Betsaida llaqtapa wak lawninpim Jesusqa achkallay-achka runakunaman mikuchirqa, chayraykum chay runakunaqa munarqaku Jesus kamachiqninku kananta, Jesusmi ichaqa ayqikurqa. Chaymantam Jesusqa yakupa hawanta purirqa, hinaspam Pedrota pisi iñiyniyuq kasqanrayku yaku ukuman chinkaykuptin yanaparqa. Yanaparqataqmi lliw qatiqninkunatapas yaku ukuman mana chinkaykunankupaq.

Capernaum llaqtaman kaqlla chayaruptinkum chay mikuchisqan runakunaqa Jesusta tariruspanku tapurqaku: “¿Haykapitaq kaymanqa chayaramurqanki?”, nispa. Chay runakunaqa mikunankuraykullam Jesustaqa maskarqaku, chaymi Jesusqa paykunata qaqcharqa, hinaspañataqmi nirqa: “Llamkaychikqa amayá ismuruqlla mikuypaqchu aswanqa mana ismuspa wiñay kawsay qukuq mikuypaqyá”, nispa. Paykunañataqmi nirqaku: “¿lmatataq ruwanayku Diospa chaskisqan kanaykupaqqa?”, nispa (Juan 6:25-28).

Paykunaqa piensarqakuchá Moisespa chaskisqan kamachikuyta kasukunankumanta, ichaqa Jesusmi nirqa: “Diosqa munan paypa kachamusqan runapi iñinaykichiktam”, nispa. Chay runakunam ichaqa Jesuspi mana iñirqakuchu. Diospa atiyninwan imakunataña ruwachkaptinpas, hinallaraqmi imakuna ruwanantapas munarqaku chaynapi iñinankupaq. Chaymi Jesusta nirqaku: “Ñawpaq abuelonchikqa ‘maná’ nisqa sutiyuq mikuytam chunniqpi mikurqaku, qillqasqamiki kachkan: ‘Hanaq pacha tantatam mikuchirqa’”, nispa (Juan 6:29-31; Salmo 78:24).

Jesusñataqmi chaykunataqa Jehova Dios ruwasqanmanta rimaspan nirqa: “Chiqaptapunim nikichik: Moisesqa manam hanaq pacha tantatachu qusurqankichik, taytaymi ichaqa hanaq pacha chiqap tantata qusunkichik. Diospa tantanqa hanaq pachamanta uraykamuspan llapa runakunaman kawsay quqmi”, nispa. Paykunañataqmi ima niy munasqanta sumaqta mana yachaykuspa nirqaku: “Señor tukuy tiempoyá chay tantata quwayku”, nispa (Juan 6:32-34). Ichaqa, ¿imawantaq tupan chay ‘tantaqa’?

Jesusmi nirqa: “Ñuqam kani kawsay qukuq tantaqa. Pipas ñuqaman hamuqtaqa manapunim yarqanqachu, ñuqapi iñiqtaqa manataqmi haykapipas yakunayanqachu. Ñuqaqa nirqaykichikmi, qamkunaqa rikuwarqankichikmi kanpas, ichaqa manam iñinkichikchu. [...] Hanaq pachamantaqa uraykamurqani manam munasqayta ruwanaypaqchu aswanqa kachamuwaqniypa munasqanta ruwanaypaqmi. Kachamuwaqniyqa manam munanchu lliw quwasqan runakunamanta mayqillantapas chinkachinaytaqa, aswanqa munanmi tukupay punchawpi kawsarichinayta. Taytayqariki munan churinta llapallan riqsiqkuna hinaspa paypi iñiqkuna wiñay kawsayniyuq kanankutam, ñuqañataqmi tukupay punchawpi kawsarichisaq”, nispa (Juan 6:35-40).

Hinaptinmi ‘hanaq pachamanta uraykamuq tantawan’ Jesus tupachikusqanmanta judio runakunaqa piñakuspa rimapakuyta qallaykurqaku (Juan 6:41). Paykunaqa Nazaret lawpi runakunapa churinku hinalla kasqanpaqmi Jesustaqa hapiqku. Chaymi ninakuqku: “¿Manachu payqa Joseypa churin Jesus? Tayta-mamantapas ñuqanchikqa riqsinchikmi”, nispa (Juan 6:42).

Chayna rimapakuptinkum Jesus nirqa: “Amañayá qamkunapuraqa rimapakuychikchu. Manam pipas ñuqamanqa hamunmanchu kachamuwaqniy taytay mana pusamuptinqa, ñuqaman hamuqtaqa tukupay punchawpim kawsarichisaq. Kayna qillqasqam kachkan Diosmanta  willakuqkunapa qillqanpi: ‘Llapallankum paykunaqa Jehova Diospa yachachisqan kanqaku’, niq. Taytaymanta pipas uyariqqa hinaspa yachaqqa ñuqamanmi hamun. Manam pipas Diostaqa rikurqachu aswanqa Diosmanta hamuqllam, paymi taytataqa rikurqa. Chiqaptapunim nikichik: Pipas iñiqqa wiñay kawsayniyuqmi”, nispa (Juan 6:43-47; Isaias 54:13).

Jesusqa ñawpaqtam Nicodemo sutiyuq runaman wiñay kawsaymanta yachachirqa, payqa nirqam haykam paypi iñiqkunalla wiñay kawsayniyuq kanankumanta (Juan 3:15, 16). Chaymi kay kutipipas aswan achkamanña nirqa payraykulla wiñay kawsay haypanankumanta, chaytaqa manam “maná” nisqanku tantawanpas hayparqakuchu, manataqmi Galileapi sapa punchaw mikusqanku tantawanpas haypanankuchu karqa. Chaymi payraykulla wiñay kawsay haypanankumanta kaqmanta nirqa: “Ñuqam kani kawsay qukuq tanta”, nispa (Juan 6:48).

Hanaq pacha tantamantaqa Jesusqa hinallaraqmi Capernaum llaqtapa yupaychana wasinpipas rimarqa.