Capernaumpi yupaychana wasipi kachkaspanmi Jesusqa kaqmanta rimarqa hanaq pacha tantaqa pay kasqanmanta. Chaymantaqa ñam rimarqaña tantawan challwata Galilea lawpi mikuq runakunawanpas.

Hinaspam nirqa: ‘Qamkunapa abueloykichikkunam chunniqpi mikurqaku “maná” nisqa sutiyuq mikuyta, chaywanpas wañukurqakum’, nispa. Hinaspañataqmi kawsay qukuq tantamanta rimaspan nirqa: “Ñuqam kani hanaq pachamanta uraykamuq kawsaq tantaqa. Pipas kay tantata mikuqqa wiñaypaqmi kawsanqa, qunaypaq kaq tantaqa aychaymi, chaytam qusaq llapa runakuna kawsanankupaq”, nispa (Juan 6:48-51).

Jesusqa ñawpaqtam Nicodemo sutiyuq runaman nirqa Jehova Diosqa runakunata kuyasqanrayku churinta kachamusqanmanta, chaynapi runakuna salvakunankupaq. Chay yupaychana wasipiñataqmi nirqa wiñay kawsayta haypanapaqqa aychanta mikunamanta, chayqa runakuna salvasqa kanankupaq Jesuspa wañukusqanmanta mana iskayrayaymi.

Chaywanpas runakunaqa atipanakuyta qallaykuspankum nirqaku: “¿Imaynamá kay runaqa aychantaqa quykuwachwan mikunapaqqa?”, nispa (Juan 6:52). Jesuspa nisqanqa tupanachiyllam karqa.

Chaymi nirqa: “Runapa churinpa aychanta mana mikuspaykichikqa hinaspa yawarnintapas mana tomaspaykichikqa manam kawsankichikchu. Aychayta mikuqqa hinaspa yawarniyta tomaqqa wiñay kawsayniyuqmi [...]. Aychayqariki chiqap mikuymi yawarniypas chiqap tomana kaqmi. Aychay mikuq hinaspa yawarniy tomaqqa ñuqawanmi huklla kachkan”, nispa (Juan 6:53-56).

¡Maynataya chaywanqa judio runakunaqa piñakurqaku! Diospa kamachikuyninpim nirqa yawartaqa ama mikunankupaq, chayrayku ichapas sunqunkupiqa niqku Diosta mana kasukunankupaq Jesus nisqanta hinaspa runa mikuqña kanankupaq nisqantapas (Genesis 9:4; Levitico 17:10, 11). Ichaqa manam Jesusqa aychanta mikunamantachu nitaq yawarninta tomanamantachu rimachkarqa, aswanqa wiñay kawsayta imata ruwaspa haypanamantam. Chaypaqqa runakuna salvasqa kanankupaq Jesuspa wañukunanmantam mana iskayrayanankuchu karqa. Ichaqa achka qatiqninkunam hukmanyaruspanku nirqaku: “Kay yachachisqanqa hukmanmi kasqa, ¿pitaq uyarinman?”, nispa (Juan 6:60).

Jesusñataqmi wakin qatiqninkuna rimapakuptinku nirqa: “¿Chaywanchu hukmanyarunkichik? Hinaspaqa, ¿aswanraqchiki hukmanyankichik runapa churinta ñawpaq kasqanman huqarikusqanta rikuspaykichikqa? [...] Ñuqapa rimapayasqaykunaqa chuya espiritumanta hamuqmi hinaspa kawsay qukuqmi. Qamkunamanta wakinnikichikmi ichaqa mana creenkichikchu”, nispa. Chayta uyariruspam achka runakuna Jesus qatiyta saqirurqaku (Juan 6:61-64).

Chaymi Jesusqa 12 apostolninkunata tapurqa: “¿Manachu qamkunapas pasakuyta munankichik?”, nispa. Hinaptinmi Pedro nirqa: “Señor, ¿pimantaq riymanku? Rimasqaykikunaqa wiñay kawsay qukuqmi. Ñuqaykuqariki creenikuñam hinaspapas yacharunikum qamqa Diospa kachamusqan kasqaykita”, nispa (Juan 6:67-69). Pedroqa chaynataq apostolmasinkunaqa manam Jesustaqa qipancharqakuchu imam nisqanta mana sumaqta yachaspankupas.

Pedropa allin rimasqanmanta uyarispanpas Jesusqa nirqam: “Ñuqam qamkunata akllarqaykichik chunka iskayniyuqta, ¿aw? Chaywanpas huknikichikmi diablo hina kachkan”, nispa (Juan  6:70). Chaynataqa Judas Iscariotemantam rimachkarqa. Jesusqa yaqachusmi musyarurqaña Judasqa mana allinkunataña ruway munasqanta.

Chayna kaptinpas Jesusqa kusikurqam wakin apostolkunaqa mana wakin runakuna hina kasqankumanta. Paykunaqa Jesusta mana qipanchaspankum hinalla Diosmantapas willakurqaku.