Jesuspa 12 apostolninkunaqa Galileapim Diosmanta kusisqallaña willakamurqaku, hinaspam tukuy ima ruwasqankumanta kutiramuspanku Jesusman willakurqaku. Paykunaqa pisipasqallañam kachkarqaku, ichaqa achkallaña runakuna hamusqankuraykum mikuytapas mana atirqakuchu. Chaymi Jesus nirqa: “Haku runapa mana kasqanman, chaypi ratollapas samariykamunaykichikpaq”, nispa (Marcos 6:30, 31).

Paykunaqa yaqapaschá Capernaum lawpi kachkarqaku, chaymi boteman qispiruspanku Betsaida llaqtapa wak lawninmanraq rirqaku. Ichaqa lluqsisqankuta rikuqninkunam hinaspa hukkunapas kallpa-kallpaylla lamar quchapa patanta rirqaku, hinaspam llallirurqakuraq.

Jesusqa qatiqninkunawan lamar quchapa patanman chayaruspankum chay achkallaña runakunata tarirurqaku. Paykunataqa mana michiqniyuqta hina qawaykuspanmi Jesusqa llakirikururqa, chaymi Diospa munaychakuyninmanta sumaqta yachachirqa (Marcos 6:34). Unquqkunatapas hampirqam (Lucas 9:11). Inti siqaykuytañataqmi qatiqninkuna nirqaku: ‘Chunniqmi kay kasqanchikqa, llumpay tardeñataqmi kachkanpas. Niykuyá runakunata pasakunankupaqña, chaynapi llaqtachakunaman rispanku mikuyta rantikaykamunankupaq’, nispa (Mateo 14:15).

Jesusqa chay runakunaman mikuykachinanpaq atiyniyuq kaspanpas qatiqninkunatam nirqa: “¿Imapaqraqtaq rinqaku?, qamkunayá imallatapas mikuykachiychik”, nispa (Mateo 14:16). Hinaspam Betsaida llaqtayuq Felipetapas ima piensasqanta yachananpaq tapurqa: “¿Maymantataq tantata rantimusun kay runakuna mikunankupaq?”, nispa. Chaypiqa karqakum 5.000 qarikuna, karqataqmi warmikunapas chaynataq warmakunapas. Llapankuta yupaykusqaqa yaqapaschá 10.000 masnin karqaku. Chaychá Felipeqa nirqa: “Iskay pachak denario nisqa qullqipa chanin tantapas manam haypanmanchu kay runakuna hukninkallapas chaskinankupaqqa”, nispa (Juan 6:5-7). Chay pachaqa huk denario qullqillapaqmi pipas tukuy punchaw llamkaq.

Andresñataqmi nirqa: “Kaypi kaq warmachapam kachkan cebadamanta pichqa tantan hinaspa iskay challwachankuna. Ichaqa, ¿imaynamá kaychallaqa haypanqa kaychikan runakunamanqa?”, nispa (Juan 6:9).

Ñam 32 kaq watapi marzo utaq abril killakunaña karqa, hinaspapas pascua fiestam chayamuchkarqaña, pastokunapas urqukunapim sumaqllataña wiñamuchkarqa. Chaymi Jesusqa qatiqninkunata nirqa chay achkallaña runakunata  pichqa chunkatakama hinaspa pachak chunkatakama pastopi tiyaykachinankupaq. Hinaspam Jesusqa pichqa tantatawan iskay challwata hapiykuspan taytanta mañakurqa. Hinaspanñataqmi qatiqninkunaman qurqa lliw runakunaman aypunankupaq. Chaynapim chay runakunaqa saksanankukama mikurqaku.

Chaymantam Jesusqa qatiqninkunata nirqa: “Ama imaniraqllapas usunanpaq puchuqkunata huqariychik”, nispa (Juan 6:12). Chaymi qatiqninkunaqa 12 canastataraq huñururqaku.