Betsaida llaqtaman Jesuswan qatiqninkuna chayaruptinkum runakunaqa Jesusman ñawsa runata hampiykunanpaq pusarqaku.

Jesusñataqmi makinmanta aysaspan chay runataqa llaqtachamanta karuman pusarqa, hinaspam ñawinpi tuqaykuspan tapurqa: “¿Imallatapas rikuchkankichu?”, nispa. Chay runañataqmi nirqa: “¡Runakunatam rikuchkani, paykunaqa sachakuna hinam kachkanku, ichaqa purichkankum!”, nispa (Marcos 8:23, 24). Chaymi Jesusqa chay runapa ñawinta tupaykuspa hampiykurqa, hinaspam wasinman kutikunanpaq niykuspan nirqa llaqtachamanqa amaña kutinanpaq.

Hinaspañataqmi Jesusqa qatiqninkunawan kuska Cesarea de Filipo sutiyuq llaqta lawman rirqaku. Chaymanqa hanayninpamanmi karuta rirqaku. Chayqa urqukunapa kasqanpiñam karqa, chaymantaqa Hermon sutiyuq ritipa kanan hatun urqupas qawakuqñam. Yaqachá iskay-kimsa punchaw rirqaku.

Chayna risqankupim Jesusqa Diosta mañakuq rirqa. Payqa isqun utaq chunka killakunamantam wañuchisqaña kanan karqa, chaymi qatiqninkunarayku llakisqa kachkarqa. Jesustaqa wakin qatiqninkunam qipancharurqaku, wakinñataqmi hukmanyasqa kachkarqaku. Ichapas wakinqa imanasqa kamachiq kayta Jesus mana munasqanmanta hukmanyaqku utaq imanasqa aswan sutillata Diospa kachamusqan kasqanta mana qawachikusqanmanta.

Jesuspa mañakusqan lawman qatiqninkuna riptinkuñataqmi Jesusqa nirqa: ‘Runakunaqa, ¿pi kasqantataq ninku runapa churinmanta?’, nispa. Paykunañataqmi nirqaku: “Wakinmi ninku bautizaq Juan kasqanta, hukkunañataq Elias kasqanta, wakinkunaqa ninkuraqmi Jeremias utaq Diosmanta huk kaqnin willakuq kasqanta”, nispa. Arí, runakunaqa Diosmanta huk kaqnin willakuq kawsariramuqpaqmi Jesustaqa hapiqku. Chaymi qatiqninkuna ima nisqankuta yachananpaq Jesus nirqa: “Qamkunaqa, ¿pi kasqaytataq ninkichik?”, nispa. Hinaptinmi Pedro chaylla nirqa: “Qamqa kanki kawsaq Diospa churin Cristom”, nispa (Mateo 16:13-16).

Jesusñataqmi Pedrota Diospa yanapakuyninwan chayta nisqanrayku nirqa: ‘Mayna kusisqam kanki Pedro’, nispa. Nirqataqmi: “Qanmi kanki Pedro, kay hatun rumipa hawanpim ñuqapi iñiqkunata hatarichisaq, paykunataqa wañuypas manam munaychakunqachu”, nispa. Chaywanqa kikin Jesus paypi iñiqkunata hatarichinanmantam nichkarqa, chaynapi kay pachapi wañukunankukama Diosman sunqu kaspankuqa manaña wañuyta riqsispa wiñaypaq kawsakunankumanta. Hinaspam Pedrotaqa nirqaraq: “Ñuqam qusqayki hanaq pacha Diospa munaychakuyninpa llavenkunata”, nispa (Mateo 16:18, 19).

Jesusqa manam lliw apostolninkunamanta Pedrolla aswan allin kasqantachu qawachichkarqa, nitaq iñiqkunata hatarichiq kananpaqchu akllachkarqa. Jesusllam iñiqkunata hatarichina  wasipa esquinanpi hapiq rumiqa (1 Corintios 3:11; Efesios 2:20). Chaywanpas Pedroqa kimsa llavekunatam chaskinan karqa. Chaywanmi punkuta kichachkaq hina huk runakunatapas Diospa munaychakuyninman yaykunankupaq yanapanan karqa.

Punta kaq llavetam servichikunan karqa 33 kaq watapi pentecostes fiestapi. ¿Imaynata? Judio runakunaman hinaspa judio religionman yaykuqkunaman imata ruwaspa salvakunankumanta willaspam. Iskay kaq llavetañataqmi servichikunan karqa haykam iñiq Samaria runakunata Diospa munaychakuyninman yaykunankupaq yanapaspan. Chayman yaykunankupaqqa Cornelio hina mana judio kaqkunatapas yanapananmi karqa, chaytaqa ruwanan karqa kimsa kaq llaveta 36 kaq watapi servichikuspanmi (Hechos 2:37, 38; 8:14-17; 10:44-48).

Chaymantam Jesusqa Jerusalenpi imayna wañuchisqa kananmanta willakurqa, hinaptinmi apostolninkunaqa llumpayta llakirikururqaku. Pedroñataqmi Jesus kawsarimuspan hanaq pachaman kutinanmanta mana sumaqta yachaspan Jesusta huk lawman pusaspa nirqa: “Llakipayarikuyá señor, kayqa manapunim qamtaqa pasasunkichu”, nispa. Jesusñataqmi muyurispan Pedrota qaqcharqa: “¡Qipayman churakuy satanas! Qamqa pantachiwachkankim, piensasqaykiqa manam Diospa piensasqanman hinachu aswanqa runapa piensasqallanmi”, nispa (Mateo 16:22, 23).

Hinaspam runakunatawan wakin apostolkunata qayaspan qatiqnin kayqa sasa kananmanta nirqa: “Pipas qatiwayta munaqqa, amaña kikillanpaq kawsaspayá ñakarichiqnin qirunta qipikuykuspan hinalla qatiwachun. Vidanta salvay munaqqa wañunqam, ñuqarayku hinaspa sumaq willakuykunarayku wañuqmi ichaqa kawsanqa”, nispa (Marcos 8:34, 35).

Chaynatam qawachirqa Jesuspa chaskisqan kayta munaqkunaqa mana manchakuq hinaspa Diosrayku tukuyta ruwaq kanankumanta. Nirqataqmi: “Ñuqamanta hinaspa rimasqaykunamanta kay huchallikuq hinaspa Diosta qipanchaq runakunapa qayllanpi pipas pinqakuqtaqa, runapa churinpas pinqakunqam taytanpa kanchariyninpi chuya angelninkunapiwan chayamuspan”, nispa (Marcos 8:38). Arí, Jesus chayamuspanqa ‘sapakamamanmi imayna kasqanman hina paganqa’ (Mateo 16:27).