Chinkasqa churimanta Jesuspa willakusqanwanqa autoridadkunapaq qullqi mañaypi llamkaqkunaqa, escribakunaqa hinaspa fariseokunaqa yachanankuñam karqa Diosqa huchankumanta wanakuqkunata pampachasqanmanta (Lucas 15:1-7, 11). Chaymantam Jesusqa qatiqninkunaman willakurqa apu runapa wasinmanta nanachikuq mana allin sirvientemanta.

Chay sirvientetam tumpasqaku patronninpa imankunatapas mana allin waqaychasqanmanta. Chaysi patronqa chay sirvienteta qarqunanmanta willaykusqa. Sirvienteñataqsi sunqunpi nikusqa: “¿Imapitaq kunanqa rikukuni? Pinqakunim limosna mañakuytaqa, manañam kallpaypas kanchu chakrapi llamkanaypaqpas”, nispa. Chaymantas imam ruwananmanta tanteakuspan nikusqa: ‘Wasinmanta nanachikuq kasqaymanta patronniy qarquruwaptinqa, pillapas wasinpi chaskiykuwananpaqyá kayta ruwasaq’, nispa. Hinaspas patronninwan manupi kaqkunata qayamuspan hukninta nisqa: “¿Haykatam patronniyta debekunki?”, nispa (Lucas 16:3-5).

Payñataqsi nisqa: ‘Aceitunas sachamantam pachak barril aceite debekullani’, nispa. Sapa barrilsi yaqa 22 litro kasqa. Yaqachusmi chay runaqa aceitunas tarpuq kasqa utaq aceite rantikuq kasqa. Chaysi sirvienteñataq nisqa: “Kayqaya contrato ruwasqayki papelniki, tiyaykuspa apurawman pichqa chunkallataña qillqaykuy”, nispa (Lucas 16:6).

Chaymantas huknintañataq nisqa: “Qamqa, ¿haykatataq debekunki?”, nispa. Payñataqsi nisqa: “Pachak saco trigom debekullani”, nispa. Chaysi sirvienteñataq nisqa: “Kayqaya contrato ruwasqayki papelniki, pusaq chunkallatañayá qillqaykuy”, nispa. Chaynatas manunkutaqa manaña llumpaytañachu mañasqa (Lucas 16:7).

Chay sirvienteqa patronninpa wasinpi nanachikuqraq kasqanraykus makinpiraq kasqa asllataña mañananpaqqa. Chaynata ruwaspansi chay runakunawan kuyachikusqa, chaynapi patronnin qarquptin paykunapa yanapasqan kananpaq.

Chay sirvientepa patronninñataqsi sirvientepa imam ruwasqantaqa allinpaq hapisqa debeqnin runakunamanta imam kaqta manaña mañaptinpas. Chaysi chay sirvientepaq kusikusqa “mana allin runa kachkaspanpas yachaywan ruwasqanmanta”. Chaymantam Jesusqa nirqa: “Kay pachapi runakunaqa sacrellañam kanku kay tiempopi runamasinwan imatapas ruwaspanku achkipi kaq runakunapa churinkunamantaqa”, nispa (Lucas 16:8).

Jesusqa manam ima llamkaypipas sacrellawanña imapas ruwaytachu nitaq chay sirvientepa ruwasqantachu allinpaqqa hapichkarqa. Aswanqa ima niy munasqanmantam qatiqninkunaman nirqaraq: “Runakunapa kapuqninkunata servichikuspayá amistadta ruwaychik. Chaykuna  tukuruptin, mana haykapipas chinkaq wasipi chaskisqa kanaykichikpaq”, nispa (Lucas 16:9). Chayqa yachachiwanchik puntamantaraq allinta yuyaymanaspa imatapas yachaywan ruwaytam. Diosta yupaychaqkunaqa utaq ‘achkipi kaq runakunapa churinkunaqa’, hamuq punchawpi imam chaskinanchikmanta mana qunqaspam allin yachaywan imapas kapuqninchiktaqa servichikunanchik.

Jehova Dioswan churin Jesusllam hanaq pachapipas utaq kay pachapipas wiñaypaq kawsaqkunataqa chaskinku. Chayraykum anchata kallpanchakunanchik paykunawan ‘amistad kanapaq’ utaq kuyachikunapaq, chaytaqa ruwananchik Diospa munayninta ruwanapaq kapuqninchikta servichikuspam. Chayta ruwaspallam quripas, qullqipas utaq imapas tukuruptinqa hamuq punchawpi imam chaskinanchikta chaskisun.

Chaymantam Jesusqa nirqa kapuqninwan allin ruwaq runaqa Diospa kaqkunatapas aswan allintaraq ruwananmanta. Chaymi nirqaraq: “Kay pachapa kapuqninkunata servichikuspa mana allin ruwaq kaptikichikqa, ¿pitaq qusunkichikman allin kaqtaqa [utaq Diospa llaqtanpi imapas ruwaykunataqa]?”, nispa (Lucas 16:11).

Tukuy chaykunawanmi Jesusqa qatiqninkunaman yachachichkarqa Diospa bendecisqan kanankupaqqa anchata kallpanchakunankumanta. Manam pipas atinmanchu Diosta servichkaspa qullqitawan maskaytaqa. Chaymi Jesusqa tukunanpaq nirqa: “Manam pi sirvientepas iskay patrontaqa servinmanchu, hukninta chiqnispanchá huknintañataq kuyanqa, utaq hukninman ratakuruspanchá huknintañataq chiqninqa. Qamkunaqa manam serviwaqchikchu Diostawan qullqitaqa”, nispa (Lucas 16:9, 13).