¿PITAQ pimantapas aswan Diosman sunqu karqa?... Arí, Jesusllam. ¿Paypa Diosman sunqu kasqanta qatipakuyta atichwanchu?... Arí, bibliapa nisqanman hinaqa atichwanmi. Jesusqa munanmi qatiqnin kananchiktapas.

¿Ima ninantaq Jesuspa qatiqnin kayqa?... Jesuspa qatiqnin kayqa paymanta imam kaqta yachaymi, yachachisqankunamanta mana iskayrayaymi hinaspa kamachisqankunata kasukuymi.

Iglesiakunaman riq achka runakunam ninku Jesuspa qatiqnin kasqankuta, ichaqa manam imam kaqtachu paymanta yachanku. Hinaptinqa, ¿llapallankuchu Jesuspa qatiqninkuna kanmanku?... Manam. Jesuspa qatiqninkunaqa kanku paypa ruwasqanta qatipakuqkunallam.

Rimarisun kay pachapi Jesus kaptin wakin runakuna paypa qatiqnin kasqankumanta. Hukninmi karqa Felipe. Paymi Jesuspa qatiqnin karuspan Natanaelta maskaq rirqa. Natanaeltaqa riqsinkutaqmi Bartolomey nispapas. Natanaelqa kay dibujopi qawasqaykiman hinam higos sachapa sikinpi tiyachkarqa. Chaymantam Natanaelqa Jesusman asuykurqa, hinaptinmi Jesusñataq rikuruspan nirqa: “Payqa Israel runam, paypiqa manapunim ima llullapas kanchu”, nispa. Natanaelñataqmi admirasqallaña nirqa: “¿Imaynataq qamqa riqsiwanki?”, nispan.

 Hinaptinmi Jesus nirqa: “Manaraq Felipe qayamusuchkaptikim higos sachapa sikinpi kachkaqta rikurqaykiña”, nispa. Natanaelqa anchatam admirakurqa maypi kasqanta Jesuspa yachasqanwan. Chaymi nirqa: “Yachachikuq, qamqa kanki Diospa churinmi, hinaspa Israelpa kamachiqninmi”, nispa (Juan 1:49).

Jesuspa wakin qatiqninkunañataqmi karqaku Andres hinaspa wawqin Pedro, chaynataq Juan hinaspa wawqin Santiagopas (Juan 1:35-51). Ichaqa manapas unaymantam paykunaqa challwa hapiy llamkayninkuman kaqlla kutikurqaku. Chaymantam huk kutipi Galilea lamar quchapa patanta Jesus purichkarqa, hinaspanmi challwakuna hapichkaqta Pedrotawan Andresta rikuruspan nirqa: “Hamuspayá qatiwaychik”, nispa.

 Tuparurqataqmi Santiagowan hinaspa Juanwanpas. Paykunaqa taytankuwan kuskam challwa hapina mallankuta allichachkarqaku. Paykunatapas nirqam qatiqninkuna kanankupaq. ¿Imatam qamqa ruwawaq karqa qatiqnin kanaykipaq Jesus nisuptiki? ¿Chayllachu qatikuwaq karqa?... Paykunaqa manam iskayrayarqakuchu Jesusqa Diospa churin kasqanmantaqa, chaymi chaylla llamkayninkuta saqispanku qatikurqaku (Mateo 4:18-22).

Jesuspa qatiqninkunaqa, ¿mana pantaqñachu rikurirurqaku qatiqnin karuspanku?... Manam. Ichapas yuyachkanki pim aswan riqsisqa kasqankumanta piñanakusqankuta. Ichaqa Jesusta kasukuspankum kallpanchakurqaku manaña hatun tukuq kanankupaq. Ñuqanchikpas Jesuspa qatiqnin kanapaqqa paypa imapas yachachisqankunatam kasukunanchik.

Jesusqa munanmi llapallan runakuna qatiqninkuna kanankuta. Chaymi wiñay kawsaymanta tapuqnin huk apu runata nirqa: ‘Hamuspayá qatiqniyña kay’, nispa. Chaynataqa nirqa Diospa kamachikuyninkunata kasukusqanmanta willakuptinmi. Ichaqa, ¿yaqachu chay apu runaqa Jesusta qatikurqa?...

Diosta kuyananmantaqa qullqita llumpayta kuyasqanraykum Jesuspa qatiqnin kaytaqa mana munarqachu. Chaymi anchata llakikurqa tukuy imantapas saqinanmanta yacharuspan (Lucas 18: 18-25).

Jesusqa wata partenña Diosmanta willakuchkaspanmi chayraq 12 apostolkunataqa akllarqa. Paykunaqa Diospaq ima llamkaytapas ruwanankupaq sapaqchasqa runakunam karqaku. ¿Yachankichu apostolkunapa sutinta?... Chaypaqyá kaypi dibujokunata qawaspa umallamanta sutinkuta yachay.

Ichaqa chay apostolkunamantam Jesusta Judas Iscariote sutiyuq qipancharurqa, hinaptinmi huktaña akllarqaku. ¿Pitaq  karqa?... Matiasmi. Chaymanta qipakunamanpas Pablotawan Bernabeytam apostol kanankupaq akllarqaku. Chayna kaptinpas Jesuspa akllasqan apostolkunaqa chunka iskayniyuqllam karqaku (Hechos 1:23-26; 14:14).

Punta kaq yachachikuypi rimamusqanchikman hinam Jesusqa anchata kuyarqa warmachakunataqa. ¿Imanasqa?... Warmachakunapas qatiqnin kayta atisqankuraykum. Warmachakunaqa kuyayllapaqtam rimanku, chaymi Jesusmanta rimaptinkuqa yuyayniyuqkunapas munayllawanña uyarinku.

Jesuspa qatiqninkunaqa karqakutaqmi warmikunapas. Wakinpa  sutinmi Juana, Susana hinaspa Maria Magdalena. Paykunaqa Jesuswan kuskam maymanpas Diosmanta willakuq riptin riqku. Yaqachusmi mikuytapas yanupuqku hinaspa pachantapas taqsapuqku (Lucas 8:1-3).

¿Munawaqchu Jesuspa qatiqnin kayta?... Allinmi. Ichaqa manam Jesuspi iñispallachu qatiqninqa kasunchik. Jesuspa qatiqnin kanapaqqa kamachikuyninkunatam kasukunanchik. Ichaqa, ¿Diosta yupaychana wasipi huñunakuspallachu kasukuna?...

Manam, wasinchikpipas hinaspa escuelanchikpipas kasukunanchikmi. Jesuspa qatiqnin kanapaqqa pay hinam maypipas hinaspa haykapipas Diospa kamachisqankunata kasukunanchik.