokunamantachu willakurqa, aswanqa Diospa munaychakuyninmanta hinaspa ‘admirakuypaq ruwasqankunamantam’ willakurqa (Hechos 2:11; Lucas 8:1; Romanos 1:11, 12).
22. ¿Imapaqmi kallpanchakunanchik?
22 Satanasqa tukuytam ruwanqa Diosninchikmanta karunchakunanchikpaq. Kunanmi yacharunchik Diosmanta karunchawananchikpaq layqa ruwaykunata servichikusqanmanta. Chaymi layqakunamanqa mana rinanchikchu, manataqmi chaykunawanqa kusirikunanchikchu nitaq chaykunamantaqa willakachakunanchikchu, chaypaqqa anchatam kallpanchakunanchik (qaway Efesios 4:27). Satanaspa contranpi churakuspanchikqa, manam tuqllankunamanqa wichiykusunchu, hinaspapas manam iskayrayasunchu Jehova Dios yanapawananchikmantaqa (Efesios 6:11).