Wakin judio runakunam samananku sabado punchawpi huk runata Jesus hampiruptin piñakurqaku. Chaymi Jesusqa paykunata nirqa: “Taytayqa kunankamam hinalla llamkachkan, ñuqapas hinallam llamkachkani”, nispa (Juan 5:17).

Jesusqa manam sabado punchawpi samanapaq Diospa kamachisqantachu qipaman churarqa. Aswanqa taytantam qatipakuchkarqa allin kaqkunata ruwaspan, chaymi imay punchawpas Diosmanta yachachirqa hinaspa unquqkunatapas hampirqa. Chay judio runakunam ichaqa Jesuspa nisqanwan aswanraq piñakuspanku wañurachiytaña munarqaku.

Paykunaqa niqkum Jesusqa sabado punchawpi samanapaq Diospa kamachisqanta mana kasukusqanta. Chaymantapas huchata hinam qawaqku Jesusqa Diospa churin kasqanmanta riqsichikusqanta. Paykunapaqqa Dios hina kasqantañam Jesusqa qawachikuchkarqa. Jesusmi ichaqa mana manchakuspan taytanmanta hinalla rimaspa nirqa: “Hanaq pacha taytaqariki churintam kuyan hinaspam tukuy ima ruwasqanta payman qawachin”, nispa (Juan 5:20).

Jehova Dios taytam kawsay qukuqqa, chaymi ñawpaqkunatapas wakin yupaychaqninkunaman atiyta qurqa wañuqkunata kawsarichinankupaq. Chayraykum Jesusqa nirqaraq: “Imaynam hanaq pacha taytapas wañusqakunata kawsarichin, chaynataqmi churinpas munasqankunaman kawsayta qun”, nispa (Juan 5:21). Chay nisqanwanmi Jesusqa qawachirqa hamuq punchawpipas wañuqkuna kawsarimunanmanta. Ichaqa chay watakunapipas Jesusqa kawsayta quchkaq hinam Diosmanta yachachispan runakunata yanaparqa. Chaymi nirqa: “Nisqaykunata uyariq hinaspa kachamuwaqniyta creeqqa wiñay kawsayniyuqmi, hinaspapas manam juicioman yaykunñachu aswanqa wañuymantam kawsaymanña pasarun”, nispa (Juan 5:24).

Chaywanpas wañuqkunataqa kawsarichinanmi karqa, chaymi nirqa: “Tiempom chayamuchkanña sepulturapi llapallan kaqkuna paypa qayasqanta uyarinankupaq hinaspam kawsarimunqaku”, nispa (Juan 5:28, 29).

Jesusqa Diospa munayninta ruwananpaq atiyta chaskispanpas riqsikurqam taytan aswan atiyniyuq kasqanta, chaymi nirqa: “Manam kikillaymantaqa imallatapas ruwaymanchu, [...] ñuqaqariki manam kikiypa munasqallaytachu maskani aswanqa kachamuwaqniypa munasqantam”, nispa (Juan 5:30). Tukuy chaykuna rimasqanwanmi Jesusqa lliwpa qayllanpi wamaqllaraq willakurqa, runakunata hamuq punchawpi juzgananpaq hinaspa wañuqkunata kawsarichinanpaq atiy chaskisqanmanta. Chay judio runakunamanqa manam Jesusllachu chaykunamantaqa willarqa, aswanqa bautizaq Juanpas nirqañam. Chaymi Jesus nirqa: “Qamkunam runakunata Juanman kacharqankichik, hinaptinmi Juanqa chiqap kaqmanta willakurqa”, nispa (Juan 5:33).

Chay runakunaqa yaqachá yuyarirqaku iskay wata ñawpaqta bautizaq Juanpa willakusqanta. Juanmi religionkunapi punta apaqkunaman nirqa “Diosmanta willakuq” utaq “Cristo” nisqanku hamunanmanta (Juan 1:20-25). Chaymi bautizaq Juantaqa allintaraq chaskisqankumanta yuyarichispan chay runakunata Jesus nirqa: “Qamkunaqa as tiempollam paypa achkiyninpi ancha kusikuyta munarqankichik”, nispa (Juan 5:35). Jesuspa imapas nisqanqa bautizaq Juanpamanta aswan allinmi karqa.

Jesusqa nirqataqmi: “Kay ruwasqaykunam  qawachin taytay kachamuwasqanta. Chaymantapas kachamuwaqniy kikin taytam ñuqamantaqa willakurqa”, nispa (Juan 5:36, 37). Chayna kasqantam taytanpas Jesuspa bautizakusqan punchaw qawachirqa (Mateo 3:17).

Chay judio runakunaqa manam imaraykupas Jesuspaqqa piñakunankuchu karqa. Diospa qillqankuna ñawinchasqankupim Jesusmantaqa willakurqaña. Chaymi Jesus nirqaraq: “Moisesta creechkaspaykichikqa ñuqatapas creewankichikmanmi, payqariki ñuqamantam qillqarqa. Moisespa qillqasqanta mana creechkaspaykichikqa, ¿imaynamá creewaqchik nisqaykunataqa?”, nispa (Juan 5:46, 47).