Joseywan Mariaqa manañam Nazaret llaqtamanqa kutirqakuchu, aswanqa Belen llaqtapiñam qipakurqaku. Chaypim pusaq punchawniyuq Jesus kaptin qari kayninta señalachirqaku Diospa kamachisqanman hina (Levitico 12:2, 3). Chay punchawtaqmi costumbrenkuman hina sutintapas churarqaku. Chaymi angelpa willakusqanman hina Jesuswan suticharqaku.

40 punchawniyuqña Jesus kachkaptinñataqmi Jerusalenpi Diospa wasinman aparqaku, chayqa hichpallankupim karqa. Diospa kamachisqanman hinaqa qari wawata pipas wachakuspanqa 40 punchaw pasaytam Diospa wasinman rinan karqa, hinaspam chuyanchasqa kananpaq carnerotawan huk palomata Diospaq kañapunan karqa (Levitico 12:4-8).

Ichaqa Diosqa nirqataqmi carnerotawan huk palomata mana apayta atispankuqa iskay palomallatapas apanankumanta. Chaymi Mariaqa iskay palomakunata aparqa, chayqa Joseywan Maria wakcha kasqankutam qawachirqa.

Diospa wasinpiqa Joseyman hinaspa Mariamanmi yuyaqña kaq Simeon asuykurqa. Payqa Diospa nisqanman hinam manaraq wañukuchkaspan Diospa akllasqan churinta rikunan karqa. Chaymi Simeonqa chuya espiritu pusaptin Diospa wasinman rirqa, hinaspanmi Joseywan hinaspa Mariawan tupaykuspan wawata marqakuykurqa.

Hinaspanmi Simeonqa Jehova Diosta hatunchaspan nirqa: “Llapallan kamachiq señor, niwasqaykiman hinam kunanqa wawata rikuykuniña hinaptinqa kusisqañayá wañukusaq, salvacion apamuqtam ñawiykuna rikuykun, kunanqa llapallan llaqtapi runakunapa rikunanñam rikurirun, payqariki tutayaypi kaq nacionkuna rikukunankupaq achkiqmi, llaqtayki Israel runakunata kanchariqmi”, nispa (Lucas 2:29-32).

Chaynata Simeon niptinmi Joseywan Mariaqa qawanakurqaku. Payñataqmi Mariata nirqa: “[Wawaykiqa] churasqam kachkan Israel llaqtapi achka runakunata urmachinanpaq hinaspa sayarichinanpaq”, nispa. Hinaspapas nirqam wawanmanta Maria qipakunata llumpayta ñakarinanmanta (Lucas 2:34).

Chay punchawqa 84 watanpi kaq Diosmanta willakuq Anapas chaypim kachkarqa, payqa sapa kutim Diospa wasinman riq. Paypas paykunaman asuykuspanmi Diosta hatunchayta  qallaykurqa, hinaspam chaypi kaqkunamanpas Jesusmanta willakurqa.

¡Maynatachá Joseywan Mariaqa kusikurqaku warmankumanta chayna rimasqankuwanqa! Tukuy chaykunawanmi astawan musyakurqaku Jesusqa suyasqanku kamachiq kasqanmanta.