10 YACHACHIKUY
¿Yanapasunkimanchu Jehova Diospa testigonkunapa huñunakuyninman riynikiqa?
¿Rirqankiñachu Jehova Diospa testigonkunapa huñunakuyninman? Haykaqpas manaraq rispaykiqa chayman riytaqa manchapakunkipaschá. Ichapas ninki: “¿Imatataq huñunakuyninkupiqa ruwanku? ¿Imanasqataq huñunakuyninkumanqa rinkupuni? ¿Allinchu kanman riyniy?”, nispa. Kay yachachikuypim yachasun huñunakuykunaqa Jehova Diosman asuykunaykipaq chaynataq kusisqa kawsakunaykipaq yanapasunaykimanta.
1. ¿Imapaqtaq Jehova Diospa testigonkunaqa huñunakuniku?
Huñunakunikuqa Jehova Diosta hatunchanaykupaqmi (Salmos 26:12). Chaywanmi ancha kusisqa tarikuniku. Enteron allpa pachapim sapa semana huñunakuniku Jehova Diospaq takinaykupaq, mañakunaykupaq hinaspa paymanta yachanaykupaq. Chaymantapas watapim kimsa kutita hatun huñunakuykunapi kaniku.
2. ¿Imakunamantam huñunakuyniykupi yachanki?
Huñunakuyniykupiqa bibliapi nisqanmantam allintapuni yachachinku (leey Nehemias 8:8). Chayman rispaykiqa Jehova Dios imayna sunquyuq kasqanmantam astawan yachanki. Kuyasusqaykimanta yachaspaykim payman astawan asuykunki. Yachankitaqmi kamachikuyninkunamanta, chayqa yanapasunkim kusisqa kawsakunaykipaq (Isaias 48:17, 18).
3. ¿Imayna runakunatataq huñunakuyniykuman rispaykiqa riqsinki?
Jehova Diosmi kamachiwanchik kuyanakunapaq, allin kaqta ruwanapaq kallpanchanakunapaq hinaspa huñunakunapaq (Hebreos 10:24, 25). Huñunakuykunapim riqsinki kuyakuqllaña runakunata, paykunapas Diosmanta yachanankupaqmi kallpanchakuchkanku. Kallpanchasqataqmi kanki bibliamanta yachachikuykunata uyarisqaykiwanpas (leey Romanos 1:11, 12). Chaypiqa rimawaqtaqmi casado kaqkunawan, musu-sipaskunawan sasachakuyninkuta imayna atipasqankumanta. Allinninchikpaq kasqanraykum Jehova Diosqa huñunakunanchikta munan.
ASTAWAN YACHAYKUSUN
Yachaykusun Jehova Diospa testigonkunapa huñunakuynin imayna kasqanmanta, chaynataq chayman riyniki imanasqa ancha allin kasqanmanta.
4. Jehova Diospa testigonkunapa huñunakuynin
Ñawpa tiempopim Jesuspa qatiqninkuna huñunakuqku Jehova Diosta hatunchanankupaq (Romanos 16:3-5). Leeychik Colosenses 3:16 hinaspa qatiqninmanta rimariychik:
-
Jesuspa qatiqninkunaqa, ¿imaynatam Diosta yupaychaqku?
Kunanpas testigokunaqa Diosta yupaychanankupaqmi huñunakunku. Huñunakuykuna imayna kasqanmanta yachanaykipaq VIDEOTA qawaykuychik. Dibujotapas qawaykuspa qatiqninmanta rimariychik:
-
Colosenses 3:16 nisqanman hinaqa, ¿Diosta serviqkuna ñawpaq tiempo huñunakusqankuqa imakunapitaq testigokunapa huñunakusqankuwan tupan?
-
Videopi chaynataq dibujopi qawasqaykiman hinaqa, ¿imataq huñunakuyniykumanta gustasunki?
Leeychik 2 Corintios 9:7 hinaspa qatiqninmanta rimariychik:
-
¿Imanasqataq testigokunaqa qullqita mana mañanikuchu huñunakuyniykupi?
Yachachisuqnikiwan qawaykuychik kay semanapaq huñunakuypi imakunamanta yachanapaq kasqanta.
-
Chay yachachikuykunamanta, ¿mayqintataq astawan yachaykuyta munawaq?
Yachaykunaykipaq
Internetpim jw.org niqpi imay punchawpi, imay horapi chaynataq maypi huñunakusqaykuta qawawaq.
-
Huñunakuypim bibliawan yachachiwanku, videokunatam qawaniku, yachanikutaqmi Diosmanta imayna willakuytapas. Qallarinikum chaynataq tukunikum takispayku hinaspa mañakuspayku.
-
Wakin yachachikuypiqa huñunakuypi kaqkunam entiendesqankumanta rimarinku.
-
Huñunakuykunamanqa rinmanmi qarikunapas, warmikunapas, warmakunapas, yuyaqkunapas.
-
Huñunakuykunapiqa manam qullqitaqa mañanikuchu.
5. Huñunakuykunaman rinapaqqa tiempochakunam
Jesusmi tayta-mamanwan, sullkachankunapiwan Nazaretmanta Jerusalenpi temploman sapa wata riqku chakillawan, yaqa kimsa punchaw puriyta. Leeychik Lucas 2:39-42 hinaspa qatiqninmanta rimariychik:
-
¿Jerusalenman riyninkuqa sasachu kanman karqa?
-
¿Imakunataq qamta sasachasunki huñunakuykunaman rinaykipaq?
-
Huñunakuykunaman rinaykipaq kallpanchakusqaykiqa, ¿allinnikipaqchu kanman?
Bibliam niwanchik huñunakuspa Jehova Diosta yupaychanapaq. Leeychik Hebreos 10:24, 25 hinaspa qatiqninmanta rimariychik:
-
¿Imanasqataq huñunakuykunaman sapa kutilla rinanchik?
WAKIN RUNAKUNAM NINKU: “Diosta yupaychanapaqqa manam hukkunawanraqchu huñunakunanchik. Wasillanchikpipas Diostaqa yupaychachwanmi”, nispanku.
-
¿Ima textopitaq niwanchik Diosqa huñunakunanchikta munasqanta? ¿Pikunataq ñawpaq tiempopi kallpanchakurqaku huñunakunankupaq?
YUYARIYKUSUN
Huñunakuykunaman rispaykiqa Jehova Diosmantam astawan yachanki, paymanmi asuykunki chaynataq hukkunawanmi yupaychanki.
¿Ima niwaqtaq?
-
¿Imanasqataq Jehova Diosqa niwanchik huñunakunanchikpaq?
-
¿Imakunamantam yachanki Jehova Diospa testigonkunapa huñunakuyninpiqa?
-
¿Imakunapiraqmi yanapasunkiman huñunakuyman risqaykiqa?
ASTAWAN YACHANAYKIPAQ
¿Manchapakunkichu huñunakuyman riyta? Steve sutiyuq runam chayna tarikurqa. Kay videopim qawanki huñunakuyman riptin imaynata chaskiykusqankumanta.
Videopim qawanki huk musu huñunakuyman rinanpaq imakunapi kallpanchakusqanmanta.
Huñunakuyman rinanmanta musu-sipaskunapa ima nisqankuta kay yachachikuypi leey.
“¿Imanasqataq ancha allin huñunakuyninchikkunaman riyqa?” (Tarinkim jw.org nisqanpi)
Kaypim yachanki mana allin vidapi kawsaq suwa runa huñunakuyman rispan imaynaña kawsakusqanmanta.
“Armayta apakuykuspam maymanpas riq kani” (Willakuq, septiembre-octubre 2014)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
