Sumaq willakuy uyariytaqa pipas munanchikmi, ¿aw? Chaymi qampaqwan aylluykipaqpas sumaq willakuykuna kachkan tukuy ima unanchaq Jehova Diosmanta.

Chay sumaq willakuykunaqa bibliapim kachkan, chaytaqa unay watakuna ñawpaqtam Jehova Dios qillqachirqa. Chay qillqapim Mateo, Marcos, Lucas hinaspa Juan qillqakunapas kachkan, chay qillqakunapim sumaq willakuykunata tarinchik. Chay tawanmantam kay qillqapi aswan sumaqta yachasunchik.

Achka runakunam chay qillqakunata riqsinku Jesusmanta willakuq qillqakuna kasqanwan, chay tawa qillqakunaqa sumaq willakuykunam. ¿Mayqinkunataq chay willakuykunaqa? Jesusqa salvacionta tarinapaq Diospa kachamusqanmanta willakuymi chaynataq Diospa munaychakuyninpi kamachiq kaspan Dios kuyaq runakunata wiñaypaq bendecinanmanta willakuymi (Marcos 10:17, 30; 13:13).

Ichapas tapukuchkanchik Jesusmanta willakunankupaq imanasqa tawa runakunata Jehova Dios yanapasqanmanta.

Chayqa ancha allinmi karqa. Riqsisqa profesorpa yachachisqantapas manam chaynallatachu tawa runakunaqa willakunmanku. Ichapas huknin runaqa autoridadkunapaq qullqi mañaypi llamkaq kanman. Huknin runañataq doctor kanman, hukninñataq challwiru hinaspa profesorpa ancha kuyasqan kanman, chaynallataq huknin runapas mozoniqllaraq kanman. Ichaqa tawanku allin runakuna kaspankupas manam chaynallachu kanmanku imayna kasqankupiqa hinaspa ima munasqankupiqa. Chaymi profesormanta qillqaspa willakuspankuqa mana chaynallatachu imatapas willakunmanku. Ichaqa llapankupa qillqasqanta qawaspaqa aswan sumaqtaraqmi profesorpa imayna kasqanta hinaspa imakuna ruwasqanmanta  yachachwan. Chaynapunim allin yachachiq Jesusmanta willakuq tawa qillqakunata qawaypas.

Profesormanta willakuq autoridadkunapaq qullqi mañaypi llamkaq runaqa judio runakunata yanapananpaq hinam willakunman. Doctor kaqñataqmi unquqkunata hampisqanmantawan willakunman, chaymi willakusqanqa mana autoridadkunapaq qullqi mañaypi llamkaq runapa willakusqan hinachu kanman. Chaymantapas profesorpa kuyasqan runaqa profesorpa imayna kasqanmantam willakunman. Mozoniraq kaq runañataqmi pisi rimayllapi willakunman. Chayna kaptinpas lliwpa willakusqankum imam kaq kanman. Chaynapunim Jesusmanta willakuq tawa qillqakunapas, chay tawa qillqakunam sumaqta willawanchik Jesuspa ruwasqankunamanta hinaspa imayna runa kasqanmanta.

Chay tawan qillqakunatam runakunaqa riqsinku Jesusmanta willakuq qillqakuna kasqanwan. Chayna riqsisqankuqa allinpunim Jesusmanta sumaq willakuykuna kasqanrayku (Marcos 1:1). Chayna tawa qillqakuna kaptinpas Jesusmanta willakuq chullalla qillqam.

Achka yachaysapa runakunam Mateo, Marcos, Lucas hinaspa Juan qillqakunataqa chullallaman hukllawarqaku. Chaytam Siria nacionniyuq Taciano sutiyuq runapas ruwarqa, payqa yacharqam chay tawa qillqakunaqa imam kaq kasqanta hinaspa Diospa yanapayninwan qillqasqa kasqanta. Paymi 170 kaq watapi huk qillqata ruwarqa Jesuspa tukuy ruwasqankunamanta chay qillqallapi willakunanpaq.

Chayna hukllawasqam kachkan Jesusqa ñanmi, chiqapmi, kawsay qukuqmi niq kay qillqapas, ichaqa aswan suma-sumaq ruwasqam. Chaynaqa kachkan Jesuspa rikchanachisqankunamanta hinaspa willakusqanman hina imapas kasqanmanta aswan sumaqtaña kunan yachasqanchikraykum. Chayraykum aswan sumaqta yachanchik Jesuspa ima ruwasqanpas haykapi chaynataq imayna kasqanmanta. Chaypaqqa yachaysapa runakunapa ima tarisqankupas yanapakurqam. Manaña suma-sumaqta qatinasllanpi imaynakuna kasqanta yachaptinchikpas kay qillqaqa sumaqta tanteaspa ruwasqam kachkan.

Kay qillqata ñawinchaspaqa amayá qunqarusunchu Jesusmanta yachayninchikqa ancha allin kasqanta. Chayna kasqanmantam Jesuspas Tomaswan rimaspan nirqa: “Ñuqam kani ñan, chiqap kaq chaynataq kawsay quqpas. Ñuqantakamallam pipas taytaymanqa asuykun”, nispa (Juan 14:6).

Kay qillqaqa yanapawasunmi imanasqa Jesus “ñan” kasqanmanta yachanapaq. Jesuspa sutillanpim Jehova Diosta mañakuchwan, Diosman asuykuchwan hinaspa paypa chaskisqan kachwan (Juan 16:23; Romanos 5:8).

Yachachiwasuntaqmi Jesusqa imanasqa “chiqap kaq” kasqanmanta. Payqa chiqaptam imatapas willakurqa, hinaspam yachachisqanman hina kawsakurqa. Chaymantapas Diospa lliw willachisqankunam “Cristopi cumplikun”, chaywanmi yachanchik payqa Diospa munaynin ruwakunanpaq anchata yanapakusqanmanta (2 Corintios 1:20; Juan 1:14; Apocalipsis 19:10).

Chaymantapas yachachiwasuntaqmi Jesusqa ‘kawsay qukuq’ kasqanmanta. Jesuspa wañukusqallanwanmi wiñay kawsayta haypayta atichwan (1 Timoteo 6:12, 19; Efesios 1:7; 1 Juan 1:7). Wañukuq runakunapas kawsarimuspankum Jesus yanapaptin kay pachapi wiñay kawsayta haypanqaku (Juan 5:28, 29).

Lliwmi yachananchik Diospa munaynin ruwakunanpaq Jesus imayna yanapasqanmanta. ¡Maynatachá kusikusun Jesusqa ñan, chiqap kaq hinaspa kawsay qukuq kasqanmanta yachaspanchikqa!