MANA allin ruwasqaykimanta ñakakuyqa llumpaytam hukmanyarachisunkiman. Rey Davidpas mana allin ruwarusqanmanta chayna tarikuspanmi kaynata qillqarqa: “Llasaq carga hinaraqmi ñitiruwachkanña”, nispa (Salmo 38:4). Wakin iñiqmasinchikkunam Jehova Dios mana haykapipas pampachananmanta piensaspanku llumpayta hukmanyarurqaku (2 Corintios 2:7). ¿Huchallikurusqaykiraykuchu piensanki Diosqa qanmanta karupi kasqanta? ¿Hatun huchata ruwarusqaykiraykuchu piensanki Dios mana pampachasunaykita? Ama hukmanyaychu, Jehova Diosqa yanapaykuytam munasunki.

Jehova Diosqa manam qipanchanchu wanakuqkunataqa, aswanmi yanapaykun. Chinkasqa churimanta rikchanachiypim, Jesusqa willakurqa chay churi imapas munasqanta ruwananpaq wasinmanta ripukusqanta, ichaqa tiempopa risqanman hinam kutinanpaq tantearurqa. ¿Imataq pasarqa wasinman kutiruptin? “Karumantaraq taytan rikuruspanmi kuyapayakuywan kallpaylla taripaykurqa hinaspam abrazaykuspa muchaykurqa” (Lucas 15:11-20). Jehova Diospas chayna kuyapayakuq taytam. ¿Yaqachu Diosman asuykuyta munaspapas karupi kasqaykita piensanki? Ama iskayrayaychu, Diosqa makinta kichariykuspanmi suyasuchkanki.

¿Piensankichu huchaykikuna achka kasqanrayku utaq hatun hucha kasqanrayku Dios mana pampachasunaykita? Chayna kaptinqa, Isaias 1:18 nisqanpi yuyaymanay. Ninmi: ‘Ñuqa tayta Diosmi nini: Kunanyá ñuqaman hamuychik. Kunanyá ñuqawan tanteanakusunchik. Cochinilla hina guindoña huchaykichik kaptinpas ritita hinam yuraqyachisaq’, nispa. Chaynamá, Jehova Diosqa hatun huchanchiktapas pampachaykuwachwanmi.

Jehova Diosqa manam munanchu huchaykikunamanta hinalla ñakakunaykitaqa. Diospa pampachakuyninta chaskiyqa hinaspa sunqunchikpi hawka tarikuyqa mayna sumaqmi. Hinaptinqa, ¿imatam chayna tarikunaykipaq ruwanayki? Puntataqa rey Davidtam qatipakunayki, paymi nirqa: “Tayta Diosmanmi willakullasaq mana kasukuq kasqaymantaqa”, nispa (Salmo 32:5). Jehova Diosqa kaytam nisunki: ‘Kunanyá ñuqawan tanteanakusunchik’, nispa. Chaynaqa Diosman asuykunaykipaqyá payta mañakuy. Tukuy huchaykikunata willaspayki imayna tarikusqaykimantapas willay. Davidmi mana manchakuspan kaynata mañakurqa: ‘Llapachallan huchallaymantayá ñuqallayta chuyanchallaway’, nispa. Nirqataqmi: ‘Qamqa manam despreciankichu wanakusqa sunquyuq runataqa’, nispa (Salmo 51:2, 17).

Chaymantapas Davidqa Diospa akllasqan Natan runapa yanapakuynintam chaskikurqa (2 Samuel 12:13). Kunanpas Jehova Diosqa iñiqkunamanta nanachikunanpaq ancianokunatam akllarun. Kay iñiqkunaqa allin yachachisqam kachkanku  wanakuq iñiqmasinkunata yanapanankupaq, chaynapi Jehova Dioswan kaqmanta allin amistad kanankupaq. Ancianokunawan rimaspaykiqa qawankim bibliata servichikuspa Dioswan allinyanaykipaq yanapasusqaykita. Chaymantapas, qanwan kuskam Diosta mañakunqaku chaynapi llakisqa kasqaykitawan mana kaqpaq hapikusqayki chinkachinaykipaq (Santiago 5:14-16).

Jehova Diosman hinaspa ancianokunaman huchanchikmanta willayqa sasaniraqmi kanman. Davidpaqpas sasam karqa. Bibliam willawanchik huchanta pakasqanmanta (Salmo 32:3). Chaymantam ichaqa musyakururqa huchanta willakuyqa hinaspa chayta saqiyqa allinninpaq kasqanta.

Chayraykum Davidqa kaqmanta kusisqa kawsakurqa. Paymi qillqarqa: “¡Mayna kusisqam mana kasukusqanmanta Diospa pampachaykusqan runaqa!”, nispa (Salmo 32:1). Chaymantapas Diostam kaynata mañakurqa: “Señorlláy, qampuniyá simillayta kichariykuway. Alabanaypaqyá simillayta kichariykuway”, nispan (Salmo 51:15). Davidqa hawkam tarikurqa hinaspapas Diostam agradecekurqa, chaymi runakunapa qayllanpi payta alabarqa.

Jehova Diosqa munanmi mana ñakakuspa hawka yupaychanaykita. Munanmi paymanta runakunaman willakuspayki kusisqallaña hinaspa chuya sunquwan ruwanaykita (Salmo 65:1-4). Jehova Diosmi niwanchik: ‘Chaynaqa huchaykichikmanta wanakuspayá Diosman kutirikuychik chaynapi tukuy huchaykichikta chinkachiptin hamuq punchawpi [...] hawkayaypi samarichisunaykichikpaq’, nispa (Hechos 3:19).

Qallariyllapi rimamusqanchik Martham nin: “Wawaymi Willakuq hinaspa ¡Rikchariy! qillqakunata apachimuwaq, chayraykum pisi-pisimanta Dioswan allin amistad kayta qallaykurqani. Aswan sasam karqa tukuy huchayta pampachaykuwananpaq mañakuyniy. Ichaqa chaytamá ruwarqani. ¡40 watamá pasarqa Diospa llaqtanman kutinaypaqqa! Kay pasawasqanmi qawachin unay watakunaña Diosmanta karunchasqa kaspapas, payqa munanmi kuyakuyninpi takyananchiktawan llaqtanman kutinanchiktapas”, nispa.