Nisan killapa 16 domingo punchawninpiqa Jesuspa qatiqninkunam hukmanyasqaraq kachkarqaku. Manaraqmi yacharqakuchu Jesuspa ayan imanasqa chinkarusqanmanta (Mateo 28:9, 10; Lucas 24:11). Hina chay punchawllam Cleopaswan huk kaqnin iñiqpas Jerusalenmanta Emausman yaqa iskay hora puriyta rirqaku.

Imakuna pasasqanmanta rimastin richkaptinkum mana riqsisqanku runa hayparuspan nirqa: ‘¿Imakunamantam kaynataña rimastin richkankichik?’, nispa. Cleopasñataqmi nirqa: ‘¿Jerusalenpi yachaq forasterochu kanki, chaychu mana yachanki kay punchawkuna tukuy pasasqanta?’, nispa. Chay runañataqmi nirqa: “¿Imakunamanta?”, nispa (Lucas 24:17-19).

Paykunañataqmi nirqaku: ‘Nazaret llaqtayuq Jesusta tukuy pasasqanmantayá [...]. Suyarqanikum payqa Israel runakuna librananta’, nispa (Lucas 24:19-21).

Hinaptinmi Cleopaswan riqmasinqa chay runaman willarqaku sepulturaman riq warmikuna Jesuspa ayanta mana tarisqankumanta, chaynataq chay warmikunaman Jesus kawsarirusqanmanta angelkuna willasqanmantapas. Willarqakutaqmi Jesuspa wakin qatiqninkunapas sepulturaman rispanku “warmikunapa imam nisqankuman hina” Jesuspa ayanta mana tarisqankumanta (Lucas 24:24).

Chaykuna pasasqanmanta Cleopaswan riqmasin mana entiendespa hukmanrayaptinkum, hinaspa Jesus kawsarirusqanmanta iskayrayaptinkum chay runaqa nirqa: “¡Yaw mana umayuq runakuna hinaspa Diosmanta willakuqkunapa tukuy nisqankunata sasa creeqkuna! ¿Manachu Cristoqa tukuy kaykunawan ñakarinan karqa chaynapi hatunchasqa kananpaq?”, nispa (Lucas 24:25, 26). Hinaspam Cristota imakuna pasananmanta Diospa qillqanpi nisqanta yachachirqa.

Emauspa hichpanman chayaruspankum paykunaqa astawan yachayta munaspanku chay runata nirqaku: “Ñuqaykuwan qipakuy, ñam intiqa siqaykunña, hinaspapas tutaykamuchkanñam”, nispa. Chaymi chay runaqa paykunawan mikunanpaq Diosta mañakuykuspan tantata parteykuspa haywaykarirqa. Chayta ruwasqanwanmi musyarurqaku Jesus kasqanta, ichaqa chayllam chinkarurqa (Lucas 24:29-31). Chaywanqa manañam iskayrayarqakuñachu Jesus kawsarirusqanmantaqa.

Chaymi Cleopaswan riqmasinqa kusisqallaña nirqaku: “¿Manachu ñanta hamuchkaptinchik sunqunchikpas ruparirqaraq Diospa qillqanmanta suma-sumaqta entiendechiwachkaptinchik?”, nispa (Lucas 24:32). Hinaspam Jerusalenman chaylla kutirqaku, chaypim kachkarqaku Jesuspa qatiqninkunawan apostolninkuna. Cleopaswan riqmasin manaraq imatapas nichkaptinkum chaypi kaqkunaqa nirqaku: “¡Chiqaptamiki señor Jesusqa kawsariramusqa hinaspa Simonmanpas rikuriykusqa!”, nispa (Lucas 24:34). Cleopaswan riqmasinpas willakurqakum paykunamanpas Jesus rikuriykusqanmanta.

Qatiqninkuna wasi ukupi rimachkaptinkum Jesusqa qunqayllamanta rikuriykurqa. Paykunaqa judiokunata manchakuspankum punkutapas llaveruspanku wasi ukupi kachkarqaku, chaymi Jesus rikuriykuptinqa mana ima niytapas atirqakuchu. Jesusñataqmi kuyakuyllawan nirqa: “Allinlla kanaykichiktam munani”, nispa. Paykunañataqmi mancharisqa kaspanku huk kutipi hina mana musyarqakuchu Jesus kasqanta (Lucas 24:36, 37; Mateo 14:25-27).

Jesusñataqmi rikupakusqankuta mana piensanankupaq nirqa: ‘¿Imanasqataq hukmanyasqa kachkankichik hinaspa iskayrayachkankichik? Makiytawan chakiyta qawaychik, ñuqam kani.  Mapas llachpaykuwaychik hinaspa qawaykuwaychik. Qawawasqaykichikpi hinapas ñuqaqa kani aychayuq hinaspa tulluyuqmi, espirituqariki manam chaynachu’, nispa (Lucas 24:36-39). Chaywan kusisqa kaspankupas iskayrayarqakuraqmi.

Chaymi mana iskayrayanankupaq Jesusqa nirqa: “¿Imallaykichikpas kachkanchu mikunapaq?”, nispa. Hinaptinmi kankasqa challwata haywaykuptinku mikuykurqa, hinaspam nirqa: “Yuyariychikyá qamkunawanraq kachkaspay willasqayta. Willarqaykichikmi Moisespa leyninpi Diosmanta willakuqkunapa qillqasqan, hinaspa Salmos libropi ñuqamanta qillqakusqan cumplikunanmanta”, nispa (Lucas 24:41-44).

Jesusqa chaypi kaqkunamanmi Cleopasmanwan riqmasinman hina Diospa qillqanpi ima nisqanmanta entiendechirqa, chaymi nirqa: ‘Qillqasqam kachkan: Cristoqa wañuchisqa kaspanmi kimsa punchawmanta kawsarimunan karqa. Paypa sutinpitaqmi Jerusalenmanta qallaykuspa llapallan nacionkunapi willakuna karqa runakuna huchankumanta wanakuspa pampachasqa kanankupaq. Qamkunam tukuy kaykunamanta willakunkichik’, nispa (Lucas 24:46-48).

Jesus rikuriykuptinqa Tomasqa manam chaypichu karqa. Chaymi kusisqallaña willarqaku: “¡Señortam rikuruniku!”, nispa. Tomasñataqmi nirqa: “Sichum ñuqa mana rikusaqchu makinkunapi clavowan takasqankuta, manataq dedoytapas clavokunapa uchkusqanman hinasaqchu nitaq makiytapas waqtanman hinasaqchu, hinaspayqa manapunim creesaqchu”, nispa (Juan 20:25).

Chaymanta pusaq punchaw pasaytam qatiqninkunaqa kaqmanta huñunakurqaku punkutapas llaveruspanku. Hinaptinmi Jesusqa aycha cuerpoyuq paykunaman rikuriykuspan nirqa: “Hawkallayá kaychik”, nispa. Chaymantam Tomasta nirqa: “Kayman dedoykita hinay, hinaspa makiykunata qaway, makikitapas waqtayman hinay, hinaspayá amaña iskayrayaspa creey”, nispa. Chaymi Tomasqa nirqa: “¡Señorlláy hinaspa Diosnilláy!”, nispa (Juan 20:26-28). Payqa manañam iskayrayarqañachu Jesusqa kawsarisqanmanta nitaq Diospa akllasqan kasqanmantapas.

Jesusqa Tomasmanqa nirqataqmi: “¿Qawaykuwaspaykichu creerunki? Kusisqam kanku mana rikuchkaspankupas creeqkunaqa”, nispa (Juan 20:29).