Jesusqa apostolninkunawan Diosta mañakuyta tukuruspanmi ‘Diospaq takita takirqaku’, hinaspam Olivos muquman rirqaku (Marcos 14:26). Chaypim sapa kutilla risqan Getsemani huertaman yaykurqaku.

Chay huertaqa olivos sachakunapa wiñanan sumaq huertam karqa. Chay yaykunallapim apostolninkunamanta pusaqta saqispan nirqa: “Wakman rispay Diosta mañakamunaykama kaypi tiyachkaychik”, nispa. Hinaspam Pedrowan, Santiagowan hinaspa Juanllawan huertapa ukunman yaykurqa. Llumpay llakisqa tarikuspanmi nirqa: “Wañukunaypaq hinañam llumpay llakisqa kachkani, kaypi kaspaykichikyá rikchaysiwaychik”, nispa (Mateo 26:36-38).

Jesusqa paykunamanta karuniqpi qunqurakuykuspanmi taytanta llakisqallaña mañakuspan nirqa: “Taytalláy qamqa tukuy imatam atinki, kay vasotayá ñuqamanta asuriykachiy, ichaqa amayá munasqayman hinachu, aswanqa munasqaykiman hinayá”, nispa (Marcos 14:35, 36). ¿Runakunarayku wañuchisqa kayta manaña munaspanchu chaynata nirqa? Manam.

Jesusqa hanaq pachapi kaspanmi qawamurqa Roma nacionniyuqkunaqa llumpaysuta ñakarichispa runakuna wañuchisqankuta. Chaymi Jesusqa runa kaspan ñakarichinankuta yachaspan llakisqa tarikurqa. Payqa manam munarqachu ñakarichinankutaqa, ichaqa manam chayllamantachu llakisqaqa karqa. Paytaqa llumpay huchasapata hinam wañuchinanku karqa, chaymi taytanpa sutin pinqaypi karunanmanta aswanqa llakikurqa. Huk-iskay horallamantañam wañuchinanku karqa Diosta kamisqanmanta tumpaspanku.

Jesusqa unaymi taytanta mañakullarqa, chaymantam apostolkunaman asuykuspan puñuchkaqta tarirurqa. Chaymi Pedrota nirqa: “¿Manachum atirqanki huk horallapas ñuqawan rikchayta? Qawan-qawanllayá kaychik hinaspayá Diosta tukuy tiempo mañakuychik ama tentasqa kanaykichikpaq”, nispa. Jesusqa yacharqam apostolninkunapas hukmanyasqa hinaspa pisipasqa kasqankuta. Chaymi nirqa: “Allin ruwayta runa munaptinpas cuerpoqa mana kallpayuqmi kachkan”, nispa (Mateo 26:40, 41).

Jesusqa kaqmantam pasarqa taytanta mañakuq, mañakuspanmi nirqa: “Kay vasotayá ñuqamanta asuriykachiy”, nispan. Kutirispanmi apostolninkunataqa tarirurqa kaqmanta puñuchkaqta. Chaymi nirqa mana tentachikunankupaqqa Diosta mañakuspa rikchanankumanta, paykunañataqmi mana ima niytapas atirqakuchu (Marcos 14:40). Jesusqa kaqmantam mañakuq pasarqa, qunqurakuykuspanmi hinalla mañakurqa.

Llumpay llakisqam tarikurqa huchasapa runata hina wañuchiptinku taytanpa sutin pinqaypi qipananmanta. Jehova Diosqa uyarichkarqam churinpa mañakusqantaqa, chaymi manapas unaymanta huk kaqnin angelninta kachamurqa  kallpanchaykunanpaq. Chaywanpas Jesusqa astawanraqmi tukuy ‘kallpanwan’ taytanta mañakurqa. Llumpa-llumpay llakisqam tarikurqa, payqa yacharqam taytanpa nisqanman hina mana ruwaptinqa kikinpas chaynataq Diosta kasukuq runakunapas wiñaypaq mana kawsanankumanta. Chaykunapi yuyaymanasqanraykuchá sudorninpas yawar hinaraq suturqa (Lucas 22:44).

Kimsa kaq kutipi apostolninkunapa kasqanman kutispanmi Jesusqa paykunata kaqmanta puñuchkaqta tarirurqa. Chaymi nirqa: “¿Kunanraqchu puñuchkankichik hinaspa samachkankichik? Ñam hora hichparamunña huchasapakunapa makinman runapa churin entregasqa kananpaq. Hatariychik, hakuchik. Traicionawaqniymi hamuchkanña”, nispa (Mateo 26:45, 46).