Perea lawmanta Jerusalenman Jesus riptinmi huk mozo kallpaylla rispan Jesuspa ñawpaqninpi qunqurakuykurqa. Chay mozoqa apu autoridadmi karqa, yaqapaschá yupaychana wasipi kamachikuq utaq tukuy rikchaq autoridadkunapa huknin. Paymi Jesusta nirqa: “Allin yachachikuq, ¿imatataq ruwanay wiñay kawsayta chaskinaypaq?”, nispa (Lucas 8:41; 18:18; 24:20).

Jesusñataqmi nirqa: “¿Imanasqataq allin niwanki? Manam pipas allinqa kanchu aswanqa hukllam, payqariki Diosmi”, nispa (Lucas 18:19). Chay mozoqa yaqapaschá judiokunata yachachiqkuna hina nichkarqa “allin yachachikuq” nispanqa. Ichaqa allin yachachiq kaspanpas Jesusqa Jehova Diosllata “allin yachachikuq” ninanpaqmi nirqa.

Hinaspapas Jesusqa nirqataqmi: “Ichaqa kawsakuyta munaspaykiqa kamachikuykunatam tukuy tiempo kasukunayki”, nispa. Chay mozoñataqmi nirqa: “¿Mayqinkunata?”, nispa. Chaymi Jesusqa Diospa chunka kamachikuyninkunamanta rimaspan pichqallamanta nirqa: “Amam pitapas wañuchinkichu, amam hukwanqa pierdekunkichu, amam suwakunkichu, amam llullataqa willakunkichu, tayta-mamaykitam respetanki”, nispa. Hinaspapas aswan allin kamachikuymantaraqmi nirqa: “Runamasikitapas kikikita hinam kuyanki”, nispa (Mateo 19:17-19).

Chay mozoñataqmi Jesusta nirqa: “Tukuy chaykunataqa kasukurqanim, ¿imataraqtaq ruwanay?”, nispa (Mateo 19:20). Payqa piensarqapaschá astawanraq imakunatapas ruwaspan wiñay kawsayta haypananmanta. Chayta qawaspam Jesusqa musyarurqa chay mozoqa Diosta kasukuy munasqanta, chaymi kuyapayaykurqa (Marcos 10:21). Ichaqa chay mozom harkachikuchkarqa wiñay kawsayta haypananpaq.

Payqa llumpaytam kuyarqa qullqinta chaynataq tukuy kapuqninkunatapas, chaymi Jesus nirqa: “Chaywanpas kaytaraqmi ruwanayki: Rispaykiyá tukuy imaykita rantikamuspayki wakchakunaman quykamuy, chaynapim hanaq pachapi kapuqnikikuna kanqa, hinaspayá qatiqniyña kay”,  nispa. Chay mozoqa atinmanmi karqa qullqinta wakchakunaman quykarispan Jesuspa qatiqnin kaytaqa, ichaqa manam chaytachu ruwarqa. Chaymi Jesus qawachkaptin llakisqallaña pasakurqa. Payqa kapuqninkunata llumpayta kuyaspam aswan allin kaqmantaqa mana musyakurqachu (Marcos 10:21, 22). Hinaspanmi Jesusqa nirqaraq: “¡Mayna sasachá kanqa qullqisapa runakunapa Diospa munaychakuyninman yaykuyninkuqa!”, nispa (Lucas 18:24).

Qatiqninkunañataqmi Jesuspa chayna nisqankunamanta ima niytapas mana atirqakuchu. Chaymantam Jesus nirqa: “Diospa munaychakuyninman apu runapa yaykunanmantaqa camelloraqchá sirana agujapa rinrinta yaykurunman”, nispa. Qatiqninkunañataqmi tapurqaku: “Hinaptinqa, ¿pitaqsi salvakuyta atinman?”, nispa. Jesusñataqmi paykunata qawarispan nirqa: “Runakunapaq mana atinan kaqkunaqa Diospaqqa atinallanmi”, nispa (Lucas 18:25-27).

Pedroñataqmi nirqa: “Ñuqaykuqa tukuy imata saqiruspam qamta qatichkaykiku, ¿imataq ñuqaykupaqqa kanqa?”, nispa. Chaywanqa nichkarqam paywan qatiqmasinkunaqa chay apu mozo hina mana kasqankuta. Jesusñataqmi bendecisqa kanankumanta nirqa: “Tukuy imapas musuqyanan tiempopi runapa churin achkirichkaq kamachinanpaq tiyananpi tiyaykuptinmi, qamkunapas tiyaykunkichik chunka iskayniyuq tiyanakunapi, hinaspam juzgankichik chunka iskayniyuq Israel ayllukunata”, nispa (Mateo 19:27, 28).

Jesusqa hamuq punchawkunapi bendecisqa kanankumantam rimachkarqa. Kay allpa pacha huertayachisqa kaptinmi Pedrowan qatiqmasinkunaqa Jesuswan kuska hanaq pachamanta kamachimunqaku. Chayna bendecisqa kanankupaqqa anchatam kallpanchakunanku karqa.

Ichaqa manam hamuq punchawpiraqchu bendecisqaqa kananku karqa. Paykunaqa Jesuspa nisqanman hinam ña bendecisqaña karqaku. Jesusmi nirqa: “Wasinta, warminta, wawqi-paninkunata, tayta-mamanta hinaspa churinkunata Diospa munaychakuyninrayku pipas saqiqqa, kay tiempopim aswan achkataraq chaskinqa, hinaspa hamuq tiempopiñataq wiñay kawsayta”, nispa (Lucas 18:29, 30).

Chaymi Jesuspa qatiqninkunaqa mayman rispankupas ayllunkumantapas astawanqa iñiqmasinkuwan kuyanakuqku. Chay apu mozom ichaqa tukuy chaykunata hinaspa Jesuswan kuska kamachiytapas mana hayparqachu.

Jesusmi nirqa: “Achkallaña puntapi kaqkunam qipapi kanqaku, qipapi kaqkunañataqmi puntapi kanqaku”, nispa (Mateo 19:30). ¿Ima niytataq munachkarqa?

Chay apu mozom kamachiq kasqanrayku ‘puntapi karqa’. Diospa kamachisqanta kasukusqanraykum payqa atinman karqa Jesuspa qatiqnin kayta. Ichaqa qullqitawan kapuqninkunatam astawan kuyarqa. Mana ancha kapuqniyuq runakunañataqmi musyakurqaku Jesuspa yachachisqanqa chiqap kasqanta hinaspa wiñay kawsayman pusaqninku kasqanta. Paykunaqa ‘qipapim karqaku’, ichaqa Jesuswan kamachiqña kanankupaq akllasqa kaspankum ‘puntapiña karqaku’.