¿KANMANCHU pipas runakunamanta aswan atiyniyuq? ¿Pitaq kanman?... Jehova Diosmi. ¿Jesuspas chayna atiyniyuqchu kanman?... Arí.

Jesusqa angel kaspanmi hanaq pachapi taytanwan kuska yacharqa. Ichaqa, ¿payllachu Jehova Dioswan yacharqa?... Manam, karqam achkallay-achka angelkunapas. Chaymi paykunapas ñuqanchikmantaqa aswan atiyniyuq kanku (Hebreos 1:13, 14; Daniel 7:10).

¿Yuyachkankichu Mariawan rimaq angelmanta?... Gabrielmi sutin karqa. Paymi Mariaman willarqa Jesusta wachakunanpaq. Diosmi churin Jesuspa kawsakuyninta Mariapa wiksanman churaykurqa ñuqanchik hina nacenanpaq (Lucas 1:26, 27).

¿Chaynachu kanman karqa? ¿Jesusqa karqañachu manaraq kay pachaman hamuchkaspan?... Arí, karqañam. Kikin Jesusmi hanaq pachapi kasqanmanta willakurqa. Ichaqa, ¿pitaq chaytaqa willarqa? Ichapas warmacha kaptin maman willarqa angel Gabrielpa willasqanman hina. Joseypas willarqachá chiqap taytanqa Jehova Dios kasqanta.

Chaymantapas Jesus bautizakuptinmi kikin Jehova Dios hanaq pachamanta nimurqa: “Paymi churiy”, nispa (Mateo 3:17). Chaymi  manaraq wañukuchkaspan taytanta mañakurqa: “Taytalláy, hatunchaykuway manaraq runakuna kachkaptin ladoykipi hatunchawasqaykiman hina”, nispa (Juan 17:5). Kayna mañakusqanwanmi Jesusqa taytanpa kasqanman kutiy munasqanta nichkarqa. ¿Imaynatataq kutinman karqa?... Kaqllamanta angelman rikuriruspam. Diosllam pitapas angelpiqa rikurirachinman.

¿Ima niwaqtaq? ¿Llapallan angelkunachu allin angelkuna kanku?... Qallariyllanpiqa Jehova Diospa unanchasqan kasqankuraykum llapallanku allin angelkuna karqaku. Chaymanta unaymantam ichaqa huk kaqnin mana allin rikurirurqa. ¿Imaynata?

Chaymanta yachanapaq rimasunchik Adanwan Eva unanchasqa kasqanku tiempopi imakuna pasakusqanmanta. Wakin runakunam Adanmanta hinaspa Evamanta willakuytaqa yanqalla kasqanpaq hapinku. Chayna kaptinpas Jesuspaqqa manam chaynachu karqa.

Jehova Diosqa Eden sutiyuq suma-sumaq huertapim Adantawan Evataqa churarqa. Chaypim paykunaqa churi-wawayuq kaspanku wiña-wiñaypaq kawsakunanku karqa. Ichaqa pasaq yachachikuypi  yachamusqanchikman hinam paykunaqa Diospa nisqanman hinalla imatapas ruwananku karqa. Chaymantayá astawan yachaykusun.

Diosqa llapallan sachapa rurunta mikunankupaqmi nirqa, ichaqa chullalla sachapa ruruntam mana mikunankuchu karqa. Chayta ‘mikuruspaqa wañurunankum’ karqa (Genesis 2:17). ¿Imatataq Adanwan Evaqa ruwananku karqa?...

Jehova Diostam tukuy sunquwan kasukunanku karqa. Chaytaqa ruwasqankuwanmi qawachinanku karqa. Runakunaqa Diosta kasukuspallam kusisqa kawsakuytaqa atichwan. Diospa nisqanta Adanwan Eva kasukuspankuqa taytankuta hina kuyasqankuta qawachispam wiña-wiñaypaq kawsakunmanku karqa. Ichaqa, ¿imatataq qawachinmanku karqa mana kasukuspaqa?...

Diospa tukuy ima qusqanmanta mana riqsikusqankutam. Qamqa, ¿imatataq ruwawaq karqa?... Adanwan Evataqa mana pantaq runakuna kaptinkupas paykunamanta aswan atiyniyuq mana allin angelmi Diosta mana kasukunankupaq tanqaykurqa. ¿Pitaq karqa chay mana allin angelqa?...

 Bibliaqa ninmi Evaqa culebrawan rimasqanta. Ichaqa, ¿culebra rimanchu?... Manam rimanchu, chay mana allin angel rimaptinmi culebra rimachkanmanpas hina rikchakurqa. Chay angelqa Diospa rantinpi churakuspanmi Adanwan hinaspa Evawan yupaychasqa kayta munarqa.

Chayraykum chay mana allin angelqa Evapa sunqunman mana allin munaykunata churarurqa. Chay angelpa rimasqanqa kaynata nichkanmanpas hinam karqa: “Diosqa llullakusuchkankichikmi. Kay sachapa rurunta mikuruspaykichikqa manam wañunkichikchu, aswanqa Dios hinaraqmi rikurirunkichik”, nispa. Ichaqa, ¿chaynachu karqa?...

Evaqa mana mikuna sachapa ruruntam munapayayta qallaykurqa. Hinaspam mikuruspan qusanmanpas quykurqa. Chaymi Adanpas mikururqa, ichaqa manam culebrapa nisqanta kasuspanchu, aswanqa Diosmantapas astawanraq warminta kuyasqanraykum (Genesis 3:1-6; 1 Timoteo 2:14).

¿Imapim chay ruwasqanku tukurqa?... Pantaq runaña rikuriruspankum machu-payayaspa  wañururqaku. Chayna pantaqña rikuriruptinkum churi-wawankupas paykuna hina machu-payayaspa wañururqaku. Diosqa manamá llullakurqachu. Chaymi hinalla kawsanapaqqa Diosta kasukunanchik (Romanos 5:12). Bibliapa willakusqanman hinaqa Evata pantachiq chay mana allin angelpa sutinqa diablo utaq satanasmi, chay wakin mana allin angelkunapañataqmi demoniokuna (Santiago 2:19; Apocalipsis 12:9).

Chaynaqa, ¿imanasqataq allin angelqa satanasña utaq diabloña rikurirurqa?... Mana allinkunata munapayayta qallaykusqanraykum. Payqa pimantapas aswan riqsisqa kaytam munarqa. Adanwan Eva achka churi-wawayuq kanankuta yachasqanraykum diabloqa paykunawan yupaychachikuyta munarqa. Diabloqa munan llapa runa Diosta mana kasukunanchiktam. Chaymi mana allinkunata munapayananchikta munan (Santiago 1:13-15).

Payqa nin Diostaqa hawa sunqulla servisqanchiktam. Rimasqanman hinaqa Jehova Dios imakunapipas yanapawaptillanchiksi kasukunchik. Ichaqa, ¿chaynachu?

Manam, Jesusqa nirqam diabloqa llulla-llulla kasqanta. Hinaspam tukuy sunqunwan Diosta servispan chayta qawachirqa. Payqa taytantaqa kasukurqa manam imapipas yanapaptillanchu, aswanqa kuyasqanraykum wañunanña kaptinpas kasukurqa. Chaymi Jehova Diosqa Jesusta kawsarichirqa wiña-wiñaypaq kawsakunanpaq.

Hinaptinqa, ¿pitaq kanman llumpa-llumpay chiqniwaqninchikqa?... Arí, satanas diablom. ¿Rikuyta atichwanchu?... Manam. Ichaqa ñuqanchikmanta aswan atiyniyuqmi. Chayna kaptinpas, ¿pitaq diablomanta aswan atiyniyuqqa?... Jehova Diosmi. Chaymi mana iskayrayananchikchu yanapawananchikmantaqa.