Jesusmi llapallan “iñiqkunapa uman” (Efesios 5:23). Paymi ‘allin ruwaq yuyayniyuq sirvientewan’ yanapawanchik (leey Mateo 24:45). Chay ‘sirvientetaqa’ kikin Jesusmi churarqa iñiqkunamanta nanachikunanpaq. Chaywanpas paykunaqa Jesustam kasukunku, hinaspapas lliw iñiqkunatam yanapanku. Chaynaqa, ¿pitaq chay sirvienteqa? Hinaspa ¿imaynatataq yanapawanchik?

1. ¿Pitaq “allin ruwaq yuyayniyuq sirvienteqa”?

Jehova Diosqa ñawpa tiempomantapacham runakunata akllarqa yupaychaqninkunata yanapananpaq (Malaquias 2:7; Hebreos 1:1). Jesuspa wañukusqan qipamanpas apostolkunawanmi hinaspa iñiqkunapi punta apaqkunawanmi iñiqkunata yanaparqa (Hechos 15:2). Chaynam kunan tiempopipas Diosqa llaqtanpi punta apaqkunawan iñiyninchikpi hinaspa Diosmanta willakuyninchikpi yanapawanchik. Paykunam Jesuspa churasqan “allin ruwaq yuyayniyuq sirvienteqa” (Mateo 24:45a). Paykunatam chuya espiritunwan Dios akllarun hanaq pachamanta Jesuswan kuska kamachimunankupaq.

2. ¿Imaynatam “allin ruwaq yuyayniyuq sirvienteqa” yanapawanchik?

Jesusmi nirqa “allin ruwaq yuyayniyuq sirvienteqa” iñiqmasinkunata tiempollanpi mikuchichkaq hina Diosmanta yachachinanpaq churasqa kasqanta (Mateo 24:45b). Imaynam mikuypas kallpata quwanchik, chaynam Diosmanta yachachiwasqanchikpas kallpanchawanchik Diospi hinalla hapipakunapaq hinaspa Diosmanta willakunapaq (1 Timoteo 4:6). Chaykunatam mikuyta hina chaskinchik huñunakuykunapi, asambleakunapi, qillqanchikkunapi hinaspa videokunapi. Chaykunam yanapawanchik Jehova Diospa munasqanta allinta yachaspa payman sunqu kanapaq.

 ASTAWAN YACHAYKUSUN

3. Diosta serviqkunaqa allin organizasqam kananku

Diospa llaqtanpi punta apaqkunataqa Jesusmi yanapan imatapas tantianankupaq, chaynam apostolkunapa tiemponpipas karqa. VIDEOTA qawaykuychik.

Leeychik 1 Corintios 14:33, 40 hinaspa qatiqninmanta rimariychik:

• Kay leesqanchikman hinaqa, ¿serviqninkuna imayna kanantataq Diosqa munan? ¿Allinchu qampaq?

4. ‘Allin ruwaq yuyayniyuq sirvientem’ yanapawanchik Diosmanta willakunapaq

Apostolkunapa tiemponpi iñiqkunapaqqa Diosmanta willakuyninkum aswan allin karqa. Leeychik Hechos 8:14, 25 hinaspa rimariychik:

• ¿Pikunataq ñawpaqtaqa Diosmanta willakunankupaq tantiaqku?

• ¿Imatam Pedrowan Juan ruwarqa apostolkuna kamachiptin?

Jehova Diospa llaqtanpi punta apaqkunapa imapas tantiasqankumanta aswan allinqa Diosmanta willakuymi. VIDEOTA qawaykuychik.

 Jesusmi nirqa Diosmanta willakuy ancha allin kasqanta. Leeychik Marcos 13:10 hinaspa qatiqninmanta rimariychik:

• ¿Imanasqataq Diospa llaqtanpi punta apaqkunaqa astawan kallpanchawanchik Diosmanta willakunapaq?

• ¿Imanasqataq necesitanchik Diosmanta willakuyninchikpi ‘allin ruwaq yuyayniyuq sirviente’ yanapawananchikta?

5. Allinninchikpaqmi tantianku

Diospa llaqtanpi punta apaqkunam enteron pachapi iñiqkunata yanapawanchik. ¿Imaynatam tantianku imatapas willawananchikpaq? Chaypaq yachaykusun apostolkunapa tiemponpi ima ruwasqankumanta. Leeychik Hechos 15:1, 2 hinaspa qatiqninmanta rimariychik:

• ¿Imapitaq apostolkunapa tiemponpi iñiqkunaqa mana acuerdopichu karqaku?

• ¿Pimantaq chaymanta rimanankupaq rirqaku?

Leeychik Hechos 15:12-18 hinaspa 23-29, chaymantañataq qatiqninmanta rimariychik:

• ¿Imatam Diospa llaqtanpi punta apaqkuna ruwarqaku tantiasqankupi Dios yanapananpaq? (Kaqmanta leeychik 12, 15 hinaspa 28 versiculokunata).

Leeychik Hechos 15:30, 31 hinaspa 16:4, 5, chaymantañataq qatiqninmanta rimariychik:

• ¿Imatam iñiqkuna ruwarqaku Diospa llaqtanpi punta apaqkunapa tantiasqanta yacharuspanku?

• ¿Imaynatam Dios bendecirqa kasukusqankurayku?

Leeychik 2 Timoteo 3:16 hinaspa Santiago 1:5, chaymantañataq qatiqninmanta rimariychik:

• Kunan tiempopi Diospa llaqtanpi punta apaqkunaqa, ¿imatam ruwanku imapas tantiasqankupi Dios yanapananpaq?

 YUYARIYKUSUN

“Allin ruwaq yuyayniyuq sirvienteqa” Diospa llaqtanpi punta apaqkunam. Paykunatam Jesus churarqa iñiyninchikpiwan Diosmanta willakuyninchikpi yanapawananchikpaq.

¿Ima niwaqtaq?

• ¿Pitaq churarqa ‘allin ruwaq yuyayniyuq sirvienteta’?

• ¿Imaynatam paykunaqa yanapawanchik?

• ¿Diospa llaqtanpi punta apaqkunachu kanku ‘allin ruwaq yuyayniyuq sirviente’?