¿IMANASQATAQ yachananchik pi yupaychananchikmanta?... Runakuna achkallaña dioskunata yupaychasqankuraykum (1 Corintios 8:5). Apostol Pablotapas suchu runata Diospa atiyninwan hampiruptinmi runakuna nirqaku: “Dioskunam runaman tikrakuruspanku ñuqanchikman uraykaramunku”, nispa. Hinaspam Pablotawan Bernabeyta yupaychayta munarqaku. Chaymi huk dioskunapa sutinwan Pablota nirqaku Hermes hinaspa Bernabeytañataq Zeus nispa.

Pablowan Bernabeyñataqmi chayqa mana allin kasqanta yachaspanku runakuna ukuman yaykuruspa nirqaku: ‘Kay yanqa ruwaykunamantayá kawsaq Diosman kutirikuychik’, nispa (Hechos 14:8-15). ¿Pitaq imakunapas unanchaq ‘kawsaq Diosqa’?... Payqa Jehova Diosmi. Paytam Jesus nirqa “sapallan chiqap Dios” kasqanta. Hinaptinqa, ¿pi Diosllataq yupaychana Diosqa?... (Salmo 83:18; Juan 17:3; Apocalipsis 4:11).

Ichaqa yaqa lliw runakunam yupaychanku huk dioskunata. Chayqa kanmanmi kullumanta, rumimanta utaq imamantapas ruwasqa taytachakuna (Exodo 32:4-7; Levitico 26:1; Isaias 44:14-17). Kanmantaqmi llumpayta hatunchasqanku riqsisqa qarikunapas utaq warmikunapas. Ichaqa, ¿hatunchananchikchu?...

Jehova Diostaña serviyta qallaykuspanmi apostol Pablo nirqa: “Mana iñiq runakunapa yuyayninkutam kay pachapa diosnin tutayarachin”, nispa (2 Corintios 4:4). ¿Pitaq chay diosqa?... Satanas diablom. Paymi runakunata pantarachispan huk rikchaqkunataña  yupaychachin. Chaymi mana pitapas hatunchananchikchu.

Satanasqa Jesustapas pantarachiyta munaspanmi yupaychananpaq nirqa. Ichaqa, ¿imatataq Jesusqa ruwarqa?... Nirqam: “Jehova Diosllaykitam yupaychanaykiqa, payllatataqmi servinaykipas”, nispa (Mateo 4:10). Chay nisqanwanmi Jesusqa qawachirqa Jehova Dioslla yupaychana kasqanta. Chaytam ruwarqaku Sadrac, Mesac hinaspa Abednego sutiyuq mozokuna.

Paykunatam Israel llaqtankumanta Babilonia nacionman presochasqata aparurqaku. Chaypim Nabucodonosor kamachiq runa hatu-hatun qurimanta taytachata ruwarachispan, kamachirqa llapa runakuna tocaqkunata uyarispa chay taytachapa ñawpaqninpi qunqurakunankupaq. Chayta mana  ruwaqkunatañataqmi ‘rupachkaq hornoman wischunanku’ karqa. ¿Imatataq qamqa ruwawaq karqa?...

Sadracwan Mesacwan Abednegoqa Nabucodonosorta kasukuq kaspankupas kay kutipiqa manam kasukurqakuchu. ¿Imanasqa?... Jehova Diospa kamachikuyninmi niq: ‘Amam taytacha-mamachataqa ruwankichu nitaq ñawpaqninpiqa qunqurakunkichu’, nispa (Exodo 20:3-5). Chaymi paykunaqa Jehova Diosta kasukurqaku Nabucodonosormantaqa.

Nabucodonosorñataqmi piñakuspan qayllanman chay kimsa mozokunata qayachispan nirqa: ‘¿Chiqaptachum taytachaykunata mana yupaychankichik? Huktawan nisqaykichik: Tocasqankuta uyarispayá taytachapa ñawpaqninpi qunqurakuychik. Manachayqa rupachkaq hornopim rupankichik. ¿Pi diostaq makiymantaqa librasunkichikman?’, nispa.

¿Imatam chay mozokunaqa ruwarqaku? ¿Imatam qamqa ruwawaq karqa?... Paykunaqa nirqakum: ‘Diosniykum libraykuwanqaku. Ichaqa manaña librawaptinkupas manam ñuqaykuqa yupaychasaqkuchu qurimanta taytachaykitaqa’, nispa.

 Chaymi Nabucodonosorñataq rabiawan tuqyaspan nirqa: ‘Qanchis kuti mastaraqyá hornota rupachimuychik’, nispa. Hinaspam kallpasapa soldadokunawan chay kimsa mozokunata watasqata hornoman wischuykachirqa. Llumpayta horno rupaptinmi soldadokunaqa ruparurqaku. Ichaqa, ¿ruparurqakuchu chay kimsa mozokunapas?

Sadracwan Mesacwan Abednegoqa ninapa chawpinpim manaña watasqa imam kaq kachkarqaku. ¿Imaynanpi?... Nabucodonosorqa hornota qawaykuspam mancharisqallaña runankunata tapurqa: ‘¿Manachum kimsa runakunallata rupachkaq hornomanqa wischurqanchik?’, nispa. Paykunañataqmi “arí” nirqaku.

Nabucodonosorñataqmi nirqa: ‘Ñuqaqa qawachkani hawkallaña purikuq tawa runakunatam’, nispa. ¿Pitaq karqa hukninqa?... Jehova Diospa angelninmi, paymi chay kimsa mozokunata mana ruparunankupaq harkachkarqa.

Chaymi Nabucodonosorqa horno punkumanraq asuykuspan nirqa: ‘Alto-altopi kaq Diospa serviqnin  Sadrac, Mesac hinaspa Abednego. Hornomantayá lluqsimuychik’, nispa. Chaynapim lluqsiptinku llapa runakuna qawarqaku ninaqa mana imankutapas rupasqanta. Nabucodonosorqa nirqaraqmi: ‘Sadracpa, Mesacpa hinaspa Abednegopa Diosninyá alabasqa kachun. Paymi angelninta kachamurqa sapaq dioskunata mana yupaychasqankurayku serviqninkunata libraykunanpaq’, nispa (Daniel 3).

Yaqa chaynam kunan punchawkunapas. Runakunaqa tukuy rikchaq taytachakunatam ruwanku kullumanta, rumimanta, telamanta utaq imamantapas chayta yupaychanankupaq. Huk qillqam nin: “Banderataqa cruzta hinañam yupaychanku”, nispa (The Encyclopedia Americana). Jesuspa punta qatiqninkunaqa manam ima ruwasqankuwanpas Roma nacionpi kamachikuqtaqa yupaychaqkuchu. Chaymi Daniel P. Mannix runa nirqa: “Paykunapa ruwasqankuqa kunan banderata mana saluday hinam”, nispa.

Chaynaqa, ¿taytacha-mamachaqa kanmanchu kullumantapas, telamantapas utaq imamantapas?... ¿Allinchu kanman ima ruwasqanchikwanpas chaykunata yupaychay?... Sadracwan Mesacwan Abednegoqa Jehova Diostam kusichirqaku huk dioskunata mana yupaychaspanku. ¿Imaynatam paykunata qatipakuwaq?...