JESUSQA llakikuq runa kaspanmi amistadnin Lazaro wañukuptinpas waqallarqa. Jehova Diosqa, ¿llakikunmanchu karqa churin Jesus wañukuptin?... Arí, chaymi bibliapi nin payqa ‘llakikuq’ Dios kasqanta (Salmo 78:40, 41; Juan 11:35).

Mayna-maynataya Jehova Diosqa llakikurqa kuyasqan churinpa wañukusqanwanqa ¿aw?... Chayraykuchá Jesusqa wañuy patanpi kachkaspan nirqa: ‘Taytáy makikipim kawsakuyniyta churani’, nispa (Lucas 23:46).

Jesusqa yacharqam “sepulturamanta” utaq allpapa sunqunmanta taytan kawsarichinanmantaqa. Jesusmantam bibliapiqa nirqaña ‘sepulturapiqa mana saqisqa kananmanta hinaspa aychanpas mana ismunanmanta’. Chayna kasqanmantam apostol Pedropas Jesuspa kawsarisqan qipallanta willakurqa (Hechos 2:31; Salmo 16:10). Arí, Jesuspa cuerponqa manam unaychu pampasqaqa karqa, chaymi mana ismurqachu nitaq asnarirqachu.

 Jesusqa manaraq wañukuchkaspanmi qatiqninkunaman nirqa: ‘Runapa churinqa [...] kimsa punchawmantam kawsarimunqa’, nispa (Lucas 9:22). Chayta qatiqninkuna yachachkaspankuqa, ¿iskayrayarqakuchu kawsarimunanmanta?... Chaymantayá yachaykusun.

Jesusqa viernes punchawtam kimsa hora tarde lawta qirupi warkusqa wañukurqa. Josey sutiyuq apu runam mana runakunapa yachasqallan Jesuspi iñirqa, chaymi Jesuspa wañukusqanta yacharuspan Pilatoman rirqa Jesuspa cuerponta mañakuq. Chaymantam qaqapi tuqusqa sepulturapi pamparurqa.

Chay sepulturapi Jesusta churaykuspanmi hatun rumiwan punkunta harkarachirqa. Domingo punchawñataqmi sepulturapa punkunpi sacerdotekunapa kachasqan soldadokuna achikyarurqaku. ¿Imanasqataq sacerdotekunaqa sepulturata cuidanankupaq soldadokunata kacharqaku?...

Jesuspa cuerponta qatiqninkuna suwaruspa “kawsarirunmi” nispa ama ninankupaqmi. Soldadokuna chaypi kachkaptinkum qunqayllamanta allpa kuyuyta qallaykuptin llipyay hina kancharichkaq angel rikurirurqa. Chaymi soldadokunaqa manchakuymanta mana imanakuytapas atirqakuchu. Chay angelñataqmi sepulturapa hatun ruminta suchurachirqa, Jesuspa cuerponmi ichaqa manaña kasqañachu.

¿Imanasqaya? Apostol Pedrom nirqa: “Jesustaqa Diosmi kawsarirachirqa”, nispa (Hechos 2:32). Arí, Diosmi Jesustaqa kawsarirachirqa, hinaspanmi espiritu cuerpota quykurqa angelkuna hinaña kananpaq (1 Pedro 3:18). Ichaqa, ¿imaynatam runakuna qawananpaqqa rikuriykuq?... Aycha cuerpoman rikurispanmi.

 Inti qispimuytaqa manañam soldadokunaqa karqañachu. Ichaqa Maria Magdalenawan Jesuspa qatiqnin wakin warmikunam sepulturaman richkarqaku kaynata ninakuspanku: “¿Pillaraq asuchipuwasun sepulturapa punkunpi rumitaqa?”, nispanku (Marcos 16:3). Hinaptinmi sepulturaman chayaruptinkuqa rumiqa asuchisqaña kachkasqa chaynataq Jesuspa cuerponpas manaña kasqachu. Chaymi Maria Magdalenaqa utqaylla kallparqa Jesuspa apostolninkunaman willakuq.

Wakin warmikunañataqmi uyarayaspanku hinallapi karqaku. Hinaptinmi qunqayllamanta llipipipichkaq pachayuq iskay angelkuna rikuriramuspa warmikunata nirqaku: ‘Jesusqa nisqanman hinam kawsarirunña. Utqayman rispaykichikyá qatiqninkunaman willamuychik’, nispa. Chaymi warmikunaqa chakinkupas pisisqa willakuq rirqaku, hinaspam ñanpi huk runawan tuparurqaku. ¿Pitaq karqa?...

Jesusmi. Aycha cuerpopi rikuriykuspanmi nirqa: “Rispaykichikyá wawqiykunaman willamuychik”, nispa. Chaymi warmikunaqa kusisqallaña chayaruspanku Jesuspa qatiqninkunata nirqaku: ‘¡Rikuramunikum! ¡Jesusqa kawsachkanmi!’, nispa. Ñam Pedromanwan Juanmanqa Maria Magdalena willarurqaña pampasqanku uchkupiqa Jesus mana kasqanta. Chaymi paykunaqa kay dibujopi qawasqaykiman hina qawaq rispanku mana ima niytapas atirqakuchu wankusqanku telakunallataña tariruspa. Ichaqa chaykunata qawaspankupas iskayrayarqakum.

Hina chay domingo punchawllam Jesusqa iskay qatiqninkunaman rikuriykurqa Emaus sutiyuq llaqtachaman richkaptinku. Paykunawan rimastin riptinpas paykunaqa manam Jesustaqa riqsirqakuchu huk cuerpoyuqña kasqanrayku. Ichaqa mikunankupaq Diosta mañakuyta qallaykuptinmi chayraq riqsirurqaku.  Chaymi anchata kusikuspanku chaylla karu-karuta Jerusalenman kutirqaku. Jesusqa ichapas chay punchawlla Pedromanpas kawsariramusqanta yachananpaq rikuriykurqa.

Tutaykuqtapas Jesusqa qatiqninkuna punkuta wichqakuruspa kachkaptinkum qunqayllamanta chawpinkupi rikurirurqa. Chaywanmi kawsariramusqanmantaqa manaña iskayrayarqakuchu. ¡Mayna-maynataya kusikurqaku Jesuspa kawsarisqanwanqa! (Mateo 28:1-15; Lucas 24:1-49; Juan 19:38–20:21).

Jesusqa tawa chunka punchawmi kawsarimusqanta yachanankupaq qatiqninkunaman mana chayna cuerpollapichu  rikuriykuq. Chaymantañam taytanpa kasqanman hanaq pachaman kutikurqa (Hechos 1:9-11). Chaymantapacham Jesuspa qatiqninkunaqa lliw runakunaman willakurqaku Jesus kawsariramusqanmanta. Sacerdotekuna maqaptinkupas utaq wañuchiptinkupas manam upallarqakuchu. Yacharqakum wañuptinkupas Diosqa Jesusta hina kawsarichinankuta.

Kunan tiempopi runakunaqa Jesusta yuyarinankupaqmi tukuy rikchaq costumbrekunata ruwanku. Wakin nacionkunapiqa conejochakunapi hinaspa pintasqa runtuchakunapi umayuqllañam kanku. Bibliam ichaqa mana chaykunatachu yachachiwanchik, aswanqa Diosllata servinapaqmi kallpanchawanchik.

Ñuqanchikqa Jesuspa qatiqninkuna hinam runakunaman willananchik Diosninchik churin Jesucristota kawsarichisqanmanta. Wañuchiwananchikpaq manchachiwaptinchikpas manam manchakunanchikchu. Wañuptinchikpas Jehova Diosqa Jesusta hinam kawsarichiwasun.

Anchatam kusikunchik yupaychaqninkunata Jehova Dios mana qunqasqanmanta hinaspa kawsarichinanmanta yachaspanchik ¿aw?... Chaymi munanchik Diosninchik kusisqa kananta. Ichaqa, ¿imaynatataq Diosta kusichichwan?... Chaymantam qatiqninpi yachasun.