Fariseokunaqa ñawsa runata Jesus hampisqanta yanqapaq hapispam tayta-mamantaña qayachirqaku. Tayta-mamanñataqmi yupaychana wasimanta qarqurunankuta manchakuqku (Juan 9:22). Qarqurachikuspaqa manañam llaqtamasinkuwanqa imapipas hukllawakunankuchu karqa.

Chay fariseokunaqa tayta-mamantam tapurqaku: “¿Kay runapa tayta-mamanchu kankichik? ¿Paychu ‘nacesqanmantapacham ñawsa’ nisqaykichik? ¿Imaynamá kunanqa qawakuchkan?”, nispa. Paykunañataqmi nirqaku: “Arí ñuqaykum paypa tayta-maman kaniku, yachanikum ñawsa nacesqantapas, ichaqa manam yachanikuchu imaynata qawarikurusqantaqa nitaq pi qawarirachisqantapas”, nispa. Warmankuqa willarqañachá, chaywanpas yuyaywanmi fariseokunata nirqaku: “Tapuychikyá, payqariki yuyayniyuqñam, kikinmi willakunan”, nispa (Juan 9:19-21).

Chaymi kaqmanta qawarikuruq runata qayachirqaku, hinaspam manchachinankupaq nirqaku: ‘Ñuqaykuqa yachanikum chay runaqa huchayuq kasqanta’, nispa. Chay runañataqmi Jesusmanta chaynata rimaptinku nirqa: “Huchayuq kasqantaqa manam yachanichu, ichaqa yachanim ñawpaqta ñawsa kachkaspaypas kunan qawakusqayta”, nispa (Juan 9:24, 25).

Chaywanpas fariseokunaqa hinallaraq tapupayaspam nirqaku: “¿Imatataq ruwasurqanki? ¿Imaynatataq ñawikita qawarirachirqa?”, nispa. Chay runañataqmi mana manchakuspan nirqa: ‘Nirqaykichikñam ichaqa manam uyarirqankichikchu, ¿imanasqataq munankichik yapatawan ninaytaqa? ¿Ichachu qatiqnin kayta munachkankichik?’, nispa. Fariseokunañataqmi piñarikuspa nirqaku: “Qanmi chay runapa qatiqninqa kanki, ñuqaykuqa Moisespa qatiqninmi kaniku. Ñuqaykuqa yachanikum Moisesta Dios rimapayasqanta, chay runamantam ichaqa mana yachanikuchu maymanta kasqantapas”, nispa (Juan 9:26-29).

Chaymi hatunmantaraq qawarikuspa runaqa nirqa: “Mamallay-mama, ¿imaynamá manaqa yachankichikchu maymanta chay runa kasqantaqa? Chaywanpas payqa ñawiytam kichaykuwan”, nispa. Hinaspapas Diospa uyarisqan runakunamanta rimaspanmi nirqaraq: “Yachanchikmi huchasapakunata Dios mana uyarisqanta, ichaqa Diosta manchakuspan pipas munayninta ruwaptinqa uyarinmi. Ñawpa tiempomantaraqmi mana haykapipas uyarikurqachu nacesqanmantapacha ñawsa runapa ñawinta pipas kichaykusqanmantaqa”, nispa. Hinaspam nirqa: “Chay runa Diosmanta mana kaspanqa, manachá ñawiytaqa kichaykuwanmanchu karqa”, nispa (Juan 9:30-33).

Chaymi fariseokunaqa manaña ima niytapas atispanku kamispaña nirqaku: “Qamqa pasaypaq huchasapam nacerqanki, ¿hinachkaspachu ñuqaykutaraq yachachiwachkankiku?”, nispa (Juan 9:34). Hinaspam qarqururqaku.

Tukuy chaykunata yacharuspanmi Jesusqa chay limosnakuq runawan tuparuspan nirqa: “Qamqa, ¿iñinkichu runapa churinpi?”, nispa. Chay runañataqmi nirqa: “¿Pitaq runapa churinqa señor, paypi iñikunaypaq?”, nispa. Jesusñataqmi mana iskayrayananpaq nirqa: “Paytaqa rikurqankiñam, kay rimapayasuqnikim payqa”, nispa (Juan 9:35-37).

Chay runañataqmi nirqa: “Paypiqa iñikunim señor”, nispa. Hinaspam Jesusmantaqa mana iskayrayaspan kusikuyllawanña qayllanpi qunqurakurqa. Jesusñataqmi mana qunqananpaq hina nirqa: “Runakunamanqa hamurqani runakuna juzgasqa kanankupaqmi chaynapi mana qawakuqkuna qawakunankupaq, qawakuqkunañataq ñawsayarunankupaq”, nispa (Juan 9:38, 39).

Fariseokunaqa qawakuqkum, chaywanpas ñawsa hinam karqaku Diosmanta mana imam  kaqta runakunaman yachachisqankurayku. Hinaspam hatun tukuspa Jesusta nirqaku: “Ñuqaykupas manamá ñawsachu kachkaniku ¿aw?”, nispa. Jesusñataqmi nirqa: “Ñawsa kaspaykichikqa mana huchayuqchá kawaqchik, ichaqa qamkunam ninkichik ‘qawakunikum’ nispa. Chaymi huchaykichikqa hinalla kachkan”, nispa (Juan 9:40, 41). Fariseokunaqa Diospa kamachikuyninkunata sumaqta yachaspapas hinaspa llaqtapi punta apaqkuna kaspapas Diospa kachamusqan Jesustam qipancharqaku, chayqa nisyu hucham karqa.