Jehova Diosta hinaspa palabranta kuyaqkunapaq:

Jesusmi nirqa: ‘Chiqapmantam yachankichik hinaptinmi chay chiqap yachasqaykichik librasunkichik’, nispa (Juan 8:32). Yuyariy bibliapa chiqap yachachikuyninkunata yacharuspayki imayna tarikusqaykimanta. Llulla runakunapa chawpinpi kawsaspanchikpas imam kaqtam bibliamanta yacharurqanchik, chaymi kusisqa tarikunchik (2 Timoteo 3:1).

Jehova Diosqa munanmi bibliamanta iman kaqta yachananchikta. Ñuqanchikpas runakunata kuyasqanchikraykum munanchik chay yachasqanchikkunamanta willayta. Ichaqa, ¿runakunaman willaspallachu Diospa munayninta ruwasunchik? Manamá. Diospa munaynintaqa ruwasuntaqmi wakin kamachikuyninkunatapas kasukuspanchik. Chaypaqqa anchatam kallpanchakunanchik. Jesusmi nirqa Jehova Dios kuyasqanchikta imaynata qawachinamanta. Nirqam: “Ñuqaqa taytaypa kamachikuyninkunata kasukuspaymi taytaypa kuyasqan runa hina kawsakuni, chaynam qamkunapas kamachisqaykunata kasukuspaykichikqa ñuqapa kuyasqay runakuna hina kawsakunkichik”, nispa (Juan 15:10).

Jesusqa taytanta anchata kuyasqanraykum tukuy ima kamachisqanta kasukurqa. Chaymi Jesus hina kananchikpaq kallpanchakunanchik. Chaypaq kallpanchakuptinchikqa Jehova Diosninchikmi kuyawasunchik, ñuqanchikpas kusisqam kasunchik. Jesuspas nirqam: “Kaykunata yachaspaykichik hinaspa chayman hina kawsaspaykichikqa kusisqam kankichik”, nispa (Juan 13:17).

Munanikum kay qillqapa yanapakuyninwan bibliapa nisqanman hina kawsakunaykita hinaspa Dioswan kuyachikunaykitapas. Diostam mañakuniku payta hinalla kuyanaykipaq hinaspa paypas ‘hinalla kuyasunaykipaq’, chaynapi wiñay kawsayta chaskinaykipaq (Judas 21).