Jesusqa Decapolis lawpi kasqanmantam botepi rispan wak law chimpaman kutirqa, ichapas Capernaum llaqtapa waqtanman kutirqa, chaytam achka runakuna yacharurqaku. Yaqapaschá runakunaqa yacharurqakuña Jesuspa llumpay wayratawan lamar quchata hawkayachisqantaqa, hinaspa iskay runakunamanta demoniokuna qarqusqantapas. Chaymi “achkallaña runakuna” lamar quchapa patanpi huñunakururqaku (Marcos 5:21). Paykunaqa astawanmi Jesuspa imakunapas ruwananta qawayta munarqaku.

Chay achkallaña runakunamantam Jairo sutiyuq runa Jesuswan tupaykuyta munarqa, payqa yupaychana wasipi huk kaqnin kamachiqmi karqa. Hinaspam Jesusta pitukuykuspan nirqa: “Warmi churillaymi pasaypaqta unquchkan. Ama hina kaspaykiyá hamuspayki makikita hawanman churaykuy chaynapi allinyaruspan mana wañunanpaq”, nispa (Marcos 5:23). Chay churinqa ancha kuyakusqanmi karqa, hinaspapas 12 watayuqllaraqmi karqa (Lucas 8:42). ¿Imatataq Jesusqa ruwarqa?

Jesusqa Jairopa wasinmanmi rirqa, hinaptinmi achka runakuna qatirqaku imapas ruwasqanta qawanankupaq. Paykunatam qatirqa nisyu unquyninmanta hampikuruyta munaq huk warmipas.

Chay warmiqa judio castam karqa, payqa mana pipapas hampiy atisqanmi 12 wataña hemorragiawan ñakarillarqa. Yanqañam doctorkunapipas qullqillanta tukurqa, hinaspam allinyananmantaqa aswanyarurqa (Marcos 5:26).

Chay unquywanqa mana kallpayuqñam kallaqpas, hinaspam mana kaqpaqpas hapikuspan pinqakullaqña. Manam pipas chayna unquspaqa willakachakustinchu puriq. Chaymantapas Moisespa chaskisqan kamachikuypim nirqa hemorragiawan unquq warmiqa Diospa qayllanpi millarikuypaq rikurirusqanta, chayna kaspaqa manataqmi hukkunawan kuskaqa Dios yupaychaytapas atiqchu. Chaymi pipas yawarwan qachachasqa pachallantapas llachpaykuqqa pachantapas taqsaspan bañakunan karqa, hinaspa tutaykuqkama paypas millarikuypaq kanan karqa (Levitico 15:25-27).

Chay unquq warmiqa Jesuspa imapas ruwasqankunata yacharuspanmi payta maskarqa. Ichaqa Diospa qayllanpi millarikuypaq kasqanraykum mana musyachikuspalla Jesusman asuykurqa. Payqa sunqunpim nirqa: “Pachallantapas llachpaykuspayqa sanoyarusaqmi”, nispa. Hinaspam Jesuspa pachanpa patanta llachpaykuspallan “ñakarichiqnin unquyninmanta” chaylla allinyarurqa (Marcos 5:27-29).

Jesusñataqmi runakunata tapurqa: “¿Pitaq llachpaykuwan?”, nispa. Chay warmiqa mancharikurqachá Jesuspa chayna nisqanwanqa. Pedroñataqmi mana kaqmantaña tapukusqanta piensaspan nirqa: “Yachachikuq, llapa runakunam chawpicharususpayki ñitisuchkanki”, nispa. Jesusñataqmi nirqa: “Huk kaqmi llachpaykamuwan, musyakurunim ñuqamanta atiy lluqsirusqanta”, nispa (Lucas 8:45, 46). Chay warmiqa Jesusmanta atiy lluqsisqanwanmi hampikururqa.

Hinaspanmi Jesus musyarusqanta yacharuspan ñawpaqninman mancharisqallaña pawaykurqa, hinaspam lliwpa qayllanpi unqusqanmanta willakurqa chaynataq imayna allinyarusqanmantapas. Jesusñataqmi ancha kuyakuywan nirqa: “Mamáy, iñiyniyuq kasqaykiraykum sanoyarunki. Kunanqa hawkallañayá  ripukuy, ñakarichisuqniki unquymantam allinyarunkiña”, nispa (Marcos 5:34).

Kay pachata kamachinanpaq Diospa akllasqan churinqa ancha kuyakuqllañam hinaspa llakipayakuqllañam. Payqa pitapas yanapaykuqmi, hinaspapas ancha atiyniyuqmi.