Huk kutipim Julia sutiyuq sipascha espejopi qawapakurqa, hinaspanmi puqusqa kasqanta piensaspan nirqa: “Llumpay puqusqam kachkani”, nispa. Tayta-mamanpaqwan amistadninkunapaqmi ichaqa wayrapa aparunallanña karqa.

Chaymi Juliaqa puqusqa kasqanta piensaspan manaña mikuytapas munarqachu.

¿Imatataq qamqa Julia hina piensaspaykiqa ruwawaq?

Manam imananchu kuyayllapaq rikchayniyuq kay munasqaykiqa. Bibliapipas ninmi Saraqa, Raquelqa, Joseyqa, Davidqa hinaspa Abigailqa kuyayllapaq rikchayniyuq kasqankuta. Willakuntaqmi Abisag sutiyuq sipaspas ‘ancha buenamozallaña’ kasqanta (1 Reyes 1:4).

Chayna kaptinpas achka mozo-sipaskunam kuyayllapaq rikchayniyuq kanankupaq tukuyta ruwanku. Ichaqa chay ruwasqankuwanqa imawanpas ñakarinmankum.

• Achka sipaskunata tapuptinkum achkaq nirqaku puqusqallaña kasqankuta. Ichaqa asllam puqusqaqa karqaku.

• Chaynallataqmi mana puqusqa sipaskunata tapuptinkupas achkaq nirqaku puqusqa kasqankuta.

• Wakin mozo-sipaskunaqa puquruyta manchakuspam manaña mikuytapas munankuñachu, hinaspam tulluyachkanku.

 Sichu puquruyta mana munaspa manaña mikuspaykiqa tayta-mamaykima n utaq pimanpas chaylla willakuy yanapasunaykipaq. Paykunaqa kuyakuywanmi yanapasunki, chaymi paykunamanta biblia nin: ‘Tukuy tiempopim chiqap amigoqa kuyakun. Sasachakuy tiempopipas wawqi hinaraqmi kuyakun’, nispa (Proverbios 17:17).

Kuyayllapaq rikchayniyuq kaymantapas aswan allinqa sumaq sunquyuq kaymi. Bibliapim Davidpa churin Absalonmanta nin:

‘Absalon hina buen mozo kasqanmanta alabasqa runaqa manam pipas karqachu lliw Israel nacionpiqa. Paymi karqa chaki plantanmanta uma puyukninkama kuyayllapaqllaña’, nispa (2 Samuel 14:25).

Chayna kuyayllapaq kaspanpas Absalonqa mana allin runam karqa. Chaymi bibliapas willakun hatun tukuqllaña, runakuna wañuchiqllaña hinaspa chiqnikuqllaña kasqanmanta.

Chayraykuchá bibliaqa kallpanchawanchik sumaq sunquyuq kanapaq kaynata niwaspanchik:

“Musuq runaña kaychik”, nispa (Colosenses 3:10).

‘Qamkunapa sumaq kaynikichikqa kachun amayá hawaykichikpichu, chukchaykichik simpapakuypichu, aswanqa sunquykichikpiyá’, nispa (1 Pedro 3:3, 4).

Kuyayllapaq rikchayniyuq kay allin kaptinpas, aswan allinqa sumaq sunquyuq runa kaymi. Chayna sumaq sunquyuq runa kaspaykiqa runakunapa kuyasqanmi kanki. Filicia sutiyuq sipasmi nin: “Kuyayllapaq rikchayniyuq kaspaykiqa runakunapa qaway-qawasqanmi kanki, ichaqa runakunapa kuyasqanqa kanki sumaq sunquyuq runa kaspallaykim”, nispa.

¿Rikchaynikichu hukmanyachisunki?

¿Kuyayllapaq kanaykipaqchu imatapas ruwachikuyta munanki utaq tipi wiqaw kanaykipaqchu manaña mikuytapas munanki?

¿Imataq hukman rikchakusunki? (Mayqantapas akllay).

• SAYAYNIKI

• LLASAYNIKI

• CHUKCHAYKI

• CUERPOYKI

• UYAYKI

• ÑAWIKI

¿Qallariynin iskay tapukuykunapichu “arí” niqta hinaspa kimsa kaqpiñataq achkata akllarqanki? Chayna kaptinqa manapasmi qampa qawakusqaykiman hinachu wakinpaqqa kachkanki. Wakinpiqa llumpa-llumpayta kuyayllapaq kayta munaspam mana musyayllata mana allinta rikchayninchikmanta rimachwan (1 Samuel 16:7).