14 YACHACHIKUY
¿Imayna yupaychananchiktataq Diosqa munan?
Pasaq yachachikuypi yachamusqanchikman hinaqa Diosqa manam lliw religionkunatachu chaskin. Chaynaqa Jehova Diosqa ¿imayna yupaychananchiktataq munan utaq ima religiontataq chaskin? (Santiago 1:27; willakuy). Qawaykusun chaymanta bibliapi ima nisqanta.
1. ¿Ima qillqataq yachachiwanchik Diosta imaynata yupaychanapaq?
Diosta imaynata yupaychanapaqqa bibliapim yachachiwanchik. Jesusmi Diosta nirqa: “Palabraykiqa chiqapmi”, nispa (Juan 17:17). Wakin religionkunapiqa bibliamanta yachachinankumantaqa piensasqankuman hinaspa munasqankuman hinallam yachachinku. Ichaqa Jehova Diosqa manam munanchu kamachikuyninkunata qipanchaspanku munasqankuman hina yupaychanankutaqa (leey Marcos 7:9). Bibliapi nisqanta kasukuptinchikmi ichaqa Diosqa anchata kusikun.
2. ¿Imaynata yupaychananchiktataq Diosqa munan?
Diosqa unanchawaqninchik kasqanraykum payllata yupaychananchikta munan (Apocalipsis 4:11). Diosqa manamá munanchu taytacha-mamachakuna yupaychananchiktaqa, nitaq chaykunata servichikuspa payta yupaychanataqa (leey Isaias 42:8).
Jehova Diosqa munan munasqanman hina ‘chuyay-chuyay’ yupaychananchiktam (Romanos 12:1). Chaypaqqa kamachikuyninkunatam kasukunanchik. Chaymi warmi-qari kuska kawsakuyta munaspaqa casarakunanchikpaq niwasqanchikta kasukunchik. Diosta serviqkunaqa manataqmi sinkakunchikchu, cigarrotapas pitanchikchu, cocatapas akunchikchu nitaq drogakunchikchu. a
3. ¿Imanasqataq huñunakunanchik Jehova Diosta yupaychaqkunawan?
Iñiqmasinchikkunawan sapa semana huñunakuspam Diosta ‘hatunchanchik’ (Salmos 111:1, 2). Diostaqa hatunchanchiktaqmi chaypi takispanchik (leey Salmos 104:33). Jehova Diosqa kuyawaspanchikmi huñunakunanchikpaq kamachiwanchik, chaypi uyarisqanchikmi yanapawasun wiñaypaq kusisqa kawsakunapaq, chaymantapas iñiqmasinchikkunawanmi kallpanchanakunchik.
ASTAWAN YACHAYKUSUN
Kaypim yachaykusun imanasqa taytacha-mamachakunata mana yupaychanamanta, hinaspa Diosta yupaychanapaqpas mana servichikunamanta. Yachasuntaqmi munasqanman hina Diosta imaynata yupaychanamantapas.
4. Diosta yupaychanapaqqa manam taytacha-mamachakunataqa servichikunachu
¿Imanasqataq Jehova Dios mana munanchu taytacha-mamachakunata servichikunata? Chaymanta yachanapaq VIDEOTA qawaykuychik, hinaspa qatiqninmanta rimariychik:
-
Ñawpaq tiempopi Israelpa miraynin runakuna taytachata ruwakuruspanku Diosta yupaychasqankuqa ¿allinchu karqa?
Wakin runakunaqa taytachakunata mañakuspankum Diosman asuykusqankuta piensanku. Chaywanqa ¿manachu Diosmanta astawan karunchakuchkanmanku? Leeychik Exodo 20:4-6 hinaspa Salmos 106:35, 36, chaymantañataq qatiqninmanta rimariychik:
-
¿Imakunatataq runakuna servichikunku Diosta mañakunankupaq?
-
¿Jehova Diosqa munanchu taytachakuna mañakunata?
-
Qamqa ima ninkitaq, ¿allinchu kanman taytachakunata mañakuyqa?
5. Jehova Diosllata yupaychayqa librawanchikmi pantay yachachikuykunamanta
Qawaykusun Jehova Diosllata yupaychayqa imanasqa pantay yachachikuykunamanta librawasqanchikta. VIDEOTA qawaykuychik.
Leeychik Salmos 91:14 hinaspa qatiqninmanta rimariychik:
-
Jehova Diosta kuyaspa payllata yupaychaptinchikqa, ¿imaynatam yanapawasun?
6. Huñunakuykunapim Diosta yupaychanchik
Huñunakuykunapi takispa hinaspa rimarispam Jehova Diosta hatunchanchik hinaspa iñiqmasinchikkunawanpas kallpanchanakunchik. Leeychik Salmos 22:22 hinaspa qatiqninmanta rimariychik:
-
¿Kallpanchasunkichu huñunakuykunapi iñiqmasinchikkunapa rimarisqankuta uyarisqayki?
-
¿Qampas munawaqchu huñunakuykunapi rimariyta?
7. Jehova Diosqa munanmi paymanta yachasqanchikkunata runamasinchikkunaman willakunanchikta
Maypiña tarikuspanchikpas Diosmantam runamasinchikman willakuchwan. Leeychik Salmos 9:1; 34:1, hinaspa qatiqninmanta rimariychik:
-
Bibliapi yachamusqanchikkunamanta, ¿mayqinmantataq runamasinchikkunaman willakuwaq?
WAKIN RUNAKUNAM NINKU: “Allin runa kaptinchikqa Diosqa chaskiwasunmi imaynataña yupaychaptinchikpas”, nispanku.
-
Qamqa ¿ima ninkitaq?
YUYARIYKUSUN
Diosninchikqa kusikunmi payllata yupaychaptinchik, huñunakuykunapi rimariptinchik chaynataq takiptinchik, kusikuntaqmi paymanta yachasqanchikkunata runamasinchikkunaman willakuptinchikpas.
¿Ima niwaqtaq?
-
¿Ima qillqataq yachachiwanchik Diosta imaynata yupaychanapaq?
-
¿Imanasqataq Jehova Diosllata yupaychananchik?
-
¿Imanasqataq huñunakunanchik Jehova Diosta yupaychaqkunawan?
ASTAWAN YACHANAYKIPAQ
Kay warmicham willakun taytacha-mamachata manaña yupaychasqanmanta. Willakusqanta leeykuy “Manañam taytacha-mamachataqa yupaychaniñachu” niqpi.
“Bibliam imayna kawsasqankuta cambiarqa” (Tarinkim jw.org nisqanpi)
¿Imakunamantataq huñunakuykunapi rimariwaq? Chaymanta kaypi leeykuy.
“Jehova Diostayá hatunchasun huñunakuykunapi rimarispa” (Willakuq, enero 2019)
Kay musum huñunakuyman rinanpaq sasachakuq. Huñunakuykuna imayna yanapasqanmanta yachanaykipaq videota qaway.
Achka runakunam piensanku Diosta yupaychanapaqqa cruzta servichikunamanta. ¿Ñuqanchikpas servichikunanchikchu? Chaymanta kaypi leeykuy.
“¿Imanasqam testigokunaqa cruzta mana servichikunkuchu?” (Tarinkim jw.org nisqanpi)
a Qipa yachachikuykunapim kaymantaqa astawan yachachkasun.
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
