DIOSPA serviqninkuna kaspapas, lliwmi llakikuyniyuq kanchik. Salmos qillqaqmi nirqa: ‘Pensamientokunapa intusqanmi kani’, nispa (Salmo 94:19). Jesuspas nirqam tukupay punchawkunapi ‘imapas kaqkunapi afanakusqanchikrayku’ Diosta serviyqa sasa kananmanta (Lucas 21:34). ¿Hukmanyankichu qullqi mana haypasusqaykirayku, aylluykipi sasachakusqaykirayku utaq unqusqaykirayku? ¿Imaynatam Jehova Diosqa yanapasunkiman?

Yanapakuytam chaskinanchik llakinchikkunata atipanapaqqa. Apostol Pablom nirqa: ‘Sasachakuykunam kay lawmanta wak lawmanta hamun’, nispa. Chaywanpas nirqam mana atipawasqanchikmanta nitaq pasaypaqta hukmanyachiwasqanchikmanta nitaq mana wañuchiwasqanchikmanta. ¿Imataq chaypaq yanapawanchik? Jehova Diosmanta hamuq ‘hatu-hatun atiymi’ (2 Corintios 4:7-9).

Yuyaymanay Diospa llaqtanpi kaspayki ‘hatu-hatun atiyninta’ utaq kallpanchakuyninta imayna chaskisqaykipi. ¿Yuyachkankichu huñunakuypi huk kaqnin yachachikuynin imayna kallpanchasusqaykita? ¿Yaqachu iñiyniki kallpanchakurqa kay allpa pacha sumaq huertaman tikrakunanmanta hukkunaman willasqaykiwan? Huñunakuykunawan Diosmanta willakuyninchikqa kallpanchawanchikmi ima sasachakuytapas atipanapaq, yanapawanchiktaqmi hawka hinaspa kusisqa Jehova Diosta yupaychanapaq.

Jehova Diosqa munanmi munaychakuyninta puntapi churananchikta hinaspa watan-watan hinalla servinanchiktapas (Mateo 6:33; Lucas 13:24). Ichaqa, yaqapaschá unqusqayki, aylluykipi sasachakusqayki utaq Diosta yupaychanaykipaq pipas harkasusqayki mana kallpayuqta hina tarichisunki. Llamkaynikipas yaqapaschá sasachasunki huñunakuykunaman rinaykipaq. Tukuy chaykunawanmi ichapas llumpay hukmanyasqa tarikunki. Yaqapaschá chaykunarayku piensanki Dios serviyqa sasa kasqanta.

Jehova Diosmi ichaqa imayna tarikusqaykita yachan, payqa manam mañasunkichu mana ruway atisqaykitaqa. Arí, payqa yachanmi llumpay pisipasqa utaq hukmanyasqa tarikuptinchik samariyninchikqa ancha allin kasqanta (Salmo 103:13, 14).

Yuyaymanay Eliasta imayna waqaychasqanpi. Huk kutipim payqa llumpayta hukmanyaruspan hinaspa manchakuspan chunniq lawman lluptikurqa. ¿Imatam Jehova Diosqa ruwarqa? ¿Mana allin ruwarusqantachu nirqa? ¿Kutirinanpaqchu chaylla kamachirqa? Manamá. Aswanqa iskay kutikamam huk angelta kacharqa sumaqllata rikchachispan mikuyta qunanpaq. Chaymanta 40 punchaw pasaruptinpas, Eliasqa hinallam  llumpay hukmanyasqa tarikurqa. ¿Imatawanraqmi Jehova Diosqa ruwarqa? Puntatam qawachirqa waqaychay atisqanta. Chaymantañataqmi kuyakuyllawan rimapayarqa. Nirqataqmi mana sapallan kasqanta, aswanqa nirqam waranqantin runakuna Diosta tukuy sunqunwan yupaychasqankuta. Chaykunawanmi Eliasqa kaqmanta kallpanchasqa tarikurqa (1 Reyes 19:1-19). ¿Imatam kaymanta yachawaq? Sasachakuykunawan Elias llumpayta hukmanyaruptinmi, Jehova Diosqa pacienciakusqantawan llakipayakuyninta payman qawachirqa. Kunanpas hina chaynallam Diosqa. Payqa Eliasta hinam qamtapas kuyasunki.

Amayá tupachiychu ñawpaqpi Diospaq tukuy ruwasqaykita kunan ruwasqaykiwanqa. Allin kallpaq runakuna watantin utaq killantin mana kallpaptinqa, manamá qunqayllamantachu allin kallpaqpiqa rikurirunman. Yaqachá pisi-pisimanta imatapas ruwanan kaqmanta allin kallpaq kananpaq. Ñuqanchikpas kallpaq runakuna hinam kanchik, chaymi pisi-pisimanta imapas tanteasqanchikta haypanapaq kallpanchakunanchik (1 Corintios 9:24-27). ¿Yaqachu imatapas chaylla ruwanaykipaq tantearunki, ichapas huñunakuyman rinaykipaq? Chayta ruwanaykipaqqa Jehova Diosta mañakuy. Kallpata hapisqaykiman hinam pisi-pisimanta musyakunki Jehova ‘Diospa allin kasqanta’ (Salmo 34:8, CQ12). Yuyariy, Jehova Diosqa anchatam chaninchan kuyasqaykita qawachinaykipaq tukuy atisqaykita ruwasqaykitaqa (Lucas 21:1-4).

¿Imaynatam qallariyllanpi rimasqanchik June iñiqmasinchikta Jehova Dios yanaparqa? Paymi nin: “Yanapaykuwananpaqmi sapa kuti mañakurqani. Huk punchawmi llumchuyniy niwarqa yachasqay lawllapi hatun huñunakuy kananmanta, chaymi tantearurqani chay huñunakuyman huk kaqnin punchawninta rinaypaq. ¡Jehova Diospa llaqtanman kaqmanta kutiyqa ancha sumaqmi karqa! Chay huñunakuyqa allintapunim yanapawarqa. Kunanqa Jehova Diostam kaqmanta yupaychani chaymi llumpayta kusichiwan. Musyakurunim karunchakuyqa mana allin kasqanta hinaspa iñiqmasinchikkunawan huk sunqulla kaypas ancha allin kasqanta. Anchatam kusikuni imapas manaraq kachkaptin kutimusqaymanta”, nispa.