¿KUSIKUNKICHU pipas qamrayku imallatapas ruwaptin?... Ichaqa manam qamllachu, lliwpas kusikunchikmi. Chayta yachaspanmi Jesuspas runakunapaq imatapas ruwaq. Chaymi nirqa: ‘Manam servichikuqchu hamurqani aswanqa serviqmi’, nispa (Mateo 20:28).

Hinaptinqa, ¿imatataq ruwananchik Jesus hina kanapaq?... Pay hinam runamasinchikpaq allin kaqkunata ruwananchik. Ichaqa manam llapallan runakunachu chayta ruwanku, aswanqa kikillankupaq munaqmi kanku. Jesuspa qatiqninkunapas riqsisqa kayta munaspankum hatun tukuyta qallaykurqaku.

Chaymi Capernaum llaqtapi samapakuna wasiman chayaruptinku Jesusqa qatiqninkunata tapurqa: “¿Imamantataq ñanpi atipanakurqankichik?”, nispa. Hinaptinmi paykunaqa mana ima niytapas atispanku upallalla qawanakurqaku. ¿Imanasqa? Ñanpi pim aswan riqsisqa kasqankumanta piñanakusqankuraykum (Marcos 9:33, 34).

 Pimantapas aswan riqsisqa kayta maskayqa manam allinchu. Chayraykum qallariypi yachamusqanchikman hina Jesusqa mana hatun tukuq kaymanta warmachawan qatiqninkunaman yachachirqa. Ichaqa manaraqmi ima niy munasqantaqa musyakurqakuraqchu. Hinaptinqa, ¿imatataq Jesusqa manaraq wañukuchkaspan ruwanman karqa?...

Mikuchkaptinkum Jesusqa wiqawninman toallata watakuykuspan qatarirurqa, hinaspam lavatorioman yakuta talliykuspan sapakamapa chakinta mayllaspa chakichiyta qallaykurqa. Chayta ruwaptinmi qatiqninkunaqa qawarayarqaku. Chaypi qam kaspaykiqa, ¿imatam ruwawaq karqa?...

Jesuspa qatiqninkunaqa chakinkuta mayllasqanwanmi pinqarikururqaku. Pedropas pinqapakuspanmi Jesuswan chakin mayllachikuytaqa mana munarqachu. Chaywanpas Jesusqa hinallam chakinkuta mayllarqa.

Chay tiempokunapiqa chaynam chakinkuta mayllanakuqku. ¿Imanasqa?... Usutallawan kaptinku chakinku qachachakusqanraykum. Jesuspa tiemponpiqa maymanpas chakillawanmi puriqku allpallaña ñanninkunata. Chaymi pipapas chakin mayllaykuyqa sumaq ruway karqa.

Ichaqa manam Jesuspa qatiqninkunaqa ruwayta munarqakuchu. Chaymi kikin Jesusña ruwarqa. Jesuspa chay ruwasqanqa ancha allinmi karqa qatiqninkunata yachachinanpaq. Ñuqanchikpas chaymantaqa yachachwanmi.

¿Imatataq chay ruwasqanwan yachachirqa?... Mesaman kaqmanta tiyaykuspanmi Jesusqa nirqa: ‘¿Musyakunkichikchu kay ruwasqay ima ninan kasqanta? Qamkunam niwankichik “yachachikuq”  hinaspa “señor” nispa. Chaytaqa allintam ninkichik. Chaymi “señor” hinaspa “yachachikuq” kachkaspaypas chakikichikta mayllaruykichik hinaptinqa qamkunapas chaynayá chakikichikta mayllanakuychik’, nispa (Juan 13:2-14).

Jesusqa yachachichkarqa imapipas yanapakuqllaña kanankumantam. Chaynapi ama kikillankupaq munaq kaspanku nitaq hatun tukuqllaña kaspanku imapipas yanapanakuq kanankupaq.

Ancha allinmi chay yachachisqanqa ¿aw?... Qamqa, ¿Jesus hinachu pitapas yanapaykunki?... Hukkunata imapipas yanapaspaqa kusisqam kasunchik. Anchatataqmi Jehova Diospas chaynataq Jesuspas ñuqanchikmanta kusikunqaku.

Hukkunata imapipas yanapayqa manam sasachu, atikunmi. Achka ruwaykunam kachkan yanapakunapaqqa. Ichapas mamaykita imallapipas yanapawaq, payqa qamrayku hinaspa wasikipi kaqkunaraykum tukuy imata ruwan. ¿Atiwaqchu  imallapipas yanapaykuyta?... Tapuykuy imatapas kamachisunaykipaq.

Ichapas mikuyta tukuruptikichik platoykikunata chaynataq mankaykikunata mayllaruwaq, utaq wasikita pichakuruwaq. Chaykunata ruwaspaykiqa Jesus hinam qampas hukkunata yanapachkanki.

¿Kanchu sullkachaykikuna? Jesusqa qatiqninkunatapas yanaparqam. Chaymi sullkachaykikunata yanapaspaykiqa Jesusta qatipakuchkanki. ¿Imaynatataq paykunata yanapawaq?... Pukllayta tukuruptinkum pukllanachankunata allichaypi yanapawaq, utaq camanta mastaypi chaynataq pachachiypi. Chaymantapas, ¿imakunataraqtaq ruwawaq?... Sullkachaykikunata  yanapaptikiqa paykunapas kuyasunkim, chaynam Jesustapas qatiqninkuna kuyarqa.

Chaymantapas unqusqankurayku imapas mana ruway atiqkunatam yanapawaq. Escuelaykipipas warmamasikikunawan hinaspa profesornikikunawan kuyachikuynikiqa allinmi kanman. Huk kaqnin warmapa imanpas wichiykuptinqa huqariykapunaykim. Chaynallataqmi profesornikitaqa imallapipas yanapaykunayki.

Ichaqa manam llapallankuchu riqsikunqaku yanapasqanchikmantaqa. ¿Chayraykuchu manaña imapipas yanapakuchwan?... Manam. Aswanqa hinallam yanapakunanchik. Jesusqa hinallam pitapas yanaparqa ruwasqanta mana riqsikuptinkupas.

Chaynaqa, Jesusta yuyarispayá hinalla pitapas yanapasunchik.