Jesusqa mana huchayuq kasqanraykum ñuqanchik hinaqa imawanpas llumpaytaqa mana hukmanyarqachu nitaq sasachakurqachu. Chaywanpas runakunatam tukuy sunqunwan kuyarqa, chaymi paykunapa allinninkupaq kaqkunata ruwarqa. Llakipayakuq kasqanraykum kallpanchakurqa runakunata yanapananpaq. Chayna kasqanmantam yachachwan 32, 37, 57 hinaspa 99 kaq yachachikuykunapi.

Jesusqa mana hatun tukuq hinaspa llampu sunqum karqa, chaymi mana manchakuspa uchuypas, hatunpas, qaripas, warmipas llapallan runakuna paymanqa asuykuqku. Kuyakuq kasqanraykum paypa qayllanpiqa llapallanku hawka hinaspa kusisqa kaqku. Llampu sunqu kasqanmantam yachachwan 25, 27 hinaspa 95 kaq yachachikuykunapi.

Jesusqa sapa kutillam Diosta mañakurqa sapallanpipas chaynataq hukkunapa qayllanpipas. Payqa imapaqpas mañakuqmi, manam mikunallanpaqchu. Mañakuspanqa taytantam agradecekuq hinaspa hatunchaq, chaymantapas allinta tanteananpaqmi mañakuq. Diosta mañakusqanmantam yachachwan 24, 34, 91, 122 hinaspa 123 kaq yachachikuykunapi.

Jesusqa pisipasqa kaspanpas hukkunata yanapananpaqmi hinalla kallpanchakurqa. Manam kikillanpichu piensarqa. Chayna kasqanta qatipakunanchikpaqmi kallpanchakunanchik. Jesuspa chayna kasqanmantam astawan yachachwan 19, 41 hinaspa 52 kaq yachachikuykunapi.

Jesusqa manam yachachiyllachu yachachirqa pampachanakuymantaqa, paypas qatiqninkunatawan hukkunatam pampacharqa. Chayna kasqanmantam yachachwan 26, 40, 64, 85 hinaspa 131 kaq yachachikuykunapi.

Bibliapi nisqanman hinam Jesusqa yacharqaña yaqa lliw judiokuna chiqninankumanta hinaspa wañuchinankumanta. Chaywanpas Jesusqa anchatam kallpanchakurqa Diospa munayninta ruwananpaq. Ñuqanchikpas Jesus hinam chiqnisqa utaq ñakarichisqa kaspanchikpas Diosta kasukunanchik. Chaymantam yachachwan 16, 72 hinaspa 103 kaq yachachikuykunapi.

Jesusqa mana huchayuq kasqanraykum pi runamantapas aswan yachayniyuq karqa. Manam pipas pay hinaqa karqachu. Chaywanpas mana hatun tukuspanmi runakunata yanaparqa. Chayna kasqanmantam yachachwan 10, 62, 66, 94 hinaspa 116 kaq yachachikuykunapi.

Runakunawan apostolninkunaqa manam Jesustaqa chayllachu qatipakurqaku, manataqmi nisqankunatapas chayllaqa kasukurqakuchu, chayna kaptinkupas Jesusqa manam piñakururqachu. Mana amiruspanmi Diosman imaynata asuykunankupaq yachachirqa. Chayna kasqanmantam yachachwan 74, 98, 118 hinaspa 135 kaq yachachikuykunapi.