Jesusqa qatiqninkunawanmi Galilea lawmanta kutimuspan Jordan mayunta chimparqaku Perea lawman. Chay Perea lawpiqa ñam Jesusqa yachachirqaña divorciakuymanta Jehova Diospa imam nisqanmantaqa (Lucas 16:18). Chaywanpas kaqllam fariseokunaqa pantarachinankupaq Jesusta chaymanta tapurqaku.

Moisespa qillqanpim niq ‘pipas casarasqan warmipi imapas mana allin ruwasqanta tarispaqa’ divorciakuy atinanmanta (Deuteronomio 24:1). Ichaqa sapaq ruwaykunaraykupas wakinqa divorciakuqmi, paykunaqa niqkum yanqakunallamantapas divorciakuy atinankumanta. Chaymi fariseokunaqa Jesusta nirqaku: “¿Imaraykullapas qariqa warminmanta divorciakunmanchu?”, nispa (Mateo 19:3).

Jesusñataqmi mana runakunapa rimasqankuman hinachu yachachirqa, aswanqa casarakuyta Jehova Dios qallarichisqanmanta rimaspanmi nirqa: “¿Manachu leerqankichik Diosqa qallariymantapacha qaritawan warmita unanchasqanmanta? Paymi nirqa: ‘Chayraykum qariqa tayta-mamanta saqispan warminmanña hukllawakunqa hinaptinmi huk aychallaña kanqaku’, nispa. Chaynaqa manam iskayñachu kanku aswanqa huk aychallañam. Hinaptinqa Diospa kuskanchasqantaqa amayá pipas rakichunchu”, nispa (Mateo 19:4-6). Chaynaqa, mana rakinakunankupaqmi Diosqa Adantawan Evataqa kuskancharqa.

Fariseokunañataqmi chayta mana allinpaq hina hapispanku nirqaku: “Chaynaqa, ¿imanasqataq Moisesqa nirqa divorciakuna papelta quykuspan warminmanta pipas divorciakunanpaq?”, nispa (Mateo 19:7). Jesusñataqmi nirqa: “Moisesqa rumi sunqu kasqaykichikraykum saqirqa warmikichikmanta divorciakunaykichikpaq, qallariymantam ichaqa mana chaynachu karqa”, nispa (Mateo 19:8). ‘Qallariyqa’ manam Moisespa tiemponpichu karqa, aswanqa Eden huertapi Jehova Dios qaritawan warmita kuskanchasqan tiempopim.

Hinaspam Jesusqa imaynaña kananmanta nirqa: “Ñuqam nikichik: Mana huchapakuchkaptin pipas warminmanta divorciakuspan hukwan casarakuqqa pierdekuy huchamanmi wichiykun”, nispa (Mateo 19:9). Chaynaqa, pipas divorciakuytaqa atinman warmi kaq utaq qari kaq huchapakuruptillanmi.

Chayta uyarispankum qatiqninkunaqa nirqaku: “Chayna kaptinqa, yanqañachiki casarakuyqa”, nispa (Mateo 19:10). Chaynaqa, pipas casarakuyta munaspanqa manam qunqananchu iskayninku mana rakinakuspa kuskalla kanankumantaqa.

Chaymantam Jesusqa rimarqa sapallankuraq kaqkunamanta. Wakinqa hina unquqña nacesqankuraykum piwanpas puñuyta mana atinkuchu, chaymi mana casarakunkuchu. Wakinñataqmi capasqa kasqankurayku, wakinkuñataq Diospa kaqta astawan ruwanankupaq kikinku tanteakusqankurayku. Chaymi Jesusqa nirqa: “Pipas mana casarakuspa kawsakuy atiqqa, chaynayá kawsakuchun”, nispa (Mateo 19:12).

Chayna yachachichkaptinmi runakunaqa warmachankuta Jesusman pusarqaku. Hinaptinmi qatiqninkunaqa harkakurqaku llumpay ruwayniyuqpaq Jesusta hapispanku. Jesusmi ichaqa qatiqninkunata nirqa: “Hinayá warmachakunaqa ñuqaman hamuchunku, amayá harkaychikchu. Kay warmachakuna hina kaqkunapaqmi Diospa munaychakuyninqa. Chiqaptapunim nikichik: Diospa munaychakuyninta warmacha hina pipas mana chaskiqqa manapunim chaymanqa yaykunqachu”, nispa (Marcos 10:14, 15; Lucas 18:15).

 ¡Mayna sumaqmi Jesuspa chay yachachisqanqa! Diospa bendecisqan kanapaqqa mana hatun tukuqmi kananchik, hinaspapas warmachakuna hina yachachisqa kayta munaqkunam kananchik. Chaymantam Jesusqa warmachakunata marqakuykuspan bendecirqa, hinaspam kuyasqantapas qawachirqa. Chaynatam kunanpas payqa kuyan warmachakuna hina kaqkunataqa hinaspa Diospa munaychakuyninta maskaqkunataqa (Lucas 18:17).