Fariseokunawan Herodespa qatiqninkunam Jesusta wañurachiyta munarqaku, chaymi Jesusqa qatiqninkunawan kuska Galilea lamar qucha lawmanña pasakurqa. Chaymanmi Jesuswan tupaykuq achka-achka runakuna rirqaku Galileamanta, Tiromanta, Sidonmanta, Jordan mayupa chimpankunamanta, Jerusalenmanta hinaspa karupi kaq Idumea lawmantapas. Chaypim unquqkunata Jesus hampiptin wakin nisyu unquyniyuq runakuna kikinkumantaña Jesusman pawaykuqku (Marcos 3:9, 10).

Chaymi achkallaña runakuna ama ñitirunanpaq qatiqninkunata nirqa botechataña paypaq apamunankupaq, chaynapi lamar quchamantaña sumaqta runakunata yanapananpaq hinaspa yachachinanpaqpas.

Jesuspa qatiqnin Mateom nirqa Jesuspa chay ruwasqanqa Isaiaspa willakusqanman hina kasqanmanta (Mateo 12:17). ¿Imataq chay willakuyqa karqa?

Isaiasmi nirqaña: “Paymi akllasqay serviqniy, paytam kuyani, payraykum kusisqa kachkani. Espirituytam qusaq hinaptinmi llapallan runakunaman willakunqa allin kaqkunata imayna ruwanamanta. Manam peleanqachu nitaq qaparinqachu, manataqmi hatun ñankunapipas rimasqantaqa pipas uyarinqachu. Manam qiwisqa suqustapas pakinqachu manataqmi wañuruchkaqña mecherotapas wañuchinqachu tukuy mana allinkunata allichanankama. Paypa sutinpi hapipakuspam nacionniyuqkunaqa suyanqaku”, nispa (Mateo 12:18-21; Isaias 42:1-4).

Diospa akllasqan hinaspa kuyasqan serviqninqa Jesusmi. Paymi llapa runakunaman sumaqta willarqa allin kaqkunata imayna ruwanankumanta, fariseokunañataqmi yapa-yaparispa yachachisqankurayku runakunata pantachiqku. Paykunaqa manam Diospa kamachikuynintaqa allintachu yachachiqku, chaymi sabado punchawpipas unquqtaqa mana yanapaqkuchu. Jesusmi ichaqa taytan hina allin ruwaq karqa, chaymi chuya espiritupa yanapakuyninwan runakunata yanaparqa pantay yachachikuykunata musyanankupaq. Chayraykum religionkunapi punta apaqkunaqa wañurachiyta munarqaku.

Isaiasqa Jesusmantam nirqa: “Manam peleanqachu nitaq qaparinqachu, manataqmi hatun ñankunapipas rimasqantaqa pipas uyarinqachu”, nispan. Chaymi Jesusqa hampisqan  runakunata hinaspa qarqusqan demoniokunatapas nirqa ama pimanpas pim kasqanmanta willakunankupaq (Marcos 3:12). Payqa manam munarqachu yapa-yaparispa runakuna paymanta imakunatapas rimanankutaqa.

Jesusqa Diosmanta yachachispanmi qiwisqa suqus hina utaq wañuruqña mechero hina imawanpas ñakariqkunapa sunqunkuta tiyaykachirqa. Chay llampu sunqu runakunataqa kuyakuywan hinaspa sumaq rimaykunawanmi Jesusqa kallpancharqa. Pipas paypiqa hapipakunmanmi karqa.