Jesusqa fariseo runapa wasinpim makinpas chakinpas punkipasqa runata hampirurqa. Chaypim mikunankupaq qayachisqa wakin runakunatapas rikurqa, chay runakunaqa riqsisqa runakunapaq tiyananku lawtaraqmi akllakuqku. Chaymi mana hatun tukuq kaymanta Jesusqa yachachirqa.

Nirqam: ‘Casarakuy convidoman pipas invitasuptikiqa, amayá riqsisqa runakunapa tiyananpiqa tiyaruychu. Ichapas invitasuqnikiqa qanmanta aswan riqsisqa runataraq convidomanqa invitarqa, hinaptinmi convidoman invitasuqniki hamuruspan nisunkiman: “Paymi kaypiqa tiyanqa”, nispa. Hinaptinmi qamñataq pinqakuywan qipallapiña tiyaq riwaq’, nispa (Lucas 14:8, 9).

Nirqataqmi: “Invitasqa kaspaykiqa qipallapiyá tiyakuy, chaynapi invitasuqniki hamuruspan, ‘taytáy ñawpaqpi qamqa tiyakamuy’ nisunaykipaq. Hinaptinqa llapallan invitasqa kaqkunapa qayllanpim allin kanki”, nispa. Ichaqa manam chayllatachu nirqa, nirqataqmi imanasqa chayta mana ruwanankumantapas. Nirqam: “Pipas hatunchakuqqa humillasqam kanqa, pipas humillakuqñataqmi hatunchasqa kanqa”, nispa (Lucas 14:10, 11). Chaynatam Jesusqa uyariqninkunata kallpancharqa mana hatun tukuq kanankupaq.

Chaymantam Jesusqa wasinman qayaykuqnin fariseotapas yachachirqa Diospa sunqunta imata ruwaspan kusichinanmanta. Nirqam: “Mikunanpaq utaq cenananpaq pitapas qayaspaykiqa amayá amistadnikikunatawan wawqillaykikunatachu qayayqa, nitaq aylluykikunatawan apu vecinollaykikunatachu. Ichapas paykunaqa haykapipas kutichisunkiman hinaspa wasinman mikunaykipaq qayaykusunkiman. Mikuyman qayaspaykiqa qayayá: Wakchakunata, wistukunata, qiwi makiyuqkunata hinaspa ñawsakunata, hinaspaqa kusisqam kanki, paykunapaqariki manam imanpas kanchu kutichipusunaykipaq”, nispa (Lucas 14:12-14).

Ichaqa allinllam ayllunchikta, vecinonchikta utaq piyninchiktapas mikuq qayaykuyqa. Chaywanpas Jesusqa rimachkarqa wakchakunata, wistukunata utaq ñawsakunata mikunankupaq qayaykuspaqa Diospa aswan bendecisqan kanamantam. Chaymi fariseo runata nirqa: “Pagoykitaqa chaskinki allin runakuna kawsarimuptinmi”, nispa. Chayta uyariruspanmi chaypi kaq huk runapas uyarisqan allin rikchakuptin Jesusta nirqa: “Kusisqamá pipas Diospa munaychakuyninpi tantata mikuqqa”, nispa (Lucas 14:15). Chay runapaqqa Diospa munaychakuyninpi kaymi ancha allin karqa, wakin runakunapaqmi ichaqa mana. Chaymi Jesusqa chaymantaña yachachirqa.

Nirqam: “Huk runam tukuy imata yanuchispan achka runakunata nirqa wasinman mikuq rinankupaq. Mikuy hora chayaramuptinmi, chay runaqa sirviententa kamachirqa, ‘hamuychik tukuy imam listoña kachkan’ nispa invitasqakunata nimunanpaq. Hinaptinmi mana rinankupaq llapallanku nirqaku pampachaykunanpaq. Punta kaqmi nirqa: ‘Pampachaykullaway, chakratam rantiruni chaymi qawaq rinay kachkan’, nispa. Hukninpas nirqam: ‘Pampachaykullaway, pichqa yunda torotam rantiruni chaymi qawamunay kachkan’, nispa. Hukninñataqmi nirqa: ‘Chayllaraqmi casarakuruni chaymi riyta mana atiymanchu’”, nispa (Lucas 14:16-20).

Chaynata nispallam chay runakunaqa mikuq riyta mana munarqakuchu. Chakrata rantiruq runawan uywakunata rantiruq runaqa manaraq rantichkaspankum imayna kasqantaqa qawarqakuña. Huknin runapas ñam casarakururqaña, manam chayllaraq casarakunanpaqchu allichakuchkarqa. Chayraykum paypas mikuq riytaqa  atinman karqa. Mikuyman qayaq runañataqmi mana rinankumanta uyariruspan piñakurqa.

Hinaspam sirviententa nirqa: “Hatun callekunaman hinaspa kichki callekunaman chaylla rispayki pusamuy: Wakchakunata, suchukunata, qiwi makiyuqkunata, ñawsakunata hinaspa wistukunata”, nispa. Chaywanpas wasinman mana huntaptinmi nirqaraq: “Chaynaqa ñankunaman hinaspa chakrakunaman rispaykiyá imaynapas runakunata pusamuypuni wasiy hunta kananpaq. Qamkunatam nikichik: Manam ñawpaq qayasqay runakunamantaqa mayqinpas mikuyniytaqa mallinqachu”, nispa (Lucas 14:21-24).

Chaynata Jesuspa willakusqanmi qawachirqa Jehova Diospa imam munasqanta, paymi churin Jesuswan willachirqa hanaq pachapi munaychakuyninpi akllasqa runakuna kanankumanta. Chaypiqa judiokunam kananku karqa, aswanraqmi religionkunapi punta apaqkunaqa. Ichaqa Jesustam yaqa lliw qipancharurqaku. Chaymi Jesusqa nirqa chaymanta qipamanqa ñakarichisqa judiokunawan judio religionman yaykukuqkunaña chaypi kanankumanta. Chaymantapas nirqam qipamanqa huk law nacionkunamanta runakunapas chaypi kanankumanta (Hechos 10:28-48).

Chaykunamanta Jesuspa yachachisqan allin kasqantam qawachirqa “kusisqamá pipas Diospa munaychakuyninpi tantata mikuqqa” nispa huk kaqnin runapa nisqan.