Jesusqa ñam iskay wataña Diosmanta willakuchkarqa. Hinaspam Simonpa wasinpi pampachanakuymanta rimaruspan Galilea lawkunapi kaqlla Diosmanta willakurqa. Payqa 12 apostolninkunawanmi kuska rirqa, chaynataq ‘unquykunamanta hinaspa mana allin espiritukunamanta hampisqan’ warmikunawanpas (Lucas 8:2). Chay warmikunaqa karqaku Magdalenawan sutichasqa Mariam, Susanam hinaspa Herodes Antipaspa serviqninpa warmin Juanam.

Jesusqa aswan riqsisqaraq kaptinmi runakunaqa aswanraq ruwasqankunamanta tukuyta rimaqku. Chaymi mana rimaq, ñawsa hinaspa demonioyuq runata Jesus hampiruptin qawanakuspa Jesusmanta nirqaku: “¿Paychu kanman Davidpa churin?”, nispa (Mateo 12:23).

Jesuspa samapakusqan wasimanmi achkallaña runakuna huñunakururqaku, chaymi qatiqninkunawan kuska mikuytapas manaña atirqakuñachu. Chaywanpas manam lliw runakunapaqchu Jesusqa Diospa kachamusqan runa utaq “Davidpa churin” karqa. Chaypiqa karqakutaqmi Jerusalenmanta riq wakin escribakunawan fariseokunapas, ichaqa manam Jesuspa yachachisqanta uyariqchu rirqaku, aswanqa mana allinkunata rimaqmi. Chaymi runakunaman niqku Jesusqa ‘Beelzebubniyuq kasqanta’ utaq ‘demoniokunapa kamachiqnin kasqanta’ (Marcos 3:22). Jesuspa ayllunñataqmi chaqwallaña kasqanta yacharuspanku Jesusta pusaq rirqaku.

Jesuspa wawqi-paninkunaqa manam Diospa churin kasqanpaqchu Jesustaqa hapiqku (Juan 7:5). Chaymantapas Nazaretpi paykunawanraq Jesus kaspanqa manam runakunapa maskasqanchu karqa, chaymi chaqwa ruwasqanta piensaspanku “locoyarunmi” nirqaku (Marcos 3:21).

Ichaqa manam Jesuschu chaqwataqa ruwarqa, aswanqa escribakunawan fariseokunam. Paykunam unquq runata Jesus hampiruptin  mana allinkunata rimaspa nirqaku: “Kay runaqa demoniokunataqa qarqun, demoniokunata kamachiq Beelzebubpa atiyninwanmi”, nispa (Mateo 12:24).

Jesusñataqmi chayta musyaruspan nirqa: “Mayqin gobiernopas kikinpa contranpi rakinasqa kaspanqa purmanmi, mayqin llaqtapas utaq ayllupas rakinasqa kaspanqa manataqmi takyanqachu. Chaynallataqmi satanaspas kikillanta qarqukuspanqa rakinasqa rikurirun. Hinaptinqa, ¿imaynamá munaychakuyninqa takyanman?”, nispa (Mateo 12:25, 26).

Chay tiempopaqqa wakin judiokunapas demoniokunataqa qarquqkum (Hechos 19:13). Chaymi Jesusqa nirqaraq: “Beelzebubpa atiyninwan demoniokunata qarquptiyqa, ¿pipa atiyninwantaq qamkunapa churikichikqa qarqun?”, nispa. Chay fariseo runakunaqa Jesusmantam mana allinta rimarqaku, demoniokuna qarquq judiokunamantam ichaqa mana imatapas niqkuchu. Chaymi Jesusqa hinallaraq nirqa: “Ichaqa Diospa espiritunwan demoniokunata ñuqa qarquptiyqa, chiqaptapunim Diospa munaychakuyninqa hayparamusunkichikña”, nispa (Mateo 12:27, 28).

Hinaspam Jesusqa satanasmantapas aswan atiyniyuq kasqanrayku demoniokunata qarquy atisqanmanta rimaspan nirqa: “¿Imaynatamá pipas kallpasapa runapa wasinman yaykuruspanqa kapuqninkunata apakunman puntata wasiyuqta manaraq chaqnaruchkaspanqa? Chaqnaruspallanmi wasintaqa suwarunman. Pipas mana ñuqawan kaqqa contraypim kachkan, ñuqawan mana huñuqqa runakunatam ñuqamanta karunchachkan”, nispa (Mateo 12:29, 30). Escribakunawan fariseokunaqa satanaswan kasqankutam qawachiqku Jesuspa contranpi kasqankuwan. Chayraykum paykunaqa Diospa churinmanta runakunata karunchachiqku.

Chaymantam Jesusqa chay runakunata nisyuta qaqchaspan nirqa: “Runakunaqa tukuy imamantam pampachasqa kanqaku, ima hucha ruwasqankumantapas hinaspa insultaspa ima mana allin rimasqankumantapas. Chuya espirituta insultaspa mana allin rimaqmi ichaqa mana haykapipas pampachasqachu kanqa, payqa wiñaypaq huchayuqmi kanqa”, nispa (Marcos 3:28, 29). Chaynatam Jesusqa qawachichkarqa Diospa atiyninwan imapas ruwakusqanmanta mana allinkunata rimayqa wiñaypaq hucha kasqanmanta.