40 punchaw chunniqpi kasqanmantam Jesusqa Galileamanña kutikunan karqa. Ichaqa manaraq richkaspanmi bautizaq Juanwan tupaykuq rirqa. Chaymi Juanqa karullamantaraq Jesusta rikuruspan nirqa: “¡Waqaya llapa runakunapa huchanta pampachaq Diospa malta carneronqa! Paymantam nirqaykichik: Ñuqapa qipaytam ñawpamuwaqniy qari hamuchkan, payqariki manaraq ñuqa kachkaptiymi karqaña”, nispa (Juan 1:29, 30). Chaynatam Juanqa nirqa suqta killawan Jesuspa mayornin kachkaspanpas hanaq pachamanta Jesus hamusqanrayku.

Manaraq Jesus bautizakuchkaptinqa manam Juanqa sumaqtaraqchu yacharqa Diospa kachamusqan Cristoqa Jesus kanantaqa. Chaymi nirqa: “Manam ñuqaqa riqsirqanichu, ichaqa ñuqam yakupi bautizarqani Israel runakuna payta riqsinankupaq”, nispa (Juan 1:31).

Chaymantam Juanqa runakunaman willarqa Jesusta bautizaptin hanaq pachamanta paloma hina chuya espiritu Jesusman uraykamusqanmanta. Nirqataqmi: “Manam ñuqaqa riqsirqanichu, ichaqa yakupi bautizanaypaq kachamuwaqniy Diosmi niwarqa: ‘Sichum pimanpas chuya espiritu uraykamuspan paypa hawanpi qipanqa, hinaptinqa paymi chuya espirituwan bautizaqqa kanqa’, nispa. Ñuqam chayta rikurqani hinaspam willakurqani payqa Diospa churin kasqanta”, nispa (Juan 1:32-34).

Paqarintintapas bautizaq Juanqa iskaynin qatiqninkunawan kachkaspanmi kaqmanta Jesusta rikuruspan nirqa: “¡Waqaya Diospa malta carneronqa!”, nispa (Juan 1:36). Chaymi bautizaq Juanpa iskaynin qatiqninkunaqa Jesustaña qatikurqaku. Hukninmi karqa Andres, hukninqa yaqachá Jesusmanta qillqaq Juan karqa. Juanpa tayta-mamanqa Zebedeowan Salomeymi karqa, Salomeyqa Jesuspa maman Mariapa ñañanchusmi karqa. Chaychusmi Juanqa Jesuspa primon karqa.

Jesusñataqmi Andrestawan Juanta qatiptinku nirqa: “¿Imatataq maskachkankichik?”, nispa.

Paykunañataqmi nirqaku: “Rabi, ¿maypitaq samapakuchkanki?”, nispa.

Jesusñataqmi nirqa: “Hakuyá hinaspa qawamuychik”, nispa (Juan 1:37-39).

Chaypaqqa ñam tawa hora tardeykuqña karqa, chaywanpas Andreswan Juanqa Jesuswanmi chisiyarqaku. Andresqa kusisqallaña kaspanmi wawqin Simonta rikuruspan akllasqa runaqa Jesus kasqanmanta willarqa, hinaspam Jesusman pusarqa, Simonpa huknin sutinqa Pedrom (Juan 1:41). Juanpas qillqasqanpi mana willakuspanpas, yaqachusmi wawqin Santiagota Jesusmanta willaspan Jesusman riqsichiq pusarqa.

Paqarintinñataqmi Jesusqa Felipewan tuparuspan nirqa: “Qatiqniyyá kay”, nispa (Juan  1:43). Felipeqa Galilea lawpi Betsaida llaqtamantam karqa Andreswan Juan hina.

Chaymantam Felipeqa Natanaelwan tuparurqa, paytaqa Bartolomey sutiwanpas riqsiqkum, hinaspam nirqa: “Tariramunikum Nazaretmanta Joseypa churin Jesusta. Paymantam Moisespas chaskisqan leypi qillqarqa, qillqarqakutaqmi Diosmanta willakuqkunapas”, nispa. Natanaelñataqmi yanqapaq hapispan nirqa: ‘¿Yaqachu Nazaretmantaqa pipas allin runa lluqsimunman?’, nispa.

Felipeñataqmi nirqa: “Hakuyá hinaspa qawamuy”, nispan. Jesusñataqmi Natanaelta rikuruspan nirqa: “Payqa Israel runam, paypiqa manapunim ima llullapas kanchu”, nispa.

Natanaelñataqmi nirqa: “¿Imaynataq qamqa riqsiwanki?”, nispa.

Jesusñataqmi nirqa: “Manaraq Felipe qayamusuchkaptikim higos sachapa sikinpi kachkaqta rikurqaykiña”, nispa.

Hinaptinmi Natanaelqa nirqa: “Yachachikuq, qamqa kanki Diospa churinmi, hinaspa Israelpa kamachiqninmi”, nispa.

Jesusñataqmi nirqa: “¿Higos sachapa sikinpi kachkaqtam rikurqaykiña niptiychu chaynata ninki? Kaykunamantapas aswan admirakuypaq kaqkunataraqmi rikunki”, nispa. Hinaspanmi Jesusqa uyariqninkunaman nirqa: “Chiqaptapunim nikichik: Hanaq pachatam kichasqata rikunkichik, rikunkichiktaqmi runapa churinman Diospa angelninkuna uraykamuchkaqta hinaspa siqachkaqta”, nispa (Juan 1:45-51).

Chayllamantam Jesusqa punta kaq qatiqninkunawan Jordan mayu lawmanta Galileamanña pasakurqaku.