Demoniokunaqa Diospa chiqnisqankunata ruwananchiktam munanku
Wañuqkuna hinalla kawsasqankuta piensaspankum wakinkuqa tukuyta ruwanku chaynapi mana imanarunankupaq.
¿Imaynanpitaq demoniokunaqa runakunata pantachiyta munawanchik? Paykuna hina Diosmanta karunchakunanchikta munaspankum hinaspa paykunata yupaychananchikta munaspankum. Demoniokunaqa munankum Jehova Diospa chiqnisqan kaqkunata ruwananchikta. Chay mana allin ruwaykunatam wakinpiqa ruwanku pipas wañukuptin.
Ayllunchik wañukuptinqa llakisqam tarikunchik. Chaynam Jesuspas tarikurqa Lazaro wañukuptin (Juan 11:35).
Yaqa enterollan allpa pachapim, pipas wañukuptinqa wañukuq hinalla kawsasqankuta piensaspanku tukuyta ruwanku. Piensankum wañukuqpa espiritun utaq animan mancharichinankumanta chaymi velaspanku wañukuqpaq tukuyta ruwanku. Chaykunata ruwaq runakunaqa satanaspa munasqantam ruwachkanku. Bibliapi nisqanman hinaqa wañuqkunaqa manañam imatapas yachankuñachu (Eclesiastes 9:5).
Wañukuqpa alman hinalla kawsasqanta piensaspankum enteron pachapi runakuna wañukuqpaq tukuyta ruwanku. Chay costumbrekuna bibliapa nisqanpa contranpi mana kaptinpas, wañuqkuna hinallaraq kawsasqanta piensaspankum tukuy chaykunataqa ruwanku. Piensankum chaykunata ruwaptinku wañukuqpa espiritun utaq animan mana imanarunanta. Chaykunata ruwaq runakunaqa satanaspa munasqantam ruwachkanku. Bibliapi nisqanman hinaqa wañuqkunaqa manañam imatapas yachankuñachu (Eclesiastes 9:5).
Wakinkuñataqmi wañuqkunata cieloman chayanankupaq yanapasqankuta piensaspanku tukuyta ruwanku.
Wakinpiñataqmi imatapas ruwanku wañukuqta yanapayta piensaspanku. Chaymi wakin llaqtakunapiqa wañukusqan punchawmanta 40 punchaw pasaruptin mikuykunata, ofrendakunata ruwanku wañukuqta cieloman chayananpaq yanapasqankuta piensaspanku.
Chaykuna ruwasqankuqa manam allinchu. Chayta ruwaspankuqa satanaspa munasqantam ruwachkanku. Diosqa manamá haykapipas ñuqanchikwanqa kusisqachu kanman satanaspa munasqanta ruwaptinchikqa (2 Corintios 6:14-18).
Chaymi Diosta serviqkunaqa mana chay costumbrekunataqa ruwananchikchu. Chayta ruwanamantaqa wañukuqpa aylluntam yanapaykunanchik. Yachanchikmi wañukuq runataqa Jehova Dios kawsarichinanta (Job 14:14, 15).
Diosqa chiqninmi brujokunapa ruwasqankutaqa
Wakin runakunaqa kikinkum demoniokunawan parlanku utaqmi brujokunapa yanapakuyninwan parlanku. Jehova Diosqa chiqninmi pagapu ruwaqkunatapas, coca qawaqkunatapas, layqa ruwaqkunatapas, qatipaqkunatapas, qayapaqkunatapas chaynataq chayman rikchakuq tukuy imatapas.
Diosqa manam munanchu dibujopi kaqkunata ruwananchiktaqa. Payllata yupaychananchiktam munan (Exodo 20:5).
Bibliapim nin: “Amam pipas kanqachu qawaqqa, qatipaqqa, imapas pasananmanta yachaqtukuqqa, layqa ruwaqqa, brujoqa, qayaqkunaman utaq qawaqkunaman riqqa nitaq wañuqkunawan rimaqqa. Jehova Diosqa chiqninmi chaykuna ruwaq runataqa”, nispa (Deuteronomio 18:10-12).
¿Imaynanpitaq Diosqa chaykunata ruwananchiktaqa mana munanchu?
Manaqa munanchu ancha-anchata kuyawasqanchikraykum. Payqa manam munanchu chaykunata ruwaspanchik imamanpas chayaspa ñakarinanchiktaqa.
Brasil nacionpi yachaq Nilda sutiyuq warmim bruja karqa. Paytam demoniokuna ancha-anchata ñakarichirqa. Paymi nin: “Demoniokuna tukuy imata ruwawasqanraykum locayarurqani, chaymi imatapas mana musyakuspay ruwaq kani. Hawkayanaypaqmi hampikunata tomaq kani. Tomakuyllamanñam qukururqani hinaspaypas drogakuqmi kani. Chaynam unay watakuna karqani”, nispa.
Layqa ruwaqkunaqa demoniokunapa tanqasqan kasqankuraykum llumpay mana allinkunata ruwanku, chaymi wakinkuqa mana wasiyuq qipanku, carcelman chayanku chaynataq sipikunku.
Nildaqa Diospa yanapakuyninwanmi hinaspa testigokunapa yanapakuyninwanmi tukuy chaykunamanta librakururqa, kunanqa allinñam kawsakun. Paymi nin: “Manam munaymanchu pipas demoniokunawan rimasqanrayku ñakarinantaqa”, nispa.
Kaykunatapas leeykuy
¡RIKCHARIY!
¿Imatam Biblia nin espiritismomanta?
Ahka runakunam wañusqakunawan rimayta munanku. ¿Imanintaq chaymanta Bibliaqa?
