Jesusqa cenasqanku tutapim apostolninkunata kallpancharqa. Yaqa chawpi tuta pasaytañam huk rikchanachiyta willakurqa.

Nirqam: “Ñuqam kani chiqap uvas planta, taytayñataqmi tarpuq”, nispa (Juan 15:1). Chayna nisqanqa tuparqam Israel runakunata uvas plantawan Jehova Diospa tupachisqanwan (Jeremias 2:21; Oseas 10:1, 2). Ichaqa Jehova Diospa qipanchasqanñam kananku karqa (Mateo 23:37, 38). Jesusqa rimachkarqa payña uvas planta hina kasqanmantam. 29 kaq watapim Jesusqa Diospa chuya espiritunwan akllasqa karqa, chaymantapacham taytanpa uvas planta wiñachisqan hina karqa. Ichaqa manam payllachu uvas plantamanqa rikchakurqa.

Jesusqa nirqam: “Ñuqapi kachkaspan mana ruruq kallmataqa taytaymi kuchun, ruruq kallmatañataqmi rawmaykuspan limpiaykun astawan rurunanpaq. [...] Uvas plantapi kallma mana kaspanqa manam kikillanmantaqa rurunmanchu, chaynallataqmi qamkunapas mana ruruwaqchikchu ñuqawan huklla mana kaspaykichikqa. Ñuqam kani uvas planta, qamkunañataqmi kankichik kallmakuna”, nispa (Juan 15:2-5).

Jesusqa qatiqninkunamanmi nirqa hanaq pachaman rispan yanapaqninku chuya espirituta kachamunanmanta. Chaymantam 51 punchaw pasayta apostolninkunawan wakin qatiqninkunapas chuya espirituta chaskispanku uvaspa kallman hinaña kananku karqa. Chay ‘kallmakunaqa’ Jesuswanmi huklla kananku karqa. ¿Imanasqa?

Jesusmi nirqa: “Pipas ñuqawan huklla kaqqa achkatam rurun, ñuqapas paywanmi huklla kani. Ñuqamanta rakisqa kaspaykichikqa manam imatapas ruwayta atiwaqchikchu”, nispa. Qatiqninkunaqa uvaspa kallman hinam achkata rurunanku karqa Jesusta qatipakuspa, Diosmanta willakuspa chaynataq Jesuspa qatiqninkuna kanankupaq hukkunata yanapaspa. Ichaqa, ¿imaynataq kanqaku Jesusmanta rakikuruspa mana ruruqkunaqa? Jesuspa nisqanman hinaqa ‘kuchusqa kallma hinam wischusqa’ kanqaku. Paywan kaqkunamantañataqmi nirqa: “Ñuqawan huklla kaspaykichikqa mañakuychikyá imapas munasqaykichikta, hinaptinmi qamkunapaq ruwasqa kanqa”, nispa (Juan 15:5-7).

Jesusqa iskay kutikamañam apostolninkunata nirqa kamachikuyninkunata kasukunankumanta (Juan 14:15, 21). Ichaqa nirqaraqmi: ‘Ñuqaqa taytaypa kamachikuyninkunata kasukuspaymi taytaypa kuyasqan kani, chaynam qamkunapas kamachisqaykunata kasukuspaykichikqa ñuqapa kuyasqay kankichik’, nispa. Ichaqa manam Jehova Diostawan Jesusllatachu kuyananku karqa, aswanqa kikinkupas kuyanakunankum karqa. Chaymi nirqa: “Kaymi kamachikuyniy: Kuyanakuychikyá imaynam qamkunata kuyasqayman hina. Amistadninkunarayku pipas vidanta quqmi ancha kuyakuyniyuqqa, manam pipas kanchu chayna kuyakuqmanta aswan kuyakuyniyuqqa. Kamachisqaykunata kasukuspaykichikqa amistadniykunam kankichik”, nispa (Juan 15:10-14).

Iskay-kimsa horallamantam Jesusqa ancha kuyakuyninta qawachinan karqa qatiqninkunarayku wañukuspan. Qatiqninkunañataqmi Jesusta qatipakuspanku wañuytapas mana manchakuspa tukuy sunquwan kuyanakunanku karqa. Chayna kuyanakuspam qatiqninkuna kasqankuta riqsichikunanku karqa. Jesusqa nirqañam: “Kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:35).

Jesusqa apostolninkunatam anchata kuyaq, chaymi nirqa: “Qamkunataqa sutichaykichik ‘amistadniykuna’ nispañam, taytaymanta tukuy ima uyarisqaykunata qamkunaman willasqayrayku”,  nispa. Sumaqmi karqa Jesuswan kuyachikusqankuqa chaynataq taytanmanta willasqanta uyarisqankupas. Chaywanpas hinalla kuyachikunankupaqqa ruruq sacha hinam kananku karqa, chayta ruwaptinkuqa Diosmi Jesuspa sutinpi mañakusqankuta qunan karqa (Juan 15:15, 16).

‘Uvaspa kallmankunawan’ tupaq qatiqninkunaqa kuyanakuspankum ima sasachakuytapas atipananku karqa. Paykunamanmi Jesusqa nirqa chiqnisqa kanankumanta, chaywanpas kallpanchaspam nirqa: “Runakuna chiqnisuptikichikqa yachaychikyá qamkunamantapas ñawpaqtaraq ñuqata chiqniwasqankuta. Kay pachapi runakuna hina kaptikichikqa, paykunaqa kuyasunkichikmanmi paykunapa kasqaykichikrayku. Ñuqam kay pachapi runakunamanta akllarqaykichik chaymi kay pachapi runakuna hina mana kasqaykichikrayku paykunaqa chiqnisunkichik”, nispa (Juan 15:18, 19).

Hinaspapas imanasqa chiqnisqa kanankumantam nirqa: ‘Sutiyraykum tukuy kaykunataqa ruwasunkichik, paykunaqa manam riqsinkuchu kachamuwaqniytaqa’, nispa. Jesusta chiqniqkunaqa rikurqakum milagrokuna ruwasqanta, chaywanpas mana iñisqankuraykum huchayuq karqaku. Chaymi Jesus nirqa: “Mana pipapas ruwasqan milagrokunata paykunapa qayllanpi mana ruwaptiyqa mana huchayuqmi kanmanku karqa. Paykunam ichaqa ruwasqaykunata rikurqaku, chiqniwankutaqmi ñuqatapas hinaspa taytaytapas”, nispa. Chayna kanankumantam bibliaqa willakurqaña (Juan 15:21, 24, 25; Salmo 35:19; 69:4).

Jesusqa kaqmantam nirqa chuya espirituta kachamunanmanta. Chay atiywanmi lliw qatiqkuna ruruchkaq hina Jehova Diosmanta willakunankupaq yanapachikunanku karqa (Juan 15:27).