Diosmanta Jesuspa willakusqanqa tukunanpaq hinañam karqa, chaywanpas rikchanachiykunawanmi qawachirqa riqsisqa sacerdotekunawan escribakunaqa mana allin runakuna kasqankuta. Chaymi wañurachiyta munarqaku (Lucas 20:19). Ichaqa manaraq tukuspanmi Jesusqa huk rikchanachiymantawan willakurqa.

Nirqam: “Hanaq pacha Diospa munaychakuyninqa rikchakunmi churinpaq casarakuy convidota ruwaq kamachikuqman. Kay kamachikuqmi sirvientenkunata kamachirqa casarakuy convidoman hamuqkunata qayamunankupaq, paykunam ichaqa qayamuptinkupas mana hamuyta munarqakuchu”, nispa (Mateo 22:2, 3). Chaynatam Jesusqa ‘hanaq pacha Diospa munaychakuyninmanta’ rimaspan willakurqa. Chay kamachiq runaqa Jehova Dioswanmi tupan, kamachiqpa churinñataqmi Jesuswan, hinaspa convidoman qayachisqa runakunañataq Jesuswan kuska kamachinankupaq kaqkunawan.

¿Pikunataq puntata qayachisqa karqaku? Judio runakunam, paykunamanmi Jesuswan qatiqninkunaqa Diospa munaychakuyninmanta willarqaku (Mateo 10:6, 7; 15:24). Paykunataqmi Dioswan 1513 kaq watapi leywan contratota ruwarqaku, chayqa Jesuspa tiemponmanta ñawpaqtaraqmi karqa. Paykunam ‘sacerdotekuna kananku karqa’ (Exodo 19:5-8). Ichaqa, ¿haykapimantam convidoman hina qayachisqa karqaku? 29 kaq watamantam, chay watamantam Jesusqa Diospa munaychakuyninmanta willakuyta qallaykurqa.

¿Imatam yaqa lliw Israel runakuna ruwarqaku qayachisqa kaspankupas? Jesusmi nirqa ‘hamuyta mana munasqankumanta’. Religionkunapi punta apaqkunawan wakin judiokunapas yaqa lliwmi Jesustaqa mana chaskirqakuchu Diospa kachamusqan kamachiqta hinaqa.

Ichaqa huktawanraqmi qayachisqa kananku karqa, Jesusmi nirqa: “Kaqmantam wakin sirvientenkunatapas kamachispan nirqa: ‘Convidoman hamuqkunata nimuychik: “Mikuymi listoña kachkan, ñam toroykunawan wira animalniykunapas nakasqaña, tukuy imakunapas listoñam kachkan. Hamuychikyá casarakuy convidoman”’, nispa. Hamunankupaq kaqkunam ichaqa mana kaqpaqpas hapispanku pasakurqaku: Hukninmi chakranman, hukninñataq negocionman. Wakinñataqmi chay sirvientekunata hapiruspanku maqaparurqaku hinaspa wañurachirqaku”, nispa (Mateo 22:4-6). Chaynatam Jesuspa qatiqninkunata ruwananku karqa Diospa llaqtan hina akllasqa kasqanku qipata. Chaykamaqa hinallaraqmi judiokunaqa Diospa munaychakuyninpi kanankupaq qayachisqa karqaku. Ichaqa yaqa lliwmi qipanchaspanku Jesuspa qatiqninkunatapas maqapananku karqa (Hechos 4:13-18; 7:54, 58).

Chaymantam Jesusqa Israel nacion imapi tukunanmanta nirqa: “Hinaptinmi chay kamachiq runaqa piñakuruspan tropankunata kacharqa, chaymi chay wañuchiq runakunata wañurachirqaku chaynataq llaqtankutapas kañarurqaku”, nispa (Mateo 22:7). Chaynam karqa judio runakunawan 70 kaq watapi Roma nacion tropakuna Jerusalen ‘llaqtankuta’ purmarachiptinku.

Chayna kaptinmi convidomanqa hukkunaña qayachisqa kananmanta Jesus nirqa: ‘Chaymantam kamachiqqa sirvientenkunata nirqa: “Casarakuy convidoqa listoñam kachkan, chay invitasqakunam ichaqa mana chay convidopaq hinachu karqaku. Chayraykuyá llaqtamanta lluqsiq ñankunaman riychik, hinaspayá haykam tarisqaykichikta nimuychik convidoman hamunankupaq”, nispa. Chaymi sirvientekunaqa ñankunaman rispanku lliw tarisqanku runakunata huñuramurqaku, allin runakunatawan mana allin runakunata, hinaptinmi wasiqa chay hamuq runakunawan huntarurqa’, nispa (Mateo 22:8-10).

Chayqa karqa apostol Pedro mana judio kaqkunata Diospa llaqtanpi kanankupaq yanapayta qallaykuptinmi. Paymi 36 kaq watapi soldadokunapa kamachiqnin Corneliota hinaspa wasinpi kaqkunatawan yanaparqa chuya espirituta chaskinankupaq. Chaynapim Diospa munaychakuyninpi kanankupaq qayachisqa karqaku (Hechos 10:1, 34-48).

Ichaqa manam lliwchu chaskisqa kananku karqa, chaymi Jesus nirqa: “Chay kamachikuq runam invitasqakunata qawaq yaykuspan huk runata rikururqa casamientopaq hina mana pachasqata. Chaymi nirqa: ‘Yaw tayta, ¿imaynataq kaymanqa yaykuramurqanki casamientopaq hina mana pachasqa kachkaspaykiqa?’, nispa. Chaymi mana imatapas rimarirqachu. Hinaptinmi chay kamachiq runaqa sirvientenkunata nirqa: ‘Makintawan chakinta chaqnaruspaykichikyá hawa law tutayayman wischuychik, chaypim waqaspa kirunta kirichichichinqa’, nispa. Chaynaqa, achkamá qayasqakunaqa, akllasqakunam ichaqa aschalla”, nispa (Mateo 22:11-14).

Religionkunapi punta apaqkunaqa manam lliwtachu musyarqaku Jesuspa ima niy munasqantaqa. Chaywanpas piñasqallañam karqaku, hinaspapas pinqayman churasqa kaspankum pasaypaqta Jesustaqa wañurachiyta munarqaku.