Jesusqa hinallam Judea lawpi runakunamanqa yachachirqa, hinaspam ovejakunamantawan kanchakunamantapas rikchanachispan yachachirqa. Chaywanqa ichapas runakunaqa ñawpaq abuelonku Davidpa nisqanta yuyarirqaku. Davidmi nirqa: ‘Jehova Dioslláy, qamllam kanki ñuqallaypa michiqnillayqa, manam imapas pisiwanqañachu. Sumaqllaña ikllirimuq pastokunapim ñuqallaytaqa samaykachiwanki’, nispa (Salmo 23:1, 2). Hinaspapas Davidqa nirqam: ‘Jehova Diospa qayllanpiyá qunqurakusunchik. Paymi ñuqanchiktaqa unanchawarqanchik. Ñuqanchikpa Diosninchikmi payqa. Michinan ovejankunam kanchik ñuqanchikqa’, nispa (Salmo 95:6, 7). Chaymi qawachin Israel runakunaqa Diospa ovejankuna kasqankuwan tupachisqa kasqankuta.

Jehova Diosqa kamachikuyninkunata quspanmi Israel runakunawan contratota ruwarqa, chayraykum kanchapi hina karqaku lliw mirayninkunapas. Chay kamachikuykunaqa pirqa hinam Israel runakunata harkarqa mana allin ruwaykunamanta. Ichaqa wakin Israel runakunam llaqtamasinkuta llumpayta ñakarichiqku. Chaymi Jesus nirqa: “Pipas ovejapa kanchanman punkunta mana yaykuspan huk lawninta yaykuqqa suwam hinaspa imapas qichuqmi. Punkunta yaykuqmi ichaqa ovejakuna michiq”, nispa (Juan 10:1, 2).

Chaynata Jesus niptinqa runakunaqa ichapas Cristo tukuq runakunata yuyarirqaku. Chay runakunaqa suwakuna hinam hinaspa qichukuqkuna hinam karqaku. Paykunataqa manam pipas qatinankuchu karqa, aswanqa michiqllatam.

Chay michiqmanta rimaspanmi Jesus nirqa: “Paytaqa kanchapa punkun cuidaqmi kichaykun, ovejakunapas econtam uyarin, hinaptinmi michiqqa ovejankunata sapakamata sutinmanta qayaspan hawaman hurqun. Llapallan ovejankunata hurquruspanmi payqa ñawpaqninta rin, hinaptinmi ovejakunaqa qatinku econta riqsisqankurayku. Mana riqsisqankutam ichaqa manapuni qatinqakuchu, aswanqa econta mana riqsisqankuraykum paykunamantaqa ayqikunqaku”, nispa (Juan 10:3-5).

Kanchapa punkunpi cuidaq runa hinam bautizaq Juanqa karqa. ¿Imaynanpi? Israel runakunaqa michiqninku Jesusllata qatinankupaq riqsichisqanraykum. Chaymi wakinqa Galilea lawmanta hinaspa Judea lawmanta econta uyarichkaq hina qatikurqaku. Ichaqa manam lliwchu musyarqaku Jesuspa ima niy munasqantaqa (Juan 10:6). Chayraykupaschá tapukurqaku: “¿Maymantaq pusanqa?” hinaspa “¿Imaynataq qatispaqa kanqaku?”, nispa.

Jesusqa nirqaraqmi: “Chiqaptapunim nikichik: Ñuqam kani ovejakunapa yaykunan punku. Ñuqapa rantiypi lliw hamuqkunaqa karqa suwakunam hinaspa imapas qichuqkunam, chayraykum ovejakunaqa mana paykunataqa uyarirqakuchu. Ñuqam punkuqa kani, oveja kanchaman yaykunanpaq pipas ñuqaman hamuqqa salvasqam kanqa, payqa kanchamanmi yaykunqapas hinaspa lluqsimunqapas chaynataq pastokunatapas tarinqa”, nispa (Juan 10:7-9).

Chaynata Jesus nispanqa manam Israel runakunawan Diospa ruwasqan contratomantachu rimachkarqa, aswanqa chaynapi kasqankumanta huk kanchamanña ovejankunata pusaspan ‘punku’ hina kasqanmantam.

Jesusqa imakuna ruwayniyuq kasqanmantam hinalla nirqa: “Ñuqam ichaqa hamurqani wiñay kawsayniyuq kanankupaq. Ñuqaqa allin michiqmi kani, allin michiqqa ovejakunaraykum vidantapas qun”, nispa (Juan 10:10, 11). Jesusqa ñawpaqtam qatiqninkunata kallpanchaspan nirqaña: “Ama manchakuychikchu aslla kaq ovejakuna, hanaq pachapi taytaykichikmi tantearun munaychakuyninta qusunaykichikpaq”, nispa (Lucas 12:32). Jesusqa ‘aslla kaq ovejakunatam’ musuq kanchamanña pusanan karqa, chaynapi “wiñay kawsayniyuq kanankupaq”. Chayqa, ¡mayna sumaqmi!

Chaywanpas Jesusqa nirqataqmi: “Kachkantaqmi sapaq ovejaykunapas kay kanchamanta mana kaqkuna, chay ovejakunatapas kancha ukumanmi pusamunay, hinaptinmi ecoyta uyarinqaku, hinaspam kanqaku huk kanchallaña chaynataq huk michiqniyuqllaña”, nispa (Juan 10:16). Chay ‘sapaq ovejakunaqa’ ‘aslla kaq ovejakunamanta’ sapaq kanchayuqmi kanku, ichaqa ‘aslla kaq ovejakunam’ hanaq pachamanqa rinqaku. Chaywanpas iskayninkum Jesuspa ruwasqanwanqa bendecisqa kanqaku. Jesusñataqmi kikinmanta nirqa: “Hanaq pacha taytaqa kuyawanmi vidayta yapamanta chaskinaypaq qusqayrayku”, nispa (Juan 10:17).

Chaykunamanta Jesus rimaptinmi wakin runakunaqa nirqaku: “Kayqa locom hinaspapas demonioyuqmi”, nispa. Wakinmi ichaqa hawkalla uyarispanku michiqnin Jesusta qatikuyta munarqaku. Niqkum: “Demonioyuq runaqa manam chaynataqa rimanmanchu. Manamá demonioqa ñawsakunapa ñawintaqa qawarichiyta atinmanchu”, nispa (Juan 10:20, 21). Chaywanqa nacesqanmantapacha ñawsa runata Jesus hampisqanmantachá rimachkarqaku.