Jesusqa manam Diosta mañakunallamantachu kaqmantaqa yachachirqa, aswanqa achka yachachikuykunamantawanmi. Jesustaqa Galilea lawllapiraqmi nirqaku: “Satanaspa atiyninwanmi demoniokunataqa qarqun”, nispanku. Ichaqa hina chaynallatam Judea lawpi kaptinpas nirqaku.

Chay kutipim Jesusqa huk runamanta mana rimachiqnin demoniota qarqururqa. Hinaptinmi wakin runakunaqa kusisqallaña karqaku, wakinmi ichaqa mana allinta rimaspa nirqaku: “Payqa demoniokunataqa qarqun demoniokunata kamachiq Beelzebubpa yanapasqanmi”, nispa (Lucas 11:15). Wakinñataqmi Diospa kachamusqan kasqanta qawachikunanpaq munarqaku hanaq pachamanta kaq milagrota ruwananta.

Jesusñataqmi pantarachiyta munasqankuta musyaspan Galilea lawpi runakunaman hina nirqa ima gobiernopas rakinasqa kaspanqa mana takyananmanta. Hinaspam nirqa: “Chaynaqa, sichum satanas kikinpa contranpi rakinasqa kaspanqa, ¿imaynataq gobiernonqa takyanman?”, nispa. Chaymantapas nirqaraqmi: “Diospa atiyninwan demoniokunata ñuqa qarquptiyqa chiqaptapunim Diospa munaychakuyninqa hayparamusunkichikña”, nispa (Lucas 11:18-20).

Diospa atiyninwan Jesuspa ruwasqanqa ichapas runakunataqa yuyarichirqa ñawpaq tiempopi Israel runakunata. Chay tiempopim Diospa yanapayninwan achkallaña chuspikunata Moises rikurirachiptin faraonpa runankuna nirqaku: “Diosmantam kayqa”, nispa. Chaymantapas Moisespa chaskisqan chunka kamachikuyqa “Diospa dedonwan” utaq Diospa atiyninwanmi qillqasqa karqa (Exodo 8:19; 31:18). Chaymi Jesuspas Diospa atiyninwan demoniokunataqa qarqurqa hinaspa unquqkunatapas hampirqa. Chaynaqa, judiokunaqa manam musyakurqakuchu Diospa akllasqan kamachiqqa qayllankupi Diospa atiyninwan imakunapas ruwasqantaqa. Chayraykum Jesusqa nirqa: ‘Diospa munaychakuyninmi hayparamusunkichikña’, nispa.

Demoniokunata Jesus qarquspanqa satanasmantapas aswan atiyniyuq kasqantam qawachirqa. Chaymantapas Jesusqa kaqllam rimarqa manaña demonioyuq runamanta. Chay runaqa ukunmanta demonio lluqsiruptinpas allin kaqkunata mana ruwaptinmi, kaqmanta chay lluqsiq demonioqa qanchis aswan mana allin demoniokunawanña payman kutiykurqa. Chaymi aswan mana allinraq runaqa rikurirurqa (Mateo 12:22, 25-29, 43-45). Chaynam judio runakunapas kachkarqaku.

Chaynata Jesus rimachkaptinmi runakuna ukumanta huk warmi kallpawan nimurqa: “¡Mayna kusisqam wachakusuqniki hinaspa ñuñusuqniki warmiqa!”, nispa. Chay tiempopi warmikunaqa anchatam munaqku wawankuqa Diosmanta willakuqkuna kanankuta, astawanraqmi munaqku Diospa kachamusqan kamachiqqa wawanku kananta. Chaychusmi chay warmiqa nirqa Jesuspa mamanqa llumpay kusisqa kasqanmanta. Jesusmi ichaqa mana haykapipas nirqachu maman Mariata hatunchanankumantaqa. Aswanqa chay warmitam nirqa: “Manam chaynachu. ¡Kusisqaqa kanku Diospa palabranta uyarispa kasukuqkunam!”, nispa (Lucas 11:27, 28). Chaynatam Jesusqa qawachirqa Diospa munayninta ruwaspalla aswan kusisqa kawsakunamanta.

Chaymantam Jesusqa Galileapi hina runakunata qaqcharqa hanaq pachamanta milagrota mañakusqankurayku. Hinaspam nirqa mana imatapas qawachinanmanta, aswanqa Jonaspa kaqllatam. Jonasqa kimsa punchawmi hatun challwapa wiksanpi karqa, hinaspapas Diosmantam willakurqa, chaymi Ninive llaqtayuqkunaqa huchankumanta wanakurqaku. Chaymantam  Jesusqa nirqa: “Ichaqa Jonasmantapas aswan respetanaraqmi kaypiqa kachkan”, nispa (Lucas 11:29-32). Jesusqa Salomonmantapas aswan riqsisqataqmi karqa, Salomonmanqa Saba nacionniyuq kamachiq warmipas yachayninta uyariqmi rirqa.

Jesusqa nirqaraqmi: “Pipas mecherota ratarachispanqa manam pakanchu nitaq canasta ukumanchu churan, aswanqa alto patachamanmi”, nispa (Lucas 11:33). Chaywanqa chay runakunapaq yanqaña imatapas ruway kasqantam qawachirqa, chayqa karqa mecherotapas canastawan pakcharuy hinam. Paykunaqa tutayaypi hina kaspankum mana musyaqkuchu imarayku Jesuspa imapas ruwasqantaqa (Lucas 11:34).

Diospa atiyninwan Jesus huk runamanta mana rimachiq demoniota qarquruptinpas runakunaqa manam Diostaqa hatuncharqakuchu, nitaqmi hukkunamanpas willakurqakuchu. Chaymi Jesusqa rimapakuq runakunata nirqa: “Cuidakuyyá, yanqañataq qampi kaq achki tutayay kanman. Arí, sichum enteron cuerpoyki kancharinqa mana imaniraqllapas tutayayniyuq hinaptinqa cuerpoykim kancharinqa imaynam achkipas kanchasuchkankiman hina”, nispa (Lucas 11:35, 36).