KAYPI piensariy: Sapa punchaw llamkasqaykimantam samarinaykipaq kaq punchawpi kachkanki, pisipasqa kasqaykiraykuchá punchawkama puñuyta munanki, ichaqa kallpata qusunaykipaq Jehova Diosta mañakuykuspam paymanta willakuq lluqsinki. Diosmanta willakusqaykipiñataqmi compañasunki Diosta unay watakunaña yupaychaq yuyaqña iñiqmasinchik, payqa tukuy sunqunwan Diosta hinalla yupaychananpaqmi kallpanchakun. Wasin-wasin risqaykiman hinam enteron allpa pachapi kaq iñiqmasinchikkunapi piensanki, paykunapas qam hinam Diosmanta willakuchkanku. Willakusqaykimanta wasikiman kutispaqa kusisqallañam sientekunki, mana lluqsispaqa manachá chayna kusisqaqa tarikuwaqchu.

Dios imayna kamachimunanmanta willakunapaqmi Jesucristo yanapawachkanchik. Paymi willakurqa tukupay tiempopiqa Diosmanta tukuy hinastinpi willakunanchikmanta (Mat. 24:14). ¿Imaynatam chayna nisqanqa cumplikuchkan? Kay 2 kaq partepim yachasunchik Jehova Diosta yupaychaqkunaqa imaynakunata hinaspa imakunata servichikuspa Diosmanta willakusqanchikmanta. Chayna willakusqanchikmi wara-waranqantin runata yanapachkan Jesucristoña kamachimusqanmanta yachanankupaq.