Jesusqa Jerusalenman rinan kachkaptinpas hinallaraqchusmi qatiqninkunawan kuska Zaqueopa wasinpi karqaku. Qatiqninkunaqa niqkum ‘Diospa munaychakuyninqa’ chay tiempollapi chayamunanmanta (Lucas 19:11). Paykunaqa manam sumaqtaraqchu yacharqaku, nitaq Jesus wañuchisqa kananmantapas. Chaymi Jesusqa qipa tiempokunapiraq Diospa munaychakuynin chayamunanmanta huk rikchanachiywan willakurqa.

Nirqam: “Riqsisqa ayllumanta kaq huk runam karu llaqtata kutiqlla rirqa kamachiq kananpaq nombramienton chaskiq”, nispa (Lucas 19:12). Chay risqan lawqa karusum karqa. ‘Riqsisqa ayllumanta kaqqa’ Jesusmi, payqa ‘karu llaqtaman’ richkaq hinam hanaq pachaman kutinan karqa. Chaypim kamachiq kananpaq atiyta chaskinan karqa.

Chay ‘riqsisqa ayllumanta runaqa’ manaraq richkaspanmi 10 sirvientekunata qayaspan quykurqa achka-achka qullqita, hinaspam nirqa: “Kutimunaykamayá kaywan negociota ruwachkaychik”, nispa (Lucas 19:13). Chay qullqiqa yaqa kimsa killa masnin chakrapi llamkaypa chaninmi karqa.

Jesuspa qatiqninkunaqa musyakurqakupaschá chay 10 sirvientekunawan tupachisqa kasqankuta, paykunataqa Jesusmi tupachirqaña cosecha huñuq sirvientekunawan (Mateo 9:35-38). Jesusqa manam mikuykuna huñumunankumantachu rimachkarqa, aswanqa Diospa munaychakuyninpi kanankupaq qatiqninkunata huñumunankumantam. Chaypaqqa tiemponkuta, kallpankuta hinaspa kapuqninkutam servichikunanku karqa.

Chaymantapas Jesusqa willakurqam ‘riqsisqa ayllumanta runataqa’ llaqtamasinkuna chiqnisqankumanta. Chaymi chay runakunaqa qipanta comisionta kacharqaku: “Manam munanikuchu kamachiqniyku kanaykitaqa”, nispa nimunankupaq (Lucas 19:14). Jesuspa qatiqninkunaqa yachaqkum Jesusta judiokuna qipanchasqankumanta hinaspa wañuchiy munasqankumanta. Chayqa aswan sutillam karqa kawsarimuspan hanaq pachaman Jesus kutiptin qatiqninkuna yaqa lliw judiokunapa qatikachasqan kaptinku. Judiokunaqa manam munaqkuchu Jesus kamachiqninku kanantaqa (Juan 19:15, 16; Hechos 4:13-18; 5:40).

¿Imatataq sirvientekunaqa qullqi chaskisqankuwan ruwarqaku ‘riqsisqa ayllumanta runa’ kamachiq kananpaq nombramienton chaskinankama? Jesusmi nirqa: ‘Kamachiq kananpaq nombrasqaña kutiramuspam qullqi qusqan serviqninkunata qayachirqa negocio ruwasqankuwan hayka ganasqankuta yachananpaq. Punta kaqmi hamuruspan nirqa: “Señor, quwasqayki qullqikim chunka kutikamaraq mirarun”, nispa. Chaymi payta nirqa: “¡Allintam ruwarunki, qamqa allin sirvientem kanki! Pisilla kaqpipas allin ruwaq kasqaykiraykuyá chunka llaqtakunataña kamachiy”, nispa. Chaymantam huknin sirviente nirqa: “Señor, quwasqayki qullqikim pichqa kutikamaraq mirarun”, nispa. Chaymi paytapas nirqa: “Qampas pichqa llaqtakunatayá kamachiy”’, nispa (Lucas 19:15-19).

Jesuspa qatiqninkunaqa chay sirvientekuna hinam tukuywan yanapachikuspa Dios yupaychay munaqkunata maskananku karqa, chaynata ruwaspankuqa Jesusta kusichispam bendecisqan kananku karqa. Ichaqa manam lliwchu ima ruwasqankupipas hinaspa imayna kasqankupipas chaynallaqa karqaku. Chaywanpas kamachinanpaq atiyta chaskinanpaq kaq Jesusqa qatiqninkunatam runakuna huñuypi kallpanchakusqankuman hina bendecinqa (Mateo 28:19, 20).

Chaymantam Jesusqa willakusqanta tukunanpaq nirqa: “Ichaqa hamurqataqmi hukpas, payqa manam punta kaqkuna hinachu karqa, hinaspam  nirqa: ‘Señor, kayqaya qullqikiqa, latapapi kipuykuspaymi pakarurqani. Piña runa kaptikim ñuqaqa manchakurqayki, qamqa mana churasqaykitam huqarinki, mana tarpusqaykitataqmi cosechankipas’, nispa. Payñataqmi nirqa: ‘¡Yaw mana allin sirviente! Rimasqallaykiwanmi juzgasqayki: Piña runa kasqayta yachachkaspaykiqa hinaspa mana churachkaspay huqarisqayta chaynataq mana tarpuchkaspay cosechasqayta yachachkaspaykiqa, ¿imanasqataq qullqiytaqa bancoman mana churarqankichu, chaynapi chayaramuspay mirayniyuqta chaskikunaypaq?’, nispa. Hinaspanmi chaypi sayaqkunata nirqa: ‘Qullqita qichuspaykichik quychik chunka kutikamaraq qullqi mirachiqman’”, nispa (Lucas 19:20-24).

Chay sirvientemantaqa patronninpaq qullqinta mana mirachisqanraykum qullqita qichururqaku. Chaywanqa yaqachusmi Jesuspa apostolninkunaqa musyakurqaku Diospa munaychakuyninpi kanankupaqqa anchata kallpanchakunankumanta. Paykunaqa Diospa munaychakuyninpi Jesus kamachinantam suyachkarqaku.

Jesuspa nisqankunaqa anchatam qatiqninkunata yanaparqa aswanraq kallpanchakunankupaq. Chaymantam Jesusqa nirqaraq: “Nikichikmi: Kaqniyuqqa astawanraqmi chaskinqa, mana kaqniyuqmi ichaqa kaqnintapas qichuchikunqa”, nispa. Hinaspam nirqa kamachiq kananta mana munaqkunaqa chinkachisqa kanankumanta. Chaynata willakuruspam Jesusqa Jerusalenman hinalla rirqa (Lucas 19:26-28).