Kuyasqa wawqi-panillay:

Yachasqaykiman hinam, bibliaqa ñuqanchik hina runakunamanta achkanpi riman. Wakinkum Diosta servispankupas llumpay sasachakuypi hinaspa llakikuykunapi ñuqanchik hina tarikurqaku (Santiago 5:​17). Wakinñataqmi llumpayta hukmanyarqaku llakikuykunawan, sasachakuykunawan utaq wakin iñiqmasinkunapa mana allin ruwasqankuwan. Wakinkunañataqmi imapas mana allin ruwarusqankuta yuyarispanku llumpayta hukmanyarqaku.

¿Chayraykuchu paykunaqa Jehova Diosta qipancharurqaku? Manam. Achkam Salmos qillqaq hina Jehova Diosta kaynata mañakurqaku: ‘Chullaruq ovejata hinayá kay serviqnikita maskaykullaway. Kamachisqaykikunata mana qunqasqayraykuyá kay serviqnikita maskaykullaway’, nispa (Salmo 119:176). ¿Yaqachu haykapipas chayna tarikurqanki?

Jehova Diosqa manam haykapipas qunqanchu kanchanmanta rakikuruq serviqninkunataqa. Aswanqa paykunatam maskan. Chaytam wakinpi ruwan iñiqmasinchikkunata valekuspan. Jobta Jehova Dios imayna yanapasqanpi yuyaymanay, payqa llumpay llakipim tarikurqa mana imayuq qiparusqanrayku, churinkuna wañukusqanrayku hinaspa nanay unquywan kasqanrayku. Jobqa llumpaytataqmi hukmanyarqa kuyasqan runakuna nanay simiwan rimapayasqankurayku. Jehova Diosta mana qipanchaspanpas, Jobqa pantaspanmi nirqa chay mana allinkuna Diosmanta hamusqanta (Job 1:​22; 2:​10). ¿Imaynatam Jehova Diosqa yanapaykurqa?

Eliu sutiyuq serviqnintam valekurqa. Lliw sasachakuyninmanta Job willakuptinmi, Eliuqa hawka uyarirqa hinaspañam rimapayarqa. ¿Imatam nirqa? ¿Qaqcharqachu? ¿Nanay simiwanchu pinqachinanpaq hina rimapayarqa? ¿Hatuntukuspanchu rimapayarqa? Manamá. Jehova Diospa espiritunpa yanapakuyninwanmi Eliuqa nirqa: ‘Ñuqapas Diospa qayllanpiqa qam hinallam kani. Ñuqapas mitumanta unanchasqallam karqani’, nispa. Chaymantañataqmi nirqa paymanta mana manchakunanpaq nitaq nisqanwan hikutasqa hina tarikunanpaq (Job 33:​6, 7). Jobta hukmanyachinanmantaqa, kuyakuywanmi rimapayarqa hinaspa kallpancharqa.

Ñuqaykupas chayna kuyakuyllawanmi kay qillqata ruwamurqaniku. Puntataqa, Jehova Diosmanta karunchakuruq achka iñiqkunata uyarispaykum imayna tarikusqankupi yuyaymanarqaniku (Proverbios 18:13). Chaymantañataqmi, Diosta mañakuspayku bibliapa willakuyninkunata allinta qawarqaniku, chaypim willakun yaqa chaynapi tarikuq serviqninkunata Jehova Dios imayna yanapasqanmanta. Tukunaykupaqñataqmi, chay willakuykunata hukllawaspayku kay qillqata ruwamurqaniku. Kallpanchaykikum yuyaymanaspayki leenaykipaq. Anchatam kuyaykiku.

Enteron pachapi Diospa llaqtanpi punta apaqkuna